Rûrîîyo rwa Andamu
(1Karaaya 1:1-4)
5
1 Mama i mariîtwa ma nciarwa cia Andamu. Rîra Ngai aûmbire muntû, aamûûmbire abuaneene n'we. 2 Aûmbire muntû mûrûme na mûka abathaarima abeeta “Antû.” 3 Andamu aarî na ûkûrû bwa mîanka îgana rîa mîrongo îthatû mwana wake Sethi agîciarwa. 4 Mîanka îra Andamu aakarire nyuma ya akûgîa na Sethi i mîanka magana manaana. N'aagîîre na aana bangî ba aarî na ba antû arûme. 5 Andamu aakwire arî na mîanka magana kenda ma mîrongo îthatû.6 Sethi aarî na ûkûrû bwa mîanka îgana na îtaano, akîgîa na Enosi. 7 Nyuma ya kûgîa na Enosi, Sethi n'aakarire mîanka magana manaana na mûgwanja, na aagîa na aana bangî ba aarî na ba antû arûme. 8 Sethi aakwire arî na mîanka magana kenda ma îkûmi na îîrî.
9 Enosi aagîîre na Kenani arî na mîanka mîrongo kenda. 10 Nyuma ya kûgîa na Kenani, Enosi aakarire mîanka magana manaana ma îkûmi na îtaano, na aagîa na aana bangî ba antû arûme na ba aarî. 11 Enosi aakwire arî na mîanka magana kenda ma îtaano.
12 Kenani aarî na ûkûrû bwa mîanka mîrongo mûgwanja akîgîa na Maarareri. 13 Nyuma ya kûgîa na Maarareri, Kenani aakarire mîanka magana manaana ma mîrongo îna, na aagîa na aana bangî ba antû arûme na ba aarî. 14 Kenani aakwire arî na mîanka magana kenda ma îkûmi.
15 Maarareri aarî na ûkûrû bwa mîanka mîrongo îthanthatû na îtaano akîgîa na Njarendi. 16 Akûgîa na Njarendi, Maarareri aakarire mîanka magana manaana ma mîrongo îthatû, na aagîa na aana bangî ba antû arûme na ba aarî. 17 Maarareri aakwire arî na ûkûrû bwa mîanka magana manaana ma mîrongo kenda na îtaano.
18 Njarendi aarî na ûkûrû bwa mîanka îgana rîmwe rîa mîrongo îthanthatû na îîrî akîgîa na Enoku. 19 Akûgîa na Enoku, Njarendi aakarire mîanka magana manaana, na aagîa na aana bangî ba antû arûme na ba aarî. 20 Njarendi aakwire arî na ûkûrû bwa mîanka magana kenda ma mîrongo îthanthatû na îîrî.
21 Enoku aarî na ûkûrû bwa mîanka mîrongo îthanthatû na îtaano akîgîa na Methusera. 22 Nyuma ya kûgîa na Methusera, Enoku aathiiyaniirie na Ngai mîanka magana mathatû. Naagîîre na aana bangî ba antû arûme na ba aarî. 23 Kwoogu mîanka îra Enoku aatûûrire nthîgûrû i mîanka magana mathatû ma mîrongo îthanthatû na îtaano 24 Enoku n'aathiyaniirie na Ngai rîru aathi mwanka antû baatiga kûmwona, n'ûntû Ngai n'aamûthûkiirie.
25 Methusera arî na ûkûrû bwa mîanka îgana rîmwe rîa mîrongo înaana na mûgwanja, aagîa na Rameki. 26 Nyuma ya kûgîa na Rameki, Methusera aakarire mîanka magana mûgwanja ma mîrongo înaana na îîrî, na aagîa na aana bangî ba antû arûme na ba aarî. 27 Methusera aakwire arî na ûkûrû bwa mîanka magana kenda ma mîrongo îthanthatû na kenda.
28 Rameki aarî na ûkûrû bwa mîanka îgana rîmwe rîa mîrongo înaana na îîrî, rîra aagîîre na kaana ga kaîyî, 29 ageeta Nuua akiugaga, “Mwana ûyû n'we agaatûnogokia kuumania na gûtiira muuru gwetû nthîgûrû îno Mwathani Ngai aarumire.” 30 Nyuma ya kûgîa na Nuu, Rameki aakarire mîanka magana mataano ma mîrongo kenda na îtaano, na aagîa na aana bangî ba antû arûme na ba aarî. 31 Rameki aakwire arî na ûkûrû bwa mîanka magana mûgwanja ma mîrongo mûgwanja na mûgwanja.
32 Nyuma ya Nuu agûkinyithia mîanka magana mataano, i rîo aagîîre na Semu, Amu na Njafethi.