Mwathani aacookeeria wîrane bwake bwa kûneenkera Îburaîmu kaana ga kaîyî
18
1 Mwathani aumîîra Îburaîmu kaîrî akari mîpuruuni ya Mamure, arî mwîrîgaani wa îrema rîake mûthenya gatî. 2 Îburaîmu aûkîîria meetho, oona antû bathatû barûngi mbere yake. Akûboona, aûkîîra aathi kûbathagaana, eendamîîria ûthiû bwake nthî, 3 auga, “Mwathi wakwa, wegua i mboneete kwendeerwa meethooni maaku ingûkûûria ûtigaankûrûke niû mûruti ngûgî waku. 4 Ka bûreterwe tûûyî bûthambe magûrû, bûnogoke ruungu rwa mûtî ûyû. 5 Ka mbûthuuranîre twirio bûrîe bûgwate inya. Itû karangaani aaga mbere ya bûthi na mbere na rûgendo rwenu.” 6 Kwoogu Îburaîmu aathi nthûti îmwe îremaani eera Saara, “Thima mbakûri ithatû cia mûtu waku ûra mwega, na ûruge mîgaate.” 7 Rîru Îburaîmu augia naara ndîîthia ciarî aataara kayaû kaanoru eera mûruti ngûgî athi akathînje na mpwî. 8 Irio bikûbîa, aathûkia maguta na îria na nyama ira ciarî imbokie, aagaîra antû babu. Bakîrîa, Îburaîmu aabeeteereete agu ruungu rwa mîtî.9 Bamûûria, “Arîkû Saara, mwekûrû waku?”
Îburaîmu abacookeria, “Arî îremaani.”
10 Rîru ûmwe wao auga, “Kagiita ta gaka mwanka ûyu tûthiîte ngaacooka, na mwekûrû waku Saara akeegua arî na kaana ga kaîyî.”
Rîru Saara naathikîîrîîtie rwaria rûrû arî îremaani rîru rîarî waagu akubî. 11 Îburaîmu na Saara bonthe i baarî akûrû baakûûrûkûrû, na Saara n'akûrûkîîtie kagiita ga kûgîa na twana. 12 Kwoogu Saara aatheka na nkoro akîîbûûragia, “N'ata mwekûrû ûmûkûûrû ta niû, aûmba kûgîa na mwana? Na mûkûrû wakwa n'we nwabu akûrîîte?”
13 Mwathani aûria Îburaîmu, “I mbi n'ûntû Saara aatheka? I mbi n'ûntû akûûria na nkoro yake, ‘Mwekûrû ûmûkûûrû ta niû nwa agîe na mwana?’ 14 Kûrî ûntû bûûmo kîrî Mwathani? Bantû a mwanka ûmwe kuuma îîndî ûûgû, wa ta bûra ndakwîra, ngaacooka, na Saara akeegua arî na kaana ga kaîyî.” 15 Saara aamaka, kwoogu aarongoa auga, “Ntiratheka.”
Îndî amwîra, “N'ûthekire.”
Îburaîmu eerekanîra Sondomu
16 Rîra antû bara baûkîîre bathiîte, baaraitha mwîndamo bwa Sondomu, na Îburaîmu aathiiyania nabo abaumagarîîtie.
17 Rîru Mwathani auga, “Nwa mbithe Îburaîmu mûbango wakwa? 18 Na n'ûntû nciarwa cia Îburaîmu igaatuîka mûgongo ûmûnene na ûrî na inya, na mîgongo yonthe ya nthîgûrû îkaathaarimwa gûkûrûkîîra we. 19 Mmûthuurîîte kaingo atongoreeria nthaka ciake na mîciî yao kwaiga njîra ya Mwathani na kûrûtha bûra kûbatîîrue na ûmma. Rîru mmûrûthîre bunthe bûra mmwîrîîte.” 20 Kwoogu Mwathani eera Îburaîmu, “Iimbîgîîtue antû ba Sondomu na Ngomoora i bathûûkîîte mûno, na barûthaga moothûûku akî. 21 I ka mbîndamîîte kwona wegua mantû mamu i ma ûmma kana i ma ûrongo. Rîru mmenye.”
22 Antû babu bangî baîrî baathi bwa Sondomu, îndî Mwathani aatigwa na Îburaîmu gwa kagiita gaakai. 23 Îburaîmu amûtherenjangîra amûûria, “N'ûkaathiria bara beega na baathûûku bonthe? 24 Ûkeethîrwa kûrî na antû mîrongo îtaano beega rî, ûkamîthiria, ûtiirekana n'yo n'ûntû bwa antû mîrongo îtaano beega babu barî ku? 25 Ûmma ûtirûtha ûntû ta bûbu, kûthiria bara batarî na mabîtia amwe na eeyia. Ûrûtha muntû ûmwega na mwîyia ûntû bûmwe i kî! Ûmma ûtirûtha ûgu! Anga mûgambithia wa nthîgûrû yonthe tika akaarûtha bûra kûbatîîrue?” 26 Na Mwathani auga, “Nkaaya kwona antû mîrongo îtaano baagîru ntûûra ya Sondomu, ntiithiria ntûûra înu n'ûntû bwao.”
27 Rîru Îburaîmu aaria kaîrî. Auga, “N'ûntû i mbaambîîrie, ka nthi na mbere kwaria na Mwathani wakwa, kinya wegua ntirî gîntû, ndî tîîri na muu. 28 Î ûkeegua barî mîrongo îna na bataano? Ûkaathiria ntûûra înu n'ûntû i bakûûra bataano?”
Na Mwathani auga, “Nkoona mîrongo îna na bataano ntimîthiria.”
29 Aaria n'we kaîrî, amwîra “Î ûkeegua barî mîrongo înna akî?” Aacookia, “Ûkeegua barî mîrongo înna ntimîthiria.” 30 Rîru auga, “Itû Mwathani ûtikaathûûre, ndakûûria n'ata ûkaarûtha wegua kûrî na antû mîrongo îthatû akî beega ntûûra înu.”
Mwathani acookia, “Nkaaya kwîthîra mîrongo îthatû, kinya rîo ntimîthiria.”
31 Îburaîmu aûria, “Ntibuîrîîte gûkûûria, Mwathani, ûkeethîra mîrongo îîrî akî n'ata ûrûtha?”
Na Mwathani auga, “N'ûntû bwa babu mîrongo îîrî ntimîthiria.”
32 Mûthiani, Îburaîmu auga, “Mwathani itû menya ûthûûra, ndaaria rîmwe kaîrî. Î ûkeethîra antû îkûmi akî beega noogo?”
Mwathani amwîra, “N'ûntû bwa antû babu îkûmi beega, wanarîo ntiithiria ntûûra înu.”
33 Nyuma ya kwaria na Îburaîmu, Mwathani aathi, na Îburaîmu aacooka mûciî.