Îburaîmu eeneeria Abimereki
20
1 Îburaîmu aathaama kuuma agu aathi bwa iti eerekerete bwa Negebu na aakarakara gatîgatî ga Kandesi na Suri. Nyumaani aakara bantû eetagwa Gerari gwa kagiita gaakai. 2 Îburaîmu eerire antû noogo atî mwekûrû wake, Saara, i mwaragina. Kwoogu mûnene Abimereki amûtûmana auga areeterwe we nyomba yake ya ûnene.3 Îndî ûtugû bûmwe Ngai aumîîra Abimereki kîrootooni amwîra, “Woû i taka ûrî ûmûkuû, n'ûntû mwekûrû ûyu ûthûkîîtie n'waitha.”
4 Îndî Abimereki ataarî akûmaama n'we, kwoogu aûria, “Mwathani, ga ûkaûraga muntû atarî na mabîtia? 5 Ataambîîrire, i mwaragina, na kinya Saara auga, ‘Yîî, i mûruayia.’ Nkîrûtha mantû mamu niû ntaarî na mabîtia nwa aniini!”
6 Mwathani amûcookia amwîra, “Yîî, imbiyî ûtaarî na mabîtia. I kîo gîatûmire ndigîîria ûtikeeyie mbere yakwa, i ntûma ntaareka ûmûtonga. 7 Îîndî mûcookie kîrî mwene, na agakûrombera, n'ûntû i kîroria. Na ûgaatûûra mwoyo. Îndî waarega kûmûcookia kîrî we, ûmenye ûmma woû amwe na mûciî waku uunthe i bûgaakua.”
8 Kwoogu Abimereki aûkîîra rûkîîrî mûno, eeta aruti ngûgî baake bonthe, abeera mantû mamu monthe, nabo baamaka mûno. 9 Rîru Abimereki eeta Îburaîmu, amûûria, “I mbi îno ûtûrûthîîte ûûgû? Na n'ata nkûbîtîrîîtie nabu, kaingo ûûndetera niû na nthîgûrû yakwa wîyia bûûnene ûû? Ûndûthîrîîte mantû ntabatîîrue kûrûthîrwa. 10 N'ata wathûgaanagia ûkîrûtha ûûgû?”
11 Îburaîmu auga, “Ndaarûthire bu n'ûntû ndaathûgaaniirie, gûtirî we ûkuthûkaga Ngai gûntû gûkû, na ndaamenya nkaûragwa n'ûntû bwa mwekûrû wakwa. 12 Amwe na ûgu, i mwarayia, tûrî ba îthe ûmwe, îndî maama tûûmwe na i ndaamûgûrire. 13 Rîra Mwathani aambîîrire mbuume mûciî wa baaba nthi nthîgûrû i ngeni, ndaamwîrire, ‘Ûûgû i bu ûkoonania wendo bwaku kîrî niû: Bantû onthe ara tûkaathi, uuge ndî mûruanyûkwe.’ ”
14 Rîru Abimereki aacookia Saara kîrî Îburaîmu, na kagiitaani wa gaku amwaa ng'ondu, ng'ombe na nkombo cia aka na arûme. 15 Na Abimereki eera Îburaîmu, “I gîîkî kîthaka, tûûra ara ûkeenda.” 16 Rîru eera Saara, “I nkûnenkera mûruanyûkwe fetha ngiri îmwe, rîrî îrîi rîa mabîtia monthe mara marûthîkîîte, mantû monthe îîndî i maacookanîrie.” 17 Rîru Îburaîmu aaromba Ngai; na Ngai ooria Abimereki, na ooria kinya mwekûrû wake na nkombo, kaingo baûmba kûgîa na twana. 18 N'ûntû Mwathani n'aarî akûriinga eekûrû bonthe na ûthaata rîrî îkaanûkia kîrî Abimereki n'ûntû bwa kûthûkia Saara mwekûrû wa Îburaîmu.