Antû baatuîka baathûûku
6
1 Rîra antû baathiire na mbere kwingîa nthîgûrû na baagîa na aarî, 2 aana ba Ngaia i boonire aarî babu ba antû barî bathongi, na baathûkia bara beendaga baakara nabo ta eekûrû baao. 3 Rîru Ngai auga, “Kîrundu wakwa atiikaraga akîrûaga na muntû, kagiita kaaraaya mûno n'ûntû we i nthakame na nyama. Ûkûrû bwake bûkeegagua bûrî mîanka îgana na mîrongo îîrî.”4 Kagiitaani gaku na nyumaani, i kwarî antû baanene mûno beetagwa Anebiri baumanîîtie na aana ba Ngai baakarania na aarî ba antû baagîa aana nabo, baba i bo baarî ncamba cia tene, antû baarî îgweta.
5 Mwathani oona atî ûthûûku bwa muntû i bwarî bwingî mûno nthîgûrû na meerirîria na mathûgaania maake maarî maathûûku rîonthe. 6 Kwoogu Ngai eerira i mbi yatûmire aûmba muntû nthîgûrû, na eegua ûrûrû bûûnene nkorooni yake. 7 Kwoogu Mwathani auga, “Nkaathiria muntû ûra ndaûmbire aume îgûrû rîa nthîgûrû. Nkaathiria antû, nyamû, wana nyamû ira ciîkururagia na nyoni cia îgûrû, n'ûntû i nkwîrira i mbi yatûmire nciûmba.” 8 Îndî Nuu neendeerwe i Mwathani.
Nuu
9 Ino i cio nciarwa cia Nuu. Nuu aarî muntû ûmwagîru îgiitaani rîru. Nuu n'aathîkagîra Ngai. 10 Nuu aarî na nthaka ithatû: Semu, Amu na Njafethi.
11 Ngai oonaga nthîgûrû îrî nthûûku na yûûyûri ûremu na ûgîti. 12 Ngai araitha nthîgûrû oona n'înthûûku kûrû, n'ûntû wora muntû aarûthaga wa bûra akwenda.
13 Ngai eera Nuu, “Nkûbanga kûthiria antû bonthe, n'ûntû nthîgûrû yûûyûrîîte ûremu na ûgîti n'ûntû bwao. Nkabathiranîria amwe na nthîgûrû! 14 Kwoogu îîbakîre cabina na mbaaû cia mûtarakwa; ûgaûkanie tûnyomba cabinaani na ûmîthinge na rami nja na ndeeni. 15 Ûûgû i bu ûkamîaka; ûraaya bwa biiti magana mana ma mîrongo îtaano, wariî bwa biiti mîrongo mûgwanja na itaano, na kûthi îgûrû biiti mîrongo îna na itaano. 16 Ûtige mwanya wa biiti îmwe na nucu gatîgatî ka rûûgûrû na rûthiingo rwa cabina. Cabina înu îîgue îrî na ngoroba ithatû na îîgue îrî na mûrango rwaruuni rwayo. 17 N'ûntû nkaareeta îkondoria nthîgûrû rîa kûthiria into bionthe bira birî mwoyo nthîgûrû. Na gîntû kîonthe kîrî mwoyo nthîgûrû gîgaakua. 18 Îndî nkaarûtha kîrîîkanîro naawe. Ûkaathûngîra cabinaani woû amwe na mwekûrû waku, na nthaka ciaku na eekûrû baao. 19 Na ûthûngîrie cabinaani nyamû ciîrî ciîrî cia mîthemba yonthe nka na ndûme, giria igaakua. 20 Ûthûngîrie mîthemba yonthe ya nyoni, mîthemba yonthe ya nyamû, mîthemba yonthe ya tûnyamû tûra twîkururagia, wa ira nyamû ûthûngîrie ciîrî ciîrî, giria igaakua. 21 Kaîrî ûthûngîrie mîthemba yonthe ya irio bira birîîyagwa, ûbiaige. Bibi bikeegua birî irio biaku na nyamû inu.” 22 Nuu aarûtha wa bûra Mwathani aamwathîîte.