KÎAMBÎRÎRIA
Rûgono rwa kûûmbwa gwa into bionthe
1
1 Kîambîrîriani kîongwa, Ngai aûmbire îgûrû na nthîgûrû. 2 Rîru nthîgûrû gûtirî bu yaakari, yarî întheri na îtaarî gîntû, na i mwindu waguîkîrîîte kûra kwarî kworokeru, na Kîrundu wa Ngai n'angaangaga îgûrû ya rûûyî.3 Rîru Ngai auga, “I kûgîe na werû,” na kwagîa na werû. 4 Ngai oona atî werû i bwarî bwega, na aathûrana werû na mwindu. 5 Ngai eeta werû “mûthenya” na eeta mwindu “ûtugû.” Gwatuga, gwacooka gwakea. Înu n'yo yarî ntugû ya mbere.
6 Na Ngai auga, “I kûgîe na mwanya gatîgatî ka rûûyî kaingo wankania rûûyî rûmwe na rûra rûngî.” 7 Kwoogu Ngai aarûtha mwanya ûyu wankania rûûyî rûra rwarî ruungu rwau na rûra rwarî îgûrû rîau. Na gwakarîka woogu. 8 Ngai eeta mwanya ûyu îgûrû. Gwatuga, gwacooka gwakea. Înu n'yo yarî ntugû ya ciîrî.
9 Na Ngai auga, “Ka rûûyî rûra rûrî ruungu rwa îgûrû rwîthîrane bantû amwe, na kwîgue kûrî na nthî îmbûmo.” Na gwakarîka woogu. 10 Ngai eeta nthî înu mbûmo “nthîgûrû” na rûûyî rûru rwethîreene bantû amwe, aruîta “îria.” Na Ngai oona ûgu i bwarî bwega.
11 Ngai auga, “Ka nthîgûrû yuume matî, matî mara maciaraga mpîndî na mîtî îra îciaraga matunda, woora mûtî na mûthemba wau.” Naku gwakarîka woogu. 12 Nthîgûrû yauma matî mara maciaraga mpîndî na mîtî îra îciaraga matunda, woora mûtî na mûthemba wau. Na Ngai oona ûgu i bwarî bwega. 13 Gwatuga, gwacooka gwakea, înu n'yo yarî ntugû ya ithatû.
14 Ngai auga, “I kûgîe na imûrîki kûra îgûrû bia kwathûranaga mûthenya na ûtugû, i bio bikoonanagia magiita, ntugû na mîanka. 15 Imûrîki bibi birî îgûrû i bio bikaamûrîkaga nthîgûrû.” Na gwakarîka woogu. 16 Na kwoogu Ngai aarûtha imûrîki biîrî biinene, riûa rîa kûmûrîkaga mûthenya, mweri nau wa kûmûrîkaga ûtugû. Na aarûtha nthata wanacio. 17 Aagaiga imûrîki bibi îgûrû bimûrîkaga nthîgûrû, 18 biathaga mûthenya na ûtugû na bia kwathûranaga werû na mwindu. Ngai oona ûgu i bwarî bwega. 19 Gwatuga, gwacooka gwakea, înu n'yo yarî ntugû ya inya.
20 Ngai auga, “Ka nyamû cia mîthemba îmiingî irî mwoyo ciûyûre rûûyîîni, na maanganyoni i kûûyûre nyoni.” 21 Kwoogu Ngai aûmba nyamû ira nene cia îria na biûmbe bia mîthemba yonthe bira bitûûraga rûûyîîni wa kîra gîntû na mûthemba wakîo. Na aûmba nyoni ira irî mathabu wa îra nyoni na mûthemba wayo. Ngai oona ûgu i bwarî bwega. 22 Ngai athaarima nyamû cia rûûyî auga ithagaye ciûyûre îria, na nyoni nacio ciingîe ciûyûre nthîgûrû. 23 Gwatuga, gwacooka gwakea. Înu n'yo yarî ntugû ya itaano.
24 Ngai auga, “Ka nthîgûrû îgîe na nyamû cia mîthemba yonthe; nyamû cia kîthaka, nyamû cia ndîîthia na nyamû ira ciîkururagia.” Na gwakarîka woogu. 25 Ngai aûmba nyamû cia mîthemba yonthe; nyamû cia ndîîthia, cia kîthaka, nyamû ira ciîkururagia wa nyamû na mûthemba wacio. Na Ngai oona ûgu i bwarî bwega.
26 Rîru Ngai auga, “Ga tûûmbe muntû abuaneene naati. Baathage makûyû ma îria, na nyoni cia îgûrû na nyamû cia ndîîthia na cia kîthaka; iinene na i niini.”
27 Kwoogu Ngai aûmba muntû abuaneene n'we wengwa,
Ngai amûûmba akari t'we;
aûmbire muntû mûrûme na mûka.
28 Ngai abathaarima na abeera, “Thagayaani na bwongeereke bûûyûrie nthî na bûmîathage. Bwathage makûyû ma îria na nyoni cia îgûrû na into bionthe bira birî mwoyo bithiiyagîra nthîgûrû.” 29 Ngai auga, “Nkûbûnenkera matî monthe mara makûraga nthîgûrû na maciaraga mpîndî, na mîtî yonthe îra îciaraga matunda marî na mpîndî. Bibu bigaatuîka irio bienu. 30 Na kîrî nyamû cionthe cia nthîgûrû, nyoni cionthe cia îgûrû na nyamû ira ciîkururagia na nthî; into bionthe bira birî mwoyo, nkûbinenkera matî monthe.” Na gwakarîka woogu. 31 Ngai oona into bionthe bira aûmbîîte, bionthe biarî biega mûno. Gwatuga, gwacooka gwakea. Înu yarî ntugû ya ithanthatû.