2
1 Kwoogu ûgu i bu îgûrû na nthîgûrû na into bionthe bira birî ku biaûmbangirwe biarîîkia. 2 Ntugû ya mûgwanja, Ngai n'aarî akûrîîkia ngûgî yake îra aarutaga. Ntugû înu ya mûgwanja aanogoka akûthiria ngûgî ciake cionthe. 3 Aathaarima ntugû ya mûgwanja na amîtuîkithia întheru, n'ûntû n'yo ntugû îra aanogokire kuuma ngûgîîni yake ya kûûmba.Andamu na Awa
4 Ûgu i bu îgûrû na nthîgûrû biaûmbangirwe.
Rîra Mwathani Ngai aûmbire îgûrû na nthîgûrû, 5 mbereeni gûtaarî na imera nthîgûrû na mîtî îtaarî îmiumu, n'ûntû Mwathani Ngai ataurithîîtie mbura. Na gûtaarî na muntû wa kûrîma nthîgûrû. 6 Îndî rûûyî irwanyenyeaga kuuma nthî rûgeekîra nthîgûrû yonthe kîthithina. 7 Mwathani Ngai aûmba muntû na tîîri ya nthîgûrû. Na amûbuîrîîra mîruke ya mwoyo nyiûrûûni. Na muntû aatuîka kîûmbe kîrî mwoyo.
8 Na Mwathani Ngai aarûtha mûnda bantû eetagwa Endeni mbarî ya uumîîro bwa riûa, na aagaiga muntû ûra aûmbîîte mûndaani ûyu. 9 Mwathani Ngai aatûma mîtî îmîthongi ya mîthemba yonthe na mîtî ya matunda yuuma mûndaani ûyu. Gatîgatî ka mûnda ûyu, i kwarî na mûtî wa mwoyo, na mûtî wa ûmenyo bwa wega na ûthûûku.
10 Na i kwarî na muuro waumîîte Endeni wa kûnyuithagia mûnda ûyu rûûyî, kuuma agu nwagaûkanîîte mîthîîra îna. 11 Mûthîîra ûmwe wetagwa Pisoni na n'uu ûgeendeereete nthîgûrû yonthe ya Abira kûra kûrî thaabu. 12 Na thaabu ya nthîgûrû înu imbega mûno. Kinya maiga ta mbendora na carindoniki marî noogo. 13 Muuro wa îîrî wîtagwa Ngioni. Na nuu ûgeendeereete nthîgûrû yonthe ya Kusi. 14 Muuro wa îthatû wîtagwa Tigiris. Ûgeendeereete mbarî ya uumîîro bwa riûa bwa nthîgûrû ya Asîîria. Muuro wa îna wîtagwa Yufîrîti.
15 Mwathani Ngai aathûkia muntû, amwaiga mûndaani wa Endeni kaingo arutaga ngûgî ku acumenyagîîra. 16 Na Mwathani Ngai aatha muntû amwîra, “Nwa ûrîe matunda ma mîtî yonthe îra îrî mûndaani ûyû, 17 îndî ûtikaarîe matunda ma mûtî wa ûmenyo bwa wega na ûthûûku. N'ûntû wona wamarîa na mma n'ûgaakua.”
18 Mwathani Ngai auga, “Ti bwega muntû akaraga arî wenka; nkamûrûthîra mûteetheeria ûra ûmwagîrîte.” 19 Kwoogu kuuma mûthetuuni wa nthîgûrû, Mwathani Ngai aûmba nyamû cia mîthemba yonthe na nyoni. Rîru areeta cio kîrî muntû kaingo oona bûra agaciîta. Na riîtwa rîra muntû eetire weera nyamû, i rîo rîatuîkire riîtwa rîayo. 20 Muntû eeta nyamû cionthe cia ndîîthia, nyamû cia kîthaka na nyoni mariîtwa. Îndî kîrî muntû gûtooneka mûteetheeria ûmwagîrîte. 21 Kwoogu Mwathani Ngai aatûma muntû agwatwa i toro înene, amaama. Amûruta rûbaru rûmwe na aacookanîria nyama bantû agu. 22 Na kuumania na rûbaru rûra Mwathani Ngai aarutire kuuma kîrî muntû mûrûme, aûmba mûka, amwira kîrî muntû mûrûme.
23 Rîru muntû auga,
“Gîkî i kîîndî kîa maîndî maakwa
na nyama ya nyama ciakwa.
Ûyû ageetwa ‘mûkaa’
n'ûntû arutîîtwe kîrî muntû mûrûme.”