Mûnaara wa Baberi
11
1 Mbereeni, nthîgûrû yonthe yaaragia rwaria rûmwe na Yatûmagîra mûgambo ûmwe. 2 Na wa bûra antû baathaamaga kuuma uumîîro bwa riûa, boona nthî îmbaranîru ya Sinari baatûûra oogo. 3 Rîru beerana, “Ncûûni tûûmbe matubaarî na tûmabîîthie bwega.” Baatûmagîra matubaarî bantû a maiga, na rami ta cimiti. 4 Rîru bauga, “Ncûûni, twîbakîre ntûûra, na mûnaara ûmûraaya ûkinyîîte îgûrû matuuni, na twîrûthîre riîtwa, kaingo tûtakînyagaara nthîgûrû yonthe.” 5 Na Mwathani endama kwona ntûûra na mûnaara ûyu antû baakaga. 6 Na Mwathani auga, “Raitha, n'antû bamwe, na bonthe barîaria rwaria rûmwe; na ûyû i mwanjîîrio wa mara bakaarûtha; na gûtirî bu bakaabanga kûrûtha baremwa. 7 Ncûûni, twîndame, na tûrigicanie rwaria rwao, kaingo batagwatanîra rwariani.” 8 Kwoogu Mwathani abanyagaaria kuuma agu baathi nthîgûrû yonthe, na baatigana na gwaka ntûûra. 9 N'ûntû bwa gîtûmi gîku ntûûra înu yetwa Baberi,a n'ûntû agu noogo Mwathani arigicanîîrie rwaria rwa nthîgûrû yonthe; na kuuma agu Mwathani abanyagaaria nthîgûrû yonthe.Kuuma Semu kûthi Aburamu
(1Karaaya 1:24-27)
10 Ino i cio nciarwa cia Semu. Rîra aakinyithiirie ûkûrû bwa mîanka îgana rîmwe, aaciara Aripakisandi nyuma ya mîanka îîrî kuuma kagiita ga îkondoria. 11 Semu aatûûrire mîanka magana mataano, nyuma ya gûciarwa kwa Aripakisandi, na aagea na aana bangî ba nthaka na aarî.
12 Aripakisandi aaciara Sera arî na ûkûrû bwa mîanka mîrongo îthatû na îtaano. 13 Aripakisandi aatûûrire mîanka magana mana na îthatû nyuma ya gûciarwa wa Sera, na aagea na aana bangî ba nthaka na aarî.
14 Sera arî na ûkûrû bwa mîanka mîrongo îthatû, aagea na Eberi. 15 Na nyuma ya Eberi agûciarwa, Sera atûûra mîanka magana mana na îthatû, na aagîa na bangî ba nthaka na aarî.
16 Rîra Eberi aakinyiirie ûkûrû bwa mîanka mîrongo îthatû na îna, aagîa na mwana wake Peregi. 17 Nyuma ya gûciarwa gwa Peregi, Eberi atûûra mîanka îngî magana mana ma mîrongo îthatû, na aagîa na aana bangî ba nthaka na aarî.
18 Peregi arî na ûkûrû bwa mîanka mîrongo îthatû, aagîa na mwana wake Reu. 19 Nyuma ya gûciarwa kwa Reu Peregi atûûra mîanka magana maîrî na kenda na aagîa na aana bangî ba nthaka na aarî.
20 Reu arî na ûkûrû bwa mîanka mîrongo îthatû na îîrî n'aagîîre na mwana wake Serugi. 21 Reu agûciara Serugi, atûûra mîanka îîngî magana maîrî na mûgwanja na aagîa na aana bangî ba nthaka na aarî.
22 Serugi arî na ûkûrû bwa mîanka mîrongo îthatû, aagîa na Naori. 23 Nyuma ya gûciarwa kwa Naori, Serugi atûûra mîanka îngî magana maîrî na aagîa na aana bangî ba nthaka na aarî.
24 Rîra Naori aarî na ûkûrû bwa mîanka mîrongo îîrî na kenda, aagîa na mwana wake Tera. 25 Nyuma ya gûciarwa gwa Tera, Naori atûûra mîanka îgana na îkûmi na kenda na aagîa na aana bangî ba nthaka na aarî.
26 Tera arî na ûkûrû bwa mîanka mîrongo mûgwanja, aagîa na Aburamu, Naori, na Arani.
Nciarwa cia Tera
27 Ino i cio nciarwa cia Tera. Tera aarî îthe wa Aburamu, Naori, na Arani. Arani aarî îthe wa Rooti. 28 Arani aakuire mbere ya îthe Tera akua arî nthîgûrû îra aaciarîîrwe, Uri ya Akarindea. 29 Na Aburamu na Naori baagûrana, mwekûrû wa Aburamu eetagwa Sarai, na mwekûrû wa Naori eetagwa Mirika, (Mirika na mwaragina Isika baarî aarî ba Arani mûruagina wa Naori.) 30 Sarai aarî nthaata, ataarî na kaana.