Mwanjîîrio ûmûyerû
8
1 Îndî Ngai ataariganîrîîtue i Nuu na nyamû cionthe cia kîthaka na nyamû cionthe cia ndîîthia ira aarî nacio cabinaani. Aatûma ruuo rûbuutana îgûrû rîa nthî na îgûrû ya rûûyî, naru rûûyî rwanjîîria kûbwa. 2 Ithima bia nthîgûrû ruungu na ndirica cia îgûrû ciaingwa, mbura yakea. 3 Rûûyî rwanjîîria kûbwa mpoora. Nyuma ya ntugû îgana rîmwe na mîrongo îtaano kuuma îkondoria rîkwanjîîria, gwatuîka rûûyî i rûbweyangîîte rwendamaanga. 4 Na ntugû ya îkûmi na mûgwanja ya mweri wa mûgwanja cabina yatûûgîîra irîmaani bia Ararati îgûrû. 5 Rûûyî rwathi na mbere kûbwa, na ntugû ya mbere ya mweri wa îkûmi, tûthûmbîri twa irîma twanjîîria kwonekana.6 Nyuma ya ntugû mîrongo îna, Nuu aarugûra ndirica îra aarûthîîte cabinaani înu, 7 aatûma nkûngûrû nja. N'yo îtaacooka, yaakarire îkîriûngaga mwanka rîra rûûyî rwabweere. 8 Nuu aatûma îcea, rîona kana rûûyî i rwarî rûkûnyaara nthîgûrû. 9 Îndî îcea rîtoona bantû a gûkinya. Rîacooka kîrî Nuu cabinaani n'ûntû rûûyî nwa rwakunîkîîte nthîgûrû. Kwoogu aaruta njara nja, arîthagaana, arîthûûngîria cabinaani kûra aarî. 10 Nuu eeteera ntugû iingî mûgwanja, rîru aatûma îcea rîru kaîrî. 11 Îcea rîru rîacooka kîrî Nuu ûgoro bwa ntugû înu rîrî na kathangû kaîthî ka mûceituuni. Kwoogu Nuu aamenya atî rûûyî i rûbweyangîîte. 12 Aacooka eeteera ntugû iingî mûgwanja aatûma îcea rîru kaîrî. Îgiita rîrî, îcea rîtaacooka.
13 Nuu arî na mîanka magana mathanthatû na ûmwe, ntugû ya mbere ya mweri wa mbere, i rîo rûûyî rwabweere nthîgûrû. Nuu aimbûra cabina, aaraitha oona nthîgûrû n'înyaaru. 14 Ntugû ya mîrongo îîrî na mûgwanja ya mweri wa îîrî, nthîgûrû n'yarî îkûnyaara kûrû.
15 Ngai eera Nuu, 16 “Uma cabinaani na mwekûrû waku, na nthaka ciaku na eekûrû baao. 17 Uume na nyamû cionthe ira irî ndeeni ya cabina; nyoni, nyamû, na tûnyamû tûra twîkururagia, kaingo iciarana na îthagaya, inyagaara nthî yonthe.”
18 Kwoogu Nuu auma cabinaani na nthaka ciake, na mwekûrû wake na aka ba aana baake. 19 Na nyamû na nyoni cia mîthemba yonthe cionthe, ciauma cabinaani wa ira nyamû na mûthemba wacio.
Nuu aarutîra Mwathani Kîgongwana
20 Nuu aakîra Mwathani kîthînjîro, aathûkia nyamû na nyoni îmwe îmwe kuuma kîrî mîthemba yonthe îra îtarî mûgiro, aarutîra Mwathani cio irî kîgongwana, îgûrû rîa kîthînjîro gîku. 21 Na Mwathani agûkenua i mûcinko wa kîgongwana gîku auga na nkoro, “Ntikooro nduma nthîgûrû kaîrî n'ûntû bwa muntû, wana wegua mathûgaania maake meegagua marî maathûûku kuuma arî mwana. Na ntikooro nthiria into bira birî mwoyo kaîrî ta bûra ndararûthire.
22 Na rîonthe rîra nthîgûrû îkeegua îrî oogo,
maanda na maketha,
îgiita rîa mpîo na rîa mwathû,
kîathû na thaano
mûthenya na ûtugû
bigaatûûraga oogo.”