Kaini aûraga Abeeri
4
1 Rîru Andamu amaama na mwekûrû wake, aagîa nda aaciara Kaini. Awa auga, “Nkûgîaana kaana ga kaîyî gûkûrûkîîra ûteethio bwa Mwathani.” 2 Rîru rîngî aaciara kaana kangî ga kaîyî, Abeeri. Abeeri aarî mûrîîthi Kaini n'we aarî mûrîmi.3 Kagiita kamwe Kaini areeta maketha mamwe ma mbere maake kîrî Mwathani. 4 Abeeri n'we areeta mathuunya ma ntûrûme îra yarî gîtûra îria kîa ng'ondu îmwe yake. Mwathani aakenua n'Abeeri na kîgongwana gîake, 5 îndî ataakenua i Kaini na kîgongwana gîake. Kaini athûûra na aagwatwa i kîîthikîîro.
6 N'we Mwathani aûria Kaini, “I mbi îtûmîîte ûthûûra? I mbi n'ûntû ûrî na kîîthikîîro? 7 Ûkarûtha bwega rî, ûtiîtîgîîrîka? Îndî ûkarega kûrûtha bwega, menya wîyia i bûgûkabîrîte mwîrîgaani, i woû bûcereetie, îndî ûtikaareke bûgûcinda.”
8 Kagiita kamwe Kaini eera mûruagina Abeeri, “Tûthi mûndaani.” Na barî naagu mûndaani, Kaini aumbuthûkania na mûruagina Abeeri amûûraga. 9 Nyumaani Mwathani aûria Kaini, “Arîkû mûruanyûkwe Abeeri?” Kaini amûcookeria amwîra, “Ntiiyî! Ka ndî niû mûkaragia?” 10 Mwathani amûûria, “N'ata warûtha? Nthakame ya mûruanyûkwe n'îkûndîrîra îrî mûthetuuni. 11 Na îîndî ûrî ûmûrume na wengatua kuuma nthîgûrû îra înyuire nthakame ya mûruanyûkwe îra ûtûûrire. 12 Waarîma mûnda, ûtiiketha nwa mbi. Ûgaatuîka mbûrûûri, wereerage nthîgûrû îno.”
13 Kaini aacookeria Mwathani amwîra, “Îkaanûkia rîakwa rîkûnenea mûno bûra ntaûmba kûrîûmîîria. 14 Îmunthî ûkûûmbîngatia ndauma nthîgûrû îno, na ndauma ara ûrî. Ngaatuîka mbûrûûri nthîgûrû îno, na muntû wonthe ûra akaambona n'akambûraga.”
15 Mwathani amûcookeria amwîra, “Arî tibu! Muntû ûra akaûraga Kaini, akaarîua maita mûgwanja.b” Rîru Mwathani eekîra Kaini rwano kaingo ûra akaamwona atakîmûûraga. 16 Rîru Kaini auma agu Mwathani aarî aathi gûtûûra nthîgûrû ya Nondic rûteere rwa uumîîro bwa riûa bwa Endeni.
Rûciaro rwa Kaini
17 Kaini aamaama na mwekûrû wake, aagîa nda aaciara Enoku, na aaka taûni amîîta Enoku ta mwana ûyu wake. 18 Enoku aagîa na Irandi, Irandi aagîa na Meuyaeri, Meuyaeri aagîa na Methusaeri, n'we Methusaeri aagîa na Rameki. 19 Rameki aagûra eekûrû baîrî. Ûmwe eetagwa Anda na ûra ûngî n'we eetagwa Sira. 20 Anda aagîa na Njabari. Njabari n'we kîûyûûyû gîa antû bara batûûraga maremaani na barî na nyamû cia ndîîthia. 21 Mûruagina eetagwa Njubari. Njubari n'we kîûyûûyû gîa antû bonthe bara baringaga inaanda na mîtûûrirû. 22 Sira aagîa na Tubari-kaini, Tubari-kaini ûra aarî mûturi wa into bia rûthuku na îthaga. Mwaragina wa Tubari-kaini eetagwa Naama.
23 Rameki eera eekûrû baake,
“Anda na Sira ta nthikîîriani;
biû eekûrû ba Rameki îguani bûra nkûbwîra;
nkûûraga muntû n'ûntû bwa kûûnguraria
ndaûraga nthaka n'ûntû bwa kûndiinga.
24 Ûkeegua ûra akaûraga Kaini akaarîua maita mûgwanja,
na mma ûra akaûraga Rameki akaarîua maita mîrongo mûgwanja na mûgwanja.”
Gûciarwa wa Sethi
25 Andamu aamaama na mwekûrû wake kaîrî aagîa na kaana ga kaîyî, geetwa Sethid n'ûntû Awa augire, “Ngai agûmpa kaana kangî bantûûni a Abeeri ûra Kaini aûragire.” 26 Sethi n'we aagia na kaana ga kaîyî ageeta Enosi.
Îgiitaani rîru i rîo antû baanjîîrie kûgonga riîtwani rîa Mwathani.