Ngai eera Îburaîmu arute Isaka kîgongwana
22
1 Nyumaani Ngai ageria Îburaîmu, amwîra, “Îburaîmu!” N'we auga, “Ndî aaga.” 2 Ngai amwîra, “Thûkia mwana waku, ûra ûmwe wenka akî ûrî n'we, Isaka, ûra wendeete mûno, na ûthi nthîgûrû ya Moria na ûmûrute arî kîgongwana gîa kûbîîthia kîrîmaani kîmwe kîa bira ngaakwîra.”3 Rûûni rûkîîrî mûno Îburaîmu aagiitaanga nkû cia kîgongwana, oogeera îng'ooini rîake, na aathûkia Isaka na aruti ngûgî baîrî. Baanjîîria rûgendo bathiîte gûntû kûra Mwathani aabeerîîte mantû maaku. 4 Ntugûûni ya ithatû Îburaîmu oona gûntû gûku arî gataaria. 5 Eera aruti ngûgî baake, “Karagaani aaga na îng'ooi, rîru naani tûrî na mwana tûthi aara tûkagonge, rîru tûcooke.”
6 Na Îburaîmu aathûkia nkû cia kûbîîthia kîgongwana, aîkia Isaka acikamata, n'we akamata kayiû na mwanki. Kwoogu baathiiyania barî baîrî. 7 Na Isaka aûria îthe Îburaîmu, “Baaba!”
N'we acookia, “Ndî aaga mwan'wakwa.”
Isaka aûria, “Inkwona ûrî na mwanki na nkû, aabu î îrî kû ng'ondu ya kîgongwana?”
8 Îburaîmu acookia, “Ngai akeeyana ng'ondu mwan'wakwa.” Baathiiyania barî baîrî.
9 Rîra baakinyire bantû ara Ngai eerîîte Îburaîmu aathi, aaka kîthînjîro na aigîîra nkû îgûrû rîakîo. Rîru ooga Isaka na amûmaamia îgûrû ya nkû kîthînjîrooni. 10 Rîru aûkîîria kayiû eethuuranîrîte kûûraga mwan'wake. 11 Îndî Mûraîka wa Mwathani kuuma îgûrû amwîta, “Îburaîmu, Îburaîmu!” Aacookia auga, “Yîî i nthikîîrîîtie.” 12 Amwîra, “Menya ûthûûkia mwana, ûtikaamûrûthe nwa ata! N'ûntû îîndî nkûmenya ûmma nwathîkagîra Ngai, n'ûntû ûtirarega kûndutîra kaana gaaku, na i kamwe.” 13 Na Îburaîmu aûkîîria meetho maake îgûrû oona ntûrûme îgwetwe ngoci kîthakaani. Kwoogu aathûkia ntûrûme na amîruta kîgongwana bantû a mwan'wake. 14 Kwoogu Îburaîmu eeta bantû agu “Mwathani akeeyana.” Na wana kinya îmunthî antû baugaga, “Kîrîmaani kîa Mwathani gûkeeyanwa.”
15 Rîru Mûraîka wa Mwathani eeta Îburaîmu kaîrî kuuma îgûrû, 16 amwîra, “Mwathani ariuga ûûgû: Ndathiîtia na riîtwa rîakwa ningwa, n'ûntû ûkûûmbathîkîra na ûtirarega kûûndutîra mwana waku ûra arî ûmwe akî, 17 na mma ngakûthaarima, na nkaathagayia nciarwa ciaku ta nthata cia îgûrû na ta mûthanga wa îria. Bagaatura anthû baao na babatuunye taûni ciao, 18 na gûkûrûkîîra mbeû yaku, mîgongo yonthe ya nthîgûrû îkaathaarimwa n'ûntû bwa kûmbathîkîra gwaku.” 19 Îburaîmu na Isaka baacooka kîrî aruti ngûgî bara baayîîte nabo, na baacooka baathi barî amwe Beeriseba naara Îburaîmu aatûûrire.
Nciarwa cia Naori
20 Nyumaani Îburaîmu eerwa Mirika naarî agûciarîra mûruagina Naori aana banaana: 21 Usi arî gîtûra îria, Mbusi mûruagina, Kemueri t'we îthe wa Aramu, 22 Kesendi, Aso, Pirindasi, Njindirabu, na Bethueri 23 îthe wa Rebeka. Mirika aaciarîîre Naori mûruagina wa Îburaîmu aana baba banaana. 24 Naori naarî na mûka ûngî wa kwaiga ûra eetagwa Reuma, na naarî na nthaka inya: Teba, Ngaamu, Taasi, na Maaka.