Antû baarega kwathîkîra Ngai
3
1 Îîndî, njoka n'yo nyamû îra yarî na ûbereera nkûrûki ya nyamû ira ingî cionthe cia kîthaka ira Mwathani Ngai aûmbîîte. Yaûria mûka, “Waabu Ngai ka aabwîrire, ‘Bûtikaarîe matunda ma mûtî nwa ûrîkû wa îra îrî mûndaani ûyû?’ ” 2 Mûka amîcookeria amîîra, “Nwa tûrîe matunda ma mîtî yonthe îra îrî mûndaani ûyû, 3 tatiga matunda ma mûtî ûra ûrî gatîgatî ka mûnda. Ngai aatwîrire tûtikaamarîe kana tûmatonga, tûûya gûkua.”4 Njoka yeera mûka, “Gûtirî, bûtiikua. 5 Ngai n'aiyî atî wona bwarîa matunda ma mûtî ûyu, meetho meenu makaarancûkia na bûkare ta Ngai bûmenyage wega na ûthûûku.”
6 Rîra mûka oonire matunda mamu i maarî meega ma kûrîa, na i maakenagia meetho, na muntû akîenda kûmarîa kaingo agîta ûûme, aathûkia matunda mamwe maamo aarîa. Aacooka aanenkera mwene n'ûntû ibaarî n'we, n'we aarîa. 7 Rîru meetho maao maarancûkia na baamenya baarî ûtheri. Baatumania mathangû ma mûkûyû booga kauna baitha ûtheri bwao.
8 Ûgoro kwarura, beegua muugio wa Mwathani Ngai akîangaanga mûndaani. Muntû mûrûme eebitha amwe na mwekûrû wake mîtîîni îra yarî mûndaani batikoonwe i Mwathani. 9 Mwathani Ngai eeta muntû mûrûme amûûria, “I kû ûrî?” 10 Muntû mûrûme amûcookeria amwîra, “Ka mbîgiirue ûkîangaanga mûndaani, n'ûntû ndî ûtheri, ndaakuthûka, ndeebitha.” 11 Mwathani amûûria, “N'ûû akwîrire ûrî ûtheri? Ka ûrîîre matunda ma mûtî ûra ndaagûkaniirie?” 12 Muntû mûrûme amûcookeria amwîra, “I mûka ûra wampeere tûkaranagia n'we, ampeere matunda ma mûtî ûyu naani ndaarîa.” 13 Rîru Mwathani Ngai aûria mûka, “N'ata woû ûrûthire?” Mûka auga, “I njoka îmbeneerie ndaarîa.”
Maciaro ma kûrega kwathîka
14 Mwathani Ngai eera njoka,
“N'ûntû bwa ûûgû warûtha,
woû ûrî ûmûrume kîrî nyamû cia ndîîthia cionthe
na gatî ka nyamû cia kîthaka;
ûgeekururagia na nda
na ûkaarîîyaga tîîri
ntugû cionthe cia ûtûûro bwaku.
15 Ngeekîra ûthû gatî gaaku na mûka,
na gatî ka mbeû yaku na mbeû yake,
mbeû ya mûka îgakûringa kîongo,
naawe ûkamîrûmaga gîtende.”
16 Mwathani eera mûka,
“Nkoongeera ûrûrû bwaku îgiita rîra ûkûgîa na mwana;
ûkaagîîyaga na aana na ûrûrû.
Wîrirîria bwaku bûkeegagua bûrî kîrî mûrûmeegu
na agakwathaga.a”
17 Ngai eera muntû mûrûme,
“N'ûntû n'wîgiirue mwekûrû waku,
na warîa matunda ma mûtî ûra,
ndaakwathîîte ndakwîra,
‘Ûtikaarîe matunda maau,’
nthîgûrû îkûrumwa n'ûntû bwaku,
nwa mwanka ûtiire muuru ûtûûro bwaku bunthe
kaingo ûruta gîntû kuuma nthîgûrû.
18 Nthîgûrû îkauma mîtî îrî mîîgua na ngonko,
na ûkaarîîyaga maciaro ma imera bia mûnda.
19 Kuumania na îthithina rîaku
ûkoonaga biakûrîa
mwanka rîra ûgaacooka mûthetuuni,
n'ûntû i ku waumire
woû ûrî tîîri,
na ûgaacooka tîîriini.”
20 Muntû mûrûme eeta mwekûrû wake Awa,b n'ûntû n'we aarî gina wa bionthe bira birî mwoyo. 21 Mwathani Ngai aarûthîra Andamu na mwekûrû wake nguo cia njûo cia gwîkîra.
Andamu na Awa beengatua mûndaani wa Endeni
22 Rîru Mwathani Ngai auga, “N'ûkwona îîndî muntû agûkara ta ûmwe wacietû, n'akûmenya wega na ûthûûku. Nwa ataambûrûkie njara agakuuyîîria akathûkia îtunda rîa mûtî wa mwoyo akarîrîa na agatûûra tene na tene.” 23 Kwoogu Mwathani Ngai eengatia muntû kuuma mûndaani wa Endeni. Muntû aatua kûrîmaga mûthetuuni woora aumire. 24 Nyuma ya kwîngatia muntû kuuma mûndaani, Mwathani Ngai agaiga kerubi mbarî ya uumîîro bwa riûa ya mûnda wa Endeni; na rûûyiû rwathiûrûûkaga rûgîankanaga ta mwanki kûrigîîria njîra ya kûthi akubî na mûtî wa mwoyo.