Aburamu na Rooti baathûkana
13
1 Aburamu na Sarai baathûkia bionthe bira baarî nabio bauma Miisiri baathi Negebu. Rooti aathiiyania nabo.2 Aburamu naarî ûmûtongu mûno. N'aarî na ng'ombe, ng'ondu, na mbûri na n'aarî na thaabu na fetha. 3 Rîru baathi mbere na rûgendo kuuma Negebu bathiîte bwa Betheri, bantû ara aarî gatîgatî ka Betheri na Ai ara baambire marema. 4 Aaga noogo Aburamu aakîîte kîthînjîro, na aagoongera Mwathani oogo kaîrî.
5 Îîndî Rooti, ûra aathiiyanîîtie na Aburamu, kinya we n'aarî ûmûtongu mûno. N'aarî na ng'ondu, ng'ombe, na marema maingî. 6 Îndî nthîgûrû înu îtikîûmba kûbaiga barî amwe, n'ûntû into biao i biarî bikwingîa mûno bûra bataayaga kûûmba gûkaranîîra amwe. 7 Na gîtuma gîaûka gatîgatî ka arîîthi ba Aburamu na ba Rooti. Akanaani na Aperisi wana bo i baatûûraga nthîgûrû înu kagiitaani gaku.
8 Kwoogu Aburamu eera Rooti, “Menya wîgua kûrî na matheta gatîgatî gaaku na niû, kana ka arîîthi baaku na baakwa, n'ûntû tûrî antû bamwe. 9 Anga nthîgûrû îno yonthe îtirî mbere yaku? Ga tûtigane. Wegua ûkaathi bwa ûmotho, nkaathi bwa ûrîo, wathi bwa ûrîo nthi bwa ûmotho.”
10 Rooti araitha bwa îgûrû oona kîbonde kîa Njorondani kûthi mwanka Soari i kîarî kîîririmu bwega ta mûnda wa Mwathani kana nthîgûrû ya Miisiri, (Îno i mbere Mwathani athiria Sondomu na Ngomoora.) 11 Kwoogu Rooti eethuurîra kîbonde kîa Njorondani kîonthe, na aathi bwa uumîîro bwa riûa, rîru baathûkana. 12 Aburamu atûûra nthî ya Kanaani, Rooti n'we atûûranîîra na ntûûra ira ciarî kîbondeeni na aathiiyangia marema maake mwanka Sondomu. 13 Îndî antû ba Sondomu baarî baathûûku, na i beeyagia mûno mbere ya Mwathani.
Aburamu aathi bwa Eburoni
14 Nyuma ya Aburamu na Rooti bagûtigana, Mwathani eera Aburamu, “Raitha bwa îgûrû, bwa iti, uumîîro bwa riûa, na ûthwîro bwa riûa. 15 Ngakûnenkera nthîgûrû înu yonthe ûkwona, woû amwe na nciarwa ciaku. Îkeethîrwa îrî yao tene na tene! 16 Ngakûnenkera nciarwa inyingî ta tîîri ya nthîgûrû, baingîe mûno bûra bataûmba gûtarîka! 17 Ûkîîra, wangaange nteere cionthe wone nthîgûrû îîngeni îra ngaakwa.” 18 Kwoogu Aburamu aathûkia marema maake, na aathi gûtûûra akubî na mîpuru îra mînene ya Mamure îra îrî Eburoni, naara aakîîre Mwathani kîthînjîro.