Kîrîîkanîro kîa Ngai na Nuu
9
1 Ngai athaarima Nuu na nthaka ciake abeera, “Thagayaani na bwingîe bûûyûrie nthîgûrû. 2 Nyamû cionthe, nyoni cionthe, na makûyû monthe, ikabûkuthûka na ibwîgague ûguaya. Cionthe ikeegua irî ruungu rwa watho bwenu. 3 Nyamû cionthe ikeegua irî irio bienu, bira ndabûnenkera wa ta bûra ndaabûnenkeere imera birî biakûrîa bienu. 4 Îndî bûtikaarîyanîrie nyamû na nthakame, n'ûntû mwoyo ûkaraga nthakameeni. 5 Ngaakaanûkia ûra akaûragana. Nyamû ira ciûragaga antû nwa mwanka ciûragwe. Na muntû wonthe ûra akaûragana nwa mwanka aûragwe. 6 Muntû ûra akaûragana n'we n'akaûragwa n'antû n'ûntû antû baûmbirwe na mûbuanaano wa Ngai. 7 Naabi, thagayaani na bwingîe, ciaranaani na bwingîe nthîgûrû.”8 Rîru Ngai eera Nuu na nthaka ciake, 9 “I nkwaiga kîrîîkanîro gîakwa naabi na nciarwa cienu ira ikeegua irî nyuma yenu, 10 na nyamû cionthe irî mwoyo, nyoni, nyamû cia ndîîthia na cia kîthaka ira bûrî nacio, cionthe ira bwaumire nacio cabinaani. 11 I nkûrikia kîrîîkanîro gîkî gîakwa atî gûtikooroîthîrwa îgiita rîngî rîra nyamû cionthe irî mwoyo ikaathirua na rûûyî rwa îkondoria. Gûtikooroîthîrwa îkondoria rîa kûthiria nthîgûrû kaîrî.” 12 Ngai auga, “Rûrû i ru rwano rwa kîrîîkanîro kîra nkwaiga gatîgatî gaakwa naabi na nyamû cionthe ira irî mwoyo, na nthuke cionthe ira ikaaya: 13 I nkwaiga mûkûngambura matuuni na n'uu ûkeegua ûrî kîrîîkanîro gatîgatî gaakwa na nthîgûrû. 14 Rîra ndaareeta matu îgûrû rîa nthîgûrû na mûkûûngambura nau wonekane matuuni, 15 nkaaririkana kîrîîkanîro kîra kîrî gatîgatî gaakwa naabi na nyamû cionthe ira irî mwoyo. Na gûtirî rîo kaîrî rûûyî rûgaatuîka îkondoria rîînene rîa kûthiria into bionthe bira birî mwoyo. 16 Rîra mûkûngambura wonekana matuuni, ngacuona ndirikane kîrîîkanîro gîa tene na tene gatîgatî ka Ngai na into bionthe nthîgûrû bira birî mwoyo.” 17 Kwoogu Ngai eera Nuu, “Rûrû i rwano rwa kîrîîkanîro kîra twarîîkanîra gatîgatî gaakwa na into bionthe nthîgûrû bira birî mwoyo.”
Nthaka cia Nuu
18 Nthaka cia Nuu ira ciaumire cabinaani ciarî Semu, Amu na Njafethi (Amu aarî îthe wa Kanaani.) 19 Ino i cio ciarî nthaka ithatû cia Nuu, na i kuuma kîrî cio antû baanyagaarire baakorokana nthîgûrû.
20 Nuu aarî mûrîmi na n'we aandire mûnda wa mîcabiibû. 21 Rîra aanyuire ndibei îmwe ya îra aarûthîîte, aatogoona aamaama îremaani rîake arî ûtheri. 22 Na Amu, îthe wa Kanaani, oona ûtheri bwa îthe auma nja eera aruagina barî baîrî. 23 Rîru Semu na Njafethi baathûkia cuka bamîtûûgîîria iturooni biao, baathûngîra îremaani rîru îthe aarî na kîmunyamunya. Baathi baaguîkîra ûtheri bwa îthe. Moothîu maao maûndûkîîte mbarî îra îîngî, kaingo batoona ûtheri bwa îthe.
“Kanaani n'ûmûrume,
agaatuîka nkombo ya ruungu buru
ya aruagina.”
26 Acooka auga,
“Mwathani Ngai wa Semu arookumua!
Kanaani n'we arootuîka nkombo yake.
27 Mwathani aroaramia mîanka ya Njafethi,
arootûûra maremaani ma Semu,a
na Kanaani arootuîka nkombo yake.”