Wîyia bwa Sondomu
19
1 Araîka bara baîrî baakinya Sondomu ûgoro. Rooti aakari mwîrîgaani wa Sondomu.a Rîra aaboonire, aûkîîra kûbathagaana, na eendamîîria ûthiû nthî, 2 auga, “Aathi baakwa, ncûûni mûciî wakwa bûthambe magûrû na bûraare. Bûraûke gûûkîîra rûkîîrî warîra bûkeenda bûthi na mbere na rûgendo rwenu kaîrî.” Bauga, “Arî; tûkaaraara naagu kîeniini gîa taûni.” 3 Îndî Rooti abeereka nainya mûno; kwoogu baagarûka na baathûngîra nyomba yake, abarugîra irio, abakaandîra mîgaate îtarî na ndawa ya kwimbithia, baarîa. 4 Mbere bathi kûmaama, antû arûme bonthe kuuma bantû onthe ntûûra înu ya Sondomu, baakûrû na baîthi baathiûrûkîra nyomba înu. 5 Baaringîra Rooti gîtuma bakîmûûragia, “Barîkû antû bara baayire kûraara aaga gwaku? Barute nja tûmaame nabo.”6 Rooti aumagarûka kwaria nabo, na ainga mûrango. 7 Abeereka akîbeeraga, “Itû aruayia, menya bûrûtha ûntû bûûthûûku ta bûbu. 8 Aaga, ndî na aarî baakwa baîrî bataamaama na muntû mûrûme, ka mbûneenkere bo bûbarûthe bûra bûkwenda. Îndî bûtikaarûthîre antû baba ûntû bûûthûûku, n'ûntû n'ageni baakwa.” 9 Îndî bamwîra, “Umaaga tûrî, woû mbûyi îno! Ûrî ûû wagûtwîra bûra tûkaarûtha? Tûgaakûrûtha mantû maathûûku nkûrûki ya kinya bûra tûkaabarûtha.” 10 Îndî araîka babu baîrî baataambûrûkia njara baakuuyia Rooti bamûthûngîria ndeeni na bainga mûrango. 11 Na baatuîkithia kîrîndî gîku ntûûngi na gûtirî we akîûmba kwona naara mûrango ûrî.
Rooti auma Sondomu
12 Araîka babu baîrî baûria Rooti, “Kûrî antû beenu bangî barî ntûûra îno ta athonuugu, nthaka, aarî, kana muntû ûngî. Barute gûntû gûkû. 13 N'ûntû itûthiîte kûthiria ntûûra îno buru. Mwathani nooneete ûthûûku bwa antû baba na atûtûma kûthiria Sondomu.”
14 Kwoogu Rooti augia aathi kîrî antû bara baakeethagia aarî baake, abeera, “Umagarûkaani gûntû gûkû na mpwî! Mwathani naayîîte kûthiria Sondomu.” Îndî baathûgaania naaceethaga, na bamûthekeera.
15 Rûkîîrî rwa ntugû înu Araîka babu baakinyîîria Rooti, bakîmwîraga “Ûkîîra, thûkia mwekûrû waku na aarî baaku baîrî bara barî aaga, menya bûbîîthanîrua na ntûûra îno îgîkaanûkua.” 16 Agûkarakara, araîka bamûgwata njara na mwekûrû wake na aarî baake babaumagarûkia ntûûra înu, n'ûntû Mwathani naarî na kîao. 17 Araîka babeera, “Kuthûkaani bwonokie ûtûûro bwenu! Menya bûkaarûgama nwa kû kîbondeeni. Na menya bûgaacûûba nyuma! Toorokeraani irîmaani, kaingo bûtakua.”
18 Îndî Rooti aacookia auga, “Arî, itû mwathi wakwa menya ûtûma tûrûtha ûgu. 19 Wîthîrîîtwe ûrî wa kîao mûno kîrî niû na wonokia mûtûûrîre wakwa. Îndî ntiûmba kûthi irîmaani. Kînyamaara gîkaangwatagwata nkuîre noogo. 20 Raitha, kûrî na gatûûra karî akubî aaga. Itû ka nthi noogo, ûtikwona i gatûûra kaniini? Na mûtûûrîre wakwa ûkoonokua!” 21 Mûraîka amwîra, “Îî, ngakûrûthîra ûgu wauga. Ntiithiria gatûûra gaku. 22 Îndî rûtha bwa mpwî! N'ûntû gûtirî bu mbûmba kûrûtha bûtakinyîîte noogo.” Kuuma îgiita rîru, gatûûra gaku gaatua gwîtwa Soari.b
Kûthirua gwa Sondomu na Ngomoora
23 Rooti aakinyire Soari riûa rîkiuma. 24 Rîru Mwathani aurithîria Sondomu na Ngomoora rûrîrîîmbî rwa mwanki kuuma îgûrû. 25 Aathiriirie taûni na ntûûra inu na muntû wonthe ûra aatwîre ku, amwe na nthî na mîtî na nyaki îra yarî ku. 26 Bathiîte, mwekûrû wa Rooti acûûba nyuma aatuîka gîtugî gîa cuumbî.
27 Îburaîmu aathi rûkîîrî bantû ara aarûûngi mbere ya Mwathani, 28 aaraitha bwa Sondomu na Ngomoora oona karoongoroongo ga ntoogo kuuma bantû onthe nthîgûrû înu yaakari ta rûrîrîîmbî.
29 Îndî Mwathani aarûtha wa ta bûra eerîîte Îburaîmu na oonokia Rooti, amûruta kînyamaaraani kîra kîagwatire ntûûra ira ciarî kîbondeeni.
Rooti na aarî baake
30 Nyumaani Rooti auma Soari n'ûntû n'akuthûkaga gûtûûra noogo, na aathi gûtûûra makurunguuni irîmaani arî na aarî baake baîrî. 31 Ntugû îmwe mwarî ûra mûkûrû eera mwaragina, “Gûtirî oogo tûkoona muntû mûrûme wa gûtûgûra gûntû gûkû. Na baaba n'we n'agûkûra. 32 Ga tûmûkundie ndibei atogoone, rîru tûmaame n'we, na tûgîe twana n'we.” 33 Ûtugû bûbu bamwaa ndibei aanyua, na mwarî ûra mûkûrû aamaama n'we, îndî wana ataamenya wegua n'aarî oogo n'ûntû naatogooneete mûno.
34 Rûûni, mwarî ûra mûkûrû eera mwaragina ûra mûniini, “I ndaramaamire na baaba ûtugû. Ga tûmûkundie ndibei kaîrî îmunthî ûtugû, kaingo ûmaama n'we, na twinthe tûûmbe kûgîa na twana.” 35 Kwoogu ûtugû bûbu baakuundia îthe ndibei kaîrî, na mwarî ûra mûniini aathûûngîra aamaama n'we. Îndî wanarîo ataûmba kûmenya wegua n'aarî oogo n'ûntû n'anyuîte mûno. 36 Kwoogu aarî ba Rooti barî baîrî bairwa nda n'îthe.