Maciaro ma ûthûûku
7
1 Mwathani eera Nuu ata rî, “Bûthûûngîre cabinaani, woû na mûciî waku, n'ûntû i mboneete bûrî baagîru mbere yakwa nthukeeni îno. 2 Ûthûkie nyamû ira itarî mûgiro mûgwanja mûgwanja ndûme na nka; na ira irî mûgiro ûthûkie ciîrî ciîrî ndûme na nka. 3 Wana nyoni cia îgûrû ûthûkie mûgwanja mûgwanja ndûme na nka kaingo mîthemba înu yacio îtikaûre îgûrû rîa nthîgûrû. 4 N'ûntû nyuma ya ntugû mûgwanja nkaurithia mbura nthîgûrû ntugû mîrongo îna, mûthenya na ûtugû, na into bionthe bira birî mwoyo bira ndaûmbire bikaathira.” 5 Nuu n'aarûthire mantû monthe mara Mwathani aamwathîîte.6 Nuu aarî na ûkûrû bwa mîanka magana mathanthatû îkondoria rîkîîya nthîgûrû. 7 Nuu na nthaka ciake, na mwekûrû wake na aka ba aana baake baathûngîîre cabinaani giria bakaathirua n'îkondoria. 8 Nyamû ira itarî mûgiro, ira irî mûgiro, nyoni, na tûnyamû tûra twîkururagia na nthî 9 ciathûûngîra na Nuu cabinaani ciîrî ciîrî, ndûme na nka, wa ta bûra Ngai aathîîte Nuu. 10 Na nyuma ya ntugû mûgwanja îkondoria rîaya nthîgûrû.
11 Gwakarîkire ûgu rîra Nuu aarî na ûkûrû bwa mîanka magana mathanthatû, ntugû ya îkûmi na mûgwanja ya mweri wa îîrî, i rîo ithima bia nthîgûrû ruungu biatûrîkire rûûyî na ndirica cia îgûrû ciarugûka. 12 Mbura yaura ntugû mîrongo îna, mûthenya na ûtugû. 13 Ntugû înu yongwa, îra mbura yanjîîrie kuura, Nuu na nthaka ciake; Semu, Amu na Njafethi, mwekûrû wa Nuu na eekûrû ba nthaka ciake baathûûngîra cabinaani. 14 Baathûngîîre bo na mîthemba yonthe ya nyamû cia kîthaka, mîthemba yonthe ya nyamû cia ndîîthia, mîthemba yonthe ya tûnyamû tûra twîkururagia, na mîthemba yonthe ya nyoni. 15 Nyamû cionthe irî mwoyo ciathûûngîîre ciîrî ciîrî cabinaani amwe na Nuu. 16 Woora mûthemba wa nyamû wathûngagîra ndûme na nka, ta bûra Mwathani aathîîte Nuu. Rîru Mwathani amwingîra cabinaani.
17 Mbura yathiire na mbere kuura ntugû mîrongo îna. Rûûyî rwongeereka rwereeria cabina. 18 Rûûyî rwathi na mbere kwongeereka nkûrûki, n'yo cabina nwaka yeereereete îgûrû ya rûûyî. 19 Rûûyî rûru rwaingîa na rwakunîka irîma bira biraaya bionthe. 20 Rwaingîa mûno mwanka rwathiîka irîma na nkûrûki ya biiti mîrongo îîrî. 21 Nyamû cionthe ira ciakuuyagia mîruke ciakua. Nyoni, nyamû cia ndîîthia, nyamû cia kîthaka, tûnyamû tunthe tûra twîkururagia, antû bonthe, 22 na nyamû cionthe ira itûûraga nthîgûrû îmbûmo ciakua. 23 Mwathani aathiria nyamû cionthe ira ciarî mwoyo nthîgûrû: Antû, nyamû, tûnyamû tûra twîkururagia na nyoni, cionthe ciathirua. Nuu wenka n'we aatigarire amwe na bara aarî nabo cabinaani.
24 Rûûyî rwa îkondoria rwakarire rwaragîîte nthîgûrû kagiita ga ntugû îgana na mîrongo îtaano.