Gûciarwa gwa Isaka
21
1 Mwathani aathaarima Saara, wa ta bûra aarî akwaiga wîrane, 2 aagîa na nda na aaciarîra Îburaîmu kaana ga kaîyî arî ûmûkûrû. Monthe maakarîkire kagiitaani kara Ngai augîîte magaakarîka. 3 Na Îburaîmu eeta kaana gaku Saara aamûciarîîre, Isaka. 4 Isaka agûciarwa aathiria ntugû inyanya, Îburaîmu amûtaana wa ta bûra Mwathani aamwathîîte.5 Îburaîmu aarî na ûkûrû bwa mîanka îgana Isaka agîciarwa, 6 na Saara auga, “Ngai agûtûma ntheka na antû bonthe bara bakeegagua ntheto ino bakaathekaga amwe naani.” 7 Na aûria, “N'ûû ûkîgeria kwîra Îburaîmu Saara akaagîa na kaana? Na i niû ûyû ndamûciarîra kaana ga kaîyî ûkûrûûni bwake?”
Agari na Isumairi beengatua
8 Na kaana gaakûra, gaatiga wonka; na Îburaîmu aarûtha kîatho kîînene ntugû înu Isaka aatigithagua gwonka.
9 Îndî Saara oona mwana wa Agari ûra Mûmiisiri, mwana ûra aaciarîrîîte Îburaîmu, akîthekania na mwana wake Isaka. 10 Na eera Îburaîmu, “Îngatia mûka ûyû nkombo barî na mwan'wake, n'ûntû mwana wa mûka ûyû nkombo atiigaana rûgai na mwan'wakwa Isaka.” 11 Na ûntû bûbu bwathûûria Îburaîmu mûno n'ûntû Isumairi aarî mwana wake. 12 Îndî Ngai eera Îburaîmu, “Menya ûthûûra n'ûntû bwa mwana na mûruti ngûgî wa mwekûrû waku. Thikîîria bunthe bûra Saara agaakwîra, n'ûntû nciarwa ciaku igaatarwa kuumania na Isaka. 13 Na ngaatuîkithia nciarwa cia mwana wa mwekûrû ûyû nkombo mûgongo ûmûnene, n'ûntû i mbeû yaku.”
14 Kwoogu Îburaîmu aûkîîra rûkîîrî, na aathûkia mûgaate na mbooro ya rûûyî, na aanenkera Agari, abicuuria gîturo gîake, amwîngatia amwe na mwana. Baumagarûka baathi rwanda rwa Beeriseba, baakara bakîthiûrûûkaga woogu. 15 Rûûyî rûkûthira, Agari aatiga kaîyî gaku mûgunyeeni kathakaani. 16 Rîru aathi akara nthî bantû araaya, bantû a îgera rîa mûguî, n'ûntû augire, “Ntiûmîîria kwona mwana agîkua.” Na wa bûra Agari aakari gataaria n'we, aanjîîria kûrîra.
17 Na Ngai eegua mwana akîrîra, na Mûraîka wa Ngai eeta Agari kuuma îgûrû, amûûria, “Agari, i mbi îgûkûthîînia? Ûtikaamake, Ngai akwîgua kîrîro kîa mwana arî ara arî. 18 Ûkîîra, ûthûkie mwana, na ûmûgwate na njara ciaku, n'ûntû nkamûtuîkithia mûgongo ûmûnene.” 19 Rîru Ngai arugûra meetho maake, na oona kîthima kîa rûûyî, aathi ataîrîîra mbooro yaûyûra, na aakuundia mwana. 20 Na Ngai n'eethîîrwe arî na mwana ûyu, aakûra, aatûûra rwanda, na aatuîka mûguîmi ûmûnene. 21 Aatûûrire rwanda rwa Parani, na gina amûcwîra mûka kuuma nthî ya Miisiri.
Îburaîmu na Abimereki baarûtha kîrîîkanîro
22 Kagiitaani gaku Abimereki na Fikori atongoria ba njûûrî yake beera Îburaîmu, “Ngai arî amwe naawe mantûûni monthe mara ûrûthaga, 23 kwoogu îîndî thiîtia na riîtwa rîa Ngai uuge ûtiindongoia niû, aana baakwa na nciarwa ciakwa. Rîonthe mbîgîîtue ndî mwîtîgua kîrî woû, kwoogu îîndî thiîtia uuge ûkeegua ûrî mwîtîgua kîrî niû amwe na nthîgûrû îno ûtwîre ûrî mûgeni.” 24 Na Îburaîmu auga, “Nkûthiîtia.”
25 Rîra Îburaîmu aararamîkîîre* Abimereki îgûrû rîa kîthima kîa rûûyî kîra aruti ngûgî ba Abimereki baarî bakûthûkia, 26 Abimereki auga, “Ntiiyî n'ûû ûrûthîîte ûntû bûbû, ûtaambîîra, na ntaabuîgua kaîrî nwa îmunthî.” 27 Rîru Îburaîmu aanenkera Abimereki ng'ondu na ng'ombe, rûrî rwano rwa kîrîîkanîro kîra aigîîrwe n'we. 28 Îburaîmu aathûra mîgoma ya ng'ondu mûgwanja kuuma ûrîîthiini bwake, 29 Abimereki amûûria, “Ng'ondu ino mûgwanja wathûra rî i ta kuuga ata?” 30 Îburaîmu aacookia, “I kîewa gîakwa kîrî woû kîrî kîoneeria kîrî antû atî i niû ndeenjire kîthima gîkî.” 31 Kwoogu bantû agu eetwa Beeriseba,a n'ûntû agu noogo baathiîtîîrie. 32 Nyuma ya bakwaiga kîrîîkanîro, Abimereki baathi na Fikori, mûtongoria wa njûûrî yake, na baacooka mûciî nthîgûrû ya Afirisiti. 33 Na Îburaîmu aanda mûtî wa mûgunye Beeriseba, na aagonga Mwathani, Ngai Ûra Atûûraga Mwoyo, arî bantû agu. 34 Rîru Îburaîmu aatûûra îgiita rîîraaya arî mûgeni nthîgûrû ya Afirisiti.