Aburamu oonokia Rooti
14
1 Ntugûûni cia Amuraferi mûnene wa Sinari, Arioki mûnene wa Erasari, Kendoriraomeri, mûnene wa Eramu, na Tindari mûnene wa Goiimu, 2 anene baba baarûa na Bera mûnene wa Sondomu, Birisa mûnene wa Ngomoora, Sinabu mûnene wa Andima, Semeberi mûnene wa Seboiimu, na mûnene wa Mbera, t'yo Soari. 3 Na baba bonthe baakomana kîbondeeni gîa Sindimu (ta kîo, îria rîa mwonyo). 4 Kagiita ka mîanka îkûmi na îîrî beethîrîîtwe bagîtûmîkîra Kendoriraomeri, îndî mwankaani wa îkûmi na îthatû baûmia biongo. 5 Mwankaani wa îkûmi na înna Kendoriraomeri na anene bara baarî n'we baaya na baaturîra Refaimu ndeeni ya Asiterothi-Karinaimu, Susimu ndeeni ya Amu, Emimu ndeeni ya Sabe Kiriathaimu, 6 na Aori kîrîmaani gîa Seiri mwanka kûraaya naara Eri Parani mwankaani wa rwanda. 7 Rîru baathiûrûûka Eni-Misipati (îra îîndî îîtagwa Kandesi) na baathiria Aamareki, na kinya Amori bara baatwîre Asasoni Tamari.8 Îndî îîndî njûûrî ya anene ba Sondomu, Ngomoora, Andima, Seboiimu, na Mbera (îîndî îîtagwa Soari) baabanga ndûa kîbondeeni kîa îria rîîkuû, 9 barûa na mûnene Kendoriraomeri wa Eramu, Tindari mûnene wa Goiimu, Amuraferi mûnene wa Sinari na Arioki mûnene wa Erasari, anene bana kîrî anene bataano. 10 Rîru kîbonde gîa Sindimu kîaûyûri marinya ma rami. Na wa ta bûra njûûrî cia anene ba Sondomu na Ngomoora baakuthûkîîte, bamwe baabaratia baagwa marinyaani mamu, bara baangî baakuthûkîra irîmaani. 11 Kwoogu anthû baathûkia into na ûtonga bunthe bwa Sondomu na Ngomoora, beethiîra; 12 baathûkia kinya Rooti, mwana wa mûruagina wa Aburamu, ûra aatwîre Sondomu, na into biake, na baathi.
13 Muntû ûmwe ûra aarî agûtoorooka kuuma ndûani înu aaya, eera Aburamu ûra Mûibirania, ûra aatûûraga akubî na mîpuru ya Mamure Mûamori, mûruagina wa Esikori na Aneri; baba bonthe baarî ûnyaanya na Aburamu. 14 Rîra Aburamu aamenyire Rooti n'agwatirwe, eeta antû arûme bara baaciarîrîîtwe mûciî wake, magana mathatû ma îkûmi na banaana bonthe abeethîrania amwe. Eengana na njûûrî ya Kendoriraomeri mwanka abagwatagwatîra Ndani. 15 Na ûtugû Aburamu agaania njûûrî yake, we na aruti ngûgî baake, abaithûkîra na abeengatia mwanka Oba, rûteere rwa îgûrû rwa Ndamasiki. 16 Aburamu na antû baao boona into bionthe bira biarî bikûthûkua, mwana wa mûruagina wa Aburamu Rooti amwe na into biake, na eekûrû bonthe na nkombo ira ingî.
Aburamu aathaarimwa i Merikisendeki
17 Nyuma ya gûcooka gwake aumîîte gûtura Kendoriraomeri na anene bara baarî n'we, mûnene wa Sondomu aumagarûka aathi gûkomana n'we kîbondeeni kîa Sabe (gîku i kîo, kîbonde kîa mûnene). 18 Na Merikisendeki mûnene wa Saremu aareeta mûgaate na ndibei, n'we aarî mûthînjîri wa Ngai Ûra Arî Îgûrû Mûno. 19 Na amûthaarima auga,
“Aburamu ûrothaarimwa i Ngai Ûra Arî Îgûrû Mûno,
mûûmbi wa îgûrû na nthî,
20 arookumua Ngai Ûra Arî Îgûrû Mûno,
ûra aapeeyana anthû baaku njaraani ciaku!”
Aburamu amwaa gîcuncî gîa îkûmi gîa into bionthe. 21 Rîru mûnene wa Sondomu eera Aburamu, “Nenkera antû, îndî woû ûthûkie into.” 22 Îndî Aburamu eera mûnene wa Sondomu, “I nthiîtîîtie kîrî Mwathani Ngai Ûra Arî Îgûrû Mûno, mûûmbi wa îgûrû na nthî, 23 ntikaathûkie rûrigi kana kîraatû kana gîntû gîaku nwa kîrîkû, ûûya kuuga, ‘I ndaratongiirie Aburamu.’ 24 Gûtirî kîo nkaathûkia îndî ka rûgai rwakwa rwîgue rûrî bira nthaka ciarîa, na rûgai rwa nthaka ira ciathiire naani; ka Aneri, Esikori, na Mamure bathûkie rûgai rwao.”