Kîrîîkanîro kîa Ngai na Aburamu
15
1 Nyumaani Mwathani aarîria Aburamu ndeeni ya kîoneki amwîra, “Ûtikaamake, Aburamu, n'ûntû ngakûmenyeera, na kîewa gîaku gîkeegua kîrî kîînene.”2 Îndî Aburamu acookia, “Îî Mwathani Mwene Inya, ithaarimo biaku bionthe birî na wega bûrîkû kîrî niû rîra ntarî nwa mwana? N'ûntû ntirî na mwana, Erieseri wa Ndamasiki, mûruti ngûgî wa mûciî wakwa, n'we ngaatigîra ûtonga bwakwa bunthe. 3 Gûtirî aana wampa, kwoogu ûmwe wa aruti ngûgî baakwa nwa atuîkire mûrîokua wakwa.”
4 Rîru Mwathani amwîra, “Arî, mûruti ngûgî waku t'we agaatuîka mûrîokua waku, n'ûntû ûkaagîa na kaana ga kaîyî gaaku wengwa kara ûgaatigîra bira bionthe ûrî nabio.” 5 Rîru Mwathani aruta Aburamu ome amwîra, “Raitha îgûrû, na ûtare nthata wegua ûkaûmba. Nciarwa ciaku ûkeegua ikari ûgu, ikeegua irî mbingî mûno itatarîka!” 6 Na Aburamu n'etîgîîtie Mwathani. Mwathani aamûthûkiirie arî muntû ûmwagîru n'ûntû bwa wîtîgio bwake. 7 Rîru Mwathani amwîra, “I niû Mwathani ûra aakûrutire Uri ya Akarindea nkûnenkera nthî îno.”
8 Îndî Aburamu aûria, “Îî Mwathani Mwene Inya, n'ata nkaamenya nkeegwatîra yoo?” 9 Rîru Mwathani amwîra, “Ndetera moori ya ûkûrû bwa mîanka îthatû, mparika ya ûkûrû bwa mîanka îthatû, ntûrûme ya ûkûrû bwa mîanka îthatû, îcea na kiunga gîa îcea.” 10 Aburamu aareetera Ngai nyamû inu, acigiitania nucu, nucu, na aiga icuncî bibu biraithanîîte birî raini ciîrî; îndî ataagiitania nyoni. 11 Ndiiû ciendama kûrîa biimba bibu, îndî Aburamu aciîngatia. 12 Ûgorooni bûbu, riûa rîkîthûa, Aburamu amaama toro îndito. Oona kîoneki gîa kûmakania kîa mwindu wamûkunîkîra.
13 Rîru Mwathani amwîra, “Wîtîgie nciarwa ciaku ikeegua irî ageni ndeeni ya nthîgûrû îngeni, na bakainyîîrua barî nkombo gwa kagiita ka mîanka magana mana. 14 Îndî nkaanenkera nthîgûrû îra bagaatûmîkîra barî nkombo îkaanûkia, na nyumaani bakauma ku na ûtonga bûûnene. 15 Îndî woû, ûgatûûra mîanka îmiingî ûcooke ûkue na ûkiri. 16 Rûciaro rwaku rwa inya i ru rûgaacooka aaga; n'ûntû meeyia ma Amori makeegua marî maingî mûno bûra ntatîîra kûbakaanûkia.”
17 Riûa rîkûthûa na kwagîa mwindu, Aburamu oona karongorongo ga ntoogo na kîmonjo biagiitîîra gatîgatî ka inucu bira bia biimba. 18 Kwoogu Mwathani aiga wîrane na Aburamu ntugû înu amwîra, “Nkûnenkanîra nthîgûrû îno kîrî nciarwa ciaku, kuuma mwankaani wa Miisiri mwanka muuro wa Yufîrîti, 19 amwe na nthîgûrû cia Akeni, Akenisi, Akandimoni, 20 Aiti, Aperisi, Arefaimu, 21 Amori, Akanaani, Angirigasi, na Anjebusi.”