Agari na Isumairi
16
1 Sarai, mwekûrû wa Aburamu, ataarî akûgîa na twana. N'arî na mûruti ngûgî wake, mwarî Mûmiisiri eetagwa Agari. 2 Sarai eera Aburamu, “Mwathani n'angirîîtie kûgîa na twana. Îthi ûmaame na mûruti ngûgî wakwa. Ndaûmba kûgîa na aana gûkûrûkîîra we.” Na Aburamu eetîgîîria. 3 Kwoogu Sarai, mwekûrû wa Aburamu, aathûkia Agari ûra Mûmiisiri mûruti ngûgî na amûneenkanîra kîrî Aburamu ta mwekûrû wake wa baîrî. Bûbû bwakarîkire nyuma ya mîanka îkûmi kuuma Aburamu agûkinya nthîgûrû ya Kanaani.4 Kwoogu Aburamu amaama na Agari, na aagîa nda. Rîra Agari aamenyire n'ûmûrito, aambîîria gûcambîîria Sarai mûnene wake. 5 Rîru Sarai eera Aburamu, “I woû ûgûtûma Agari aanyûrûnta! Îîndî mûruti ngûgî ûyû wakwa arî na nda, na n'akûmbûthîîria, wana wethîrwa i niû ndaamwere kaanya ga kûmaama naawe. Mwathani agatûgiitîra îgamba tûmenye gatî ka woû na niû n'ûû abîtîîtie!”
6 Aburamu acookia, “N'ûntû i mûruti ngûgî waku, nwa ûrûthe n'we bûra ûkwenda.” Kwoogu Sarai ainyîîria Agari, mwanka aatoorooka.
7 Mûraîka wa Mwathani oona Agari arî rûteere rwa kîthima rwanda barabaraani ya kûthi Suri. 8 Mûraîka amûûria, “Agari, mûruti ngûgî wa Sarai, i kû uumîîte, na i kû ûthiîte?”
Aacookia, “Ga nkuthûkîîte mûnene wakwa.”
9 Rîru Mûraîka wa Mwathani amwîra, “Cooka kîrî mwekûrû ûra mwathi waku na ûmwathîkagîre.” 10 Mûraîka wa Mwathani amwîra kaîrî, “Ngakûnenkera nciarwa imbingî bûra itaûmba gûtarîka. 11 Îîndî ûgu, ûrî na nda na ûgaaciara kaana ga kaîyî. Ûgageeta Isumairi,a n'ûntû Mwathani n'egîîtue kîrîro gîaku. 12 Îndî mwana ûyû waku, akeegua akari ta îng'ooi rîa kîthaka, akîrûaga na muntû wonthe, muntû wonthe akîrûaga n'we na agaatûûra kûûraaya na antû baao.”
13 Agari eeta Mwathani ûra aamwarîrîîtie, “Ngai ûra aambonaga,” n'ûntû augire, “Nkwona ûra ambonaga!” 14 I kîo gîatûmire kîthima gîku gîîtwa Beeri-Raai-Roi.b Wana îîndî kîrî gatîgatî ga Kandesi na Berendi.