Gûkua na kûthikwa gwa Saara
23
1 Saara agûkinyithia ûkûrû bwa mîanka îgana rîa mîrongo îîrî na mûgwanja, 2 aakuîra Kiriathi-Ariba îra îîndî îîtagwa Eburoni ndeeni ya nthîgûrû ya Kanaani. Îburaîmu amûrîrîra. 3 Rîru aûkîîra kuuma ara mwîrî wa Saara warî, aathi kîrî Aiti, abeera, 4 “Ntwîre ta ndî mûgeni nthîgûrû yenu, na ntirî na bantû ara mbûûmba kûthika mwekûrû wakwa.”5 Aiti nabo baacookeria Îburaîmu bamwîra, 6 “Tûthikîîrie, mwathi wetû; ûrî mûnene wa inya gatîgatî geetû. Thika kiimba gîaku nthikooni wa îra ûkeenda, gûtirî we akaarega na nthiko yake kana akûrigîîria ûtirathika muntû waku.”
7 Rîru Îburaîmu eendamîîra mbere yao abeera, 8 “N'ûntû ûûgû i bu bûkwîgua, itû mbîgîîruani kîao bûûrie Eburoni mwana wa Soari 9 aambenderie îkurungu rîake rîa Makipera, rîra rîrî akubî na mûthia wa kîthaka gîake. Mûûrie ambeenderie rîo na ûgûri bûra akeenda atuîke bantû akwa akûthikanaga nthîgûrû îno yenu, na bwinthe bwîgue bûrî ankûûyî.”
10 Eburoni ûyu Mûiti naakari nthî gatîgatî ga antû baao na aacookeria Îburaîmu Aiti bara bangî bonthe bakîîgagua bara baayîîte mwîrîgaani wa ntûûra yake, 11 amwîra atarî, “Arî, mwathi wakwa, nthikîîria, ngakûnenkera kîthaka amwe na îkurungu rîra rîrîku. Ngûkûnenkera kîo mbere ya antû baakwa. Ta bantû a kûthikaga antû baaku bara bakuû.”
12 Îburaîmu eendamîîra antû ba nthîgûrû înu kaîrî, 13 na aacookeria Eburoni muntû wonthe athikîîrîîtie, “Nthikîîria wegua ûkeenda. Nkaarîa îrîi rîa kîthaka. Rîîtîgîîrie kaingo mbûûmba kûthika muntû wakwa ûra mûkuû oogo.”
14 Eburoni aacookeria Îburaîmu amwîra, 15 “Nthikîîria, mwathi wakwa, nthîgûrû n'ya ûgûri bwa Sekeri magana mana, înu i mbi îndî kîrî tiû? Thika muntû waku.” 16 Kwoogu Îburaîmu aarîa Eburoni îrîi rîra aarî akûgweta, fetha magana mana, wa ta bûra kwarî gûgwîtîganîîrua mbere ya antû. 17 Aagûra gacuncî ga kîthaka kara kaarî ka Eburoni naara Makipera, akubî na Mamure. Gîkî kîarî kîthaka, amwe na îkurungu rîra rîarî ku, na mîtî îra yonthe yarî akubî. 18 Biatuîka ûtonga bwa Îburaîmu cwe n'ûntû bwa gwîtîganîîria kûra gwetîganîîrue mbere ya akûrû ba Aiti bara baarî mwîrîgaani wa ntûûra. 19 Nyuma ya ûgu Îburaîmu aathika mwekûrû wake Saara îkurunguuni kîthakaani kîa Makipera akubî na Mamure îra îrî Eburoni ndeeni ya nthî ya Kanaani. 20 Kwoogu kîthaka na îkurungu rîra rîarî ku bienderua Îburaîmu n'Aiti arî bantû a kûthikanaga.