Aburamu aathuurwa i Ngai
12
1 Mwathani eera Aburamu, “Thaama nthîgûrû yenu, ûtige antû beenu, na mûciî wa abaagu, ûthi nthîgûrû îra ngaakwonia. 2 Ngagûtuîkithia îthe wa mûgongo ûmûnene. Ngakûthaarima na ntûme wîgua ûrî na îgweta, na ûgaatuîka kîthaarimo kîrî bara bangî. 3 Nkaathaarima bara bakûthaarimaga na ndume bara bakûrumaga. Nthîgûrû yonthe îkaathaarimwa gûkûrûkîîra woû.”4 Aburamu aathi wa ta bûra Mwathani aamwathîîte, na Rooti aathiiyania n'we. Aburamu aarî na ûkûrû bwa mîanka mîrongo mûgwanja na îtaano akiuma Arani. 5 Aburamu athûkiirie mwekûrû wake Sarai, mwana wa mûruagina Rooti, na ûtonga bwao bunthe bûra baarî bagûcûa, na antû bara baarî kûgîa nabo barî Arani; na baumagarûka baathi nthî ya Kanaani. 6 Baagiitanîîrîîtie Kanaani, baakinya bantû akubî na Sekemu baamba marema rûteere rwa Mûpuru wa More. Kagiitaani gaku, Akanaani nwa baatwîre ku.
7 Rîru Mwathani aumîîra Aburamu amwîra, “Nkaanenkera nciarwa ciaku nthîgûrû îno.” Kwoogu aakîra Mwathani ûra aarî akûmuumîîra kîthînjîro. 8 Nyuma ya ûgu, Aburamu aathi bwa iti aamba marema nthîgûrû ya irîma gatîgatî ka Betheri rûteere rwa ûthwîro bwa riûa na Ai rûteere rwa uumîîro bwa riûa. Aaka kîthînjîro agu na aagonga Mwathani. 9 Rîru Aburamu aathi bwa iti, athiîte bwa Negebu.
Aburamu na Sarai barî Miisiri
10 Kagiita kamwe i kwarî na yûûra rîînene nthîgûrû ya Kanaani. Kwoogu Aburamu eendama Miisiri gûkarakara noogo rîkûrûka. 11 Arî akubî gûkinya mwankaani wa Miisiri, Aburamu eera Sarai, “Ûrî mwekûrû ûmûthongi mûno. 12 Rîra Amiisiri bagaakwona, bakauga, ‘Ûyû i mwekûrû wake. Ga tûmûûrage, rîru tûmûthûkie!’ 13 Uuge ûrî mwarayia, kaingo nkaathûkua bwega n'ûntû bwaku na mûtûûrîre wakwa ûkoonokua n'ûntû bwaku.”
14 Ûmma buru, rîra baakinyire Miisiri, muntû wonthe aaragia mantû ma ûthongi bwa Sarai. 15 Rîra aruti ngûgî ba Faraû baamwonire, baanjîîria kûmûkumia kîrî Faraû, na airwa nyomba yake ya ûnene. 16 Na n'ûntû bwake aamenyeera Aburamu bwega; na eewa ng'ondu, ng'ombe, mang'ooi ma ncamba na ma nka, aruti ngûgî ba aka na antû arûme na nkamîîra.
17 Îndî Mwathani atûma mîrimo îgûrû rîa mûciî wa Faraû n'ûntû bwa Sarai, mwekûrû wa Aburamu. 18 Kwoogu Faraû eeta Aburamu, amûûria, “I mbi îno wandûthîra ûûgû? I mbi n'ûntû ûtaambîîra aarî mwekûrû waku? 19 I mbi n'ûntû waambîîrire i mwaranyûkwe, na wetîgîîria ndamûthûkia ta mwekûrû wakwa? Îîndî thûkia mwekûrû waku, na ûthi!” 20 Na Faraû eera antû baake barekeerie Aburamu na Sarai bathûkie into biao na bathi.