Kîrîîkanîro gîa gûtaanwa
17
1 Aburamu arî na ûkûrû bwa mîanka mîrongo kenda na kenda, Mwathani amuumîîra amwîra, “I niû Ngai Mwene Inya; îthi na mbere kûmbathîkîra na kûrûtha bûra kûbatîîrue. 2 Nkaiga wîrane naawe, na ngakûthagayia nkûrûki.” 3 Agu, Aburamu eegwîthia nthî na ûthiû tîîriini. Rîru Ngai amwîra, 4 “Bûbû i bu wîrane bwakwa n'agwe, ngagûtuîkithia îthe wa mîgongo îmiingî. 5 Ûtiîtwa Aburamua kaîrî; ûgeetagwa Îburaîmu,b n'ûntû ûkeegua ûrî îthe wa mîgongo îmingî. 6 Ngaatûma wîgua ûrî na nciarwa imbingî, nkaarûtha mîgongo kuuma kîrî woû na anene.7 “Nkaagaiga kîrîîkanîro gîakwa naawe, na nciarwa ciaku ira ikaaya nyuma yaku, na nciarwa cia cio, kîîgue kîrî kîrîîkanîro gîa tene na tene, na nkeegua ndî Ngai waku na nciarwa ira ikaaya nyuma yaku. 8 Îî, ngakwaa amwe na nciarwa ciaku nthîgûrû îno ya Kanaani yonthe rûrî rûgai rwao tene na tene. Na nkeegagua ndî Ngai wao.”
9 Rîru Mwathani eera Îburaîmu, “Nwa mwanka waige kîrîîkanîro gîakwa, woû na nciarwa ira ikaaya nyuma n'ûntû bwa nthuke ira ikaaya. 10 Gîkî i kîo kîrîîkanîro gîakwa naawe na nciarwa ciaku, kîrîîkanîro kîra ûkaiga; Muntû mûrûme wonthe gatîgatî keenu nwa mwanka ataanwe; 11 gîkoonde kîa nyamba yake nwa mwanka kîgiitwe. Rûrû ûkeegua rûrî rwano rwa kîrîîkanîro gîakwa na biû. 12 Kaana konthe ga kaîyî nwa mwanka gataanwe ntugû ya inyanya, amwe na bara baciarîrîîtwe mûciî waku, kana bagûrîîtwe na mbeca kuuma ûgeniini bara batarî ba rûciaro rwaku. 13 Bonthe nwa mwanka bataanwe. Mîîrî yenu îkeegua îrî na rwano rwa kîrîîkanîro gîakwa gîa tene na tene. 14 Muntû mûrûme wonthe ûtarî mûtaane gîkonde kîa nyamba yake akaathûrwa kuuma kîrî antû baao; n'ûntû ûkeegua aunîîte kîrîîkanîro gîakwa.”
15 Na Ngai eera Îburaîmu, “N'we Sarai mwekûrû waku, ûtimwîta riîtwa rîake Sarai, îndî Saara i rîo ûkeegua rîrî riîtwa rîake. 16 Nkamûthaarima, na nkûrûki ya ûgu ngakwa kaana ga kaîyî gûkûrûkîîra we; nkamûthaarima, na agaatuîka gina wa mîgongo; anene ba antû bakauma kîrî we.” 17 Rîru Îburaîmu eegwîthia nthî na ûthiû na aatheka, na eebîîra, “Muntû arî na mîanka îgana nwa aciare mwana? Saara, ûra arî na ûkûrû bwa mîanka mîrongo kenda nwa aciare mwana?” 18 Na Îburaîmu eera Mwathani, “Bwabua wîtîgîîrîîtie wîrane bûbu bûkathi kîrî Isumairi.”
19 Îndî Ngai amûcookeria, “Saara, mwekûrû waku, agagûciarîra kaana ga kaîyî. Ûgageeta Isaka.c Na nkaiga kîrîîkanîro gîakwa gîa gûtûûra n'we amwe na nciarwa ciake. 20 Mantû ma Isumairi, nkamûthaarima kinya we, wa ta ûgu waûria. Ngaatûma athagaya na atuîka mûgongo ûmûnene. Anene îkûmi na baîrî bakauma kîrî we. 21 Îndî nkaûyûria kîrîîkanîro gîakwa na Isaka, ûra Saara agaagûciarîra kagiita ta gaka mwanka ûyu tûthiîte.”
22 Ngai akûrîîkia kwaria na Îburaîmu, auma ara aarî. 23 Rîru Îburaîmu aathûkia Isumairi mwana wake na nkombo cionthe ira ciaciarîrîîtwe mûciî wake kana ira ciagûrîîtwe na mbia, muntû mûrûme wonthe wa mûciî wa Îburaîmu, na abataana ikonde bia nyamba cia mîîrî yao ntugû wa înu, wa ta bûra Ngai aarî akûmwîra. 24 Îburaîmu aarî na ûkûrû bwa mîanka mîrongo kenda na kenda agîtaanwa. 25 Na Isumairi mwana wake aarî na ûkûrû bwa mîanka îkûmi na îthatû agîtaanwa. 26 Barî baîrî baataanirwe ntugû îmwe, 27 amwe na antû arûme bara bangî bonthe na twîyî twa mûciî ûyu, barî ba gûciarîrwa ku kana aruti ngûgî ba kûgûrwa na mbia.