SiYakub Nonjaoꞌi TePuang NuMesir
47
1-2 Lamai heꞌua siYusup nongomung limatoo lamai terururusnya heꞌuapa nonjaoꞌi tepuang.
Siia nonjarita,
“Siama ane terururusu najaoko lamai teTana nuKanaꞌan concoono jojoo tebembe,
tedomba,
tesapi ane jojoo tesagara niira.
Eꞌeini siira eiWilaya nuGosyen.”
Heꞌuapa siia nongulara tetope-tope nurururusnya heꞌua eipuang.
3 Tepuang noꞌutanya eisiira,
“Tesapa tepokarajaaong niꞌemiu?”
Siira nonyimbat,
“Siꞌami eini tetopomiara-topomiara tepetuvuong sima tesiopu-siopu niꞌami sanu luulumai.
4 Siꞌami najaok untuk momoia lasiantoung eitana eini,
karna eiTana nuKanaꞌan jinaok nuorok sanu majaat,
jaok jiongo umai ogugus untuk tebembe ane tedomba niꞌami.
Ane maala,
patuvaya siꞌami momoia eiGosyen.”
5 Lamai heꞌua tepuang nonjarita eisiYusup,
“Eꞌeini siama ane terururusmu umaimo eiriꞌini.
6 Anggapo teTana nuMesir sima tetanamu mboto.
Patuvaya siira momoia eiGosyen,
tetana sanu tututuu mombosi eitana eini.
Ane siꞌoo moꞌotoi tetoo-too lamai eisiira sanu mapande,
mopaꞌajari siira tetopomiara-topomiara tepetuvuong-petuvuongu.”
7 SiYusup valii nongomung siamanya eipuang.
Lamai heꞌua siYakub nomongi teꞌAlataꞌala nombarakai tepuang,
8 ane tepuang noꞌutanya eisiia,
“Soꞌuya teꞌumurmu?”
9 SiYakub nonyimbat eipuang,
“Siaꞌu netuvumo sagatus tolumpuluntoung sima tetopongalalampa.
Ane nopeꞌeselilio teꞌumur nusiopu-siopuꞌu sanu luulumai sima topongalalampa teꞌumuru mokudu heꞌuapa teꞌumur niira.
Teꞌotutuvuꞌu nobuꞌe nuꞌosususa.”
10 Lamai heꞌua siYakub nomongi teꞌAlataꞌala nombarakai tePuang nuMesir,
touk heꞌua nolinjoꞌi tepuang.
11 SiYusup nonujua eisiamanya ane terururusnya eipaio siira maala momoia eiTana nuMesir.
Vineenaꞌonya eisiira tetana sanu tututuu mombosi eitana heꞌua,
moꞌosuk teKota nuRameses,
sima sanu pinarentaa nupuang.
12 SiYusup nombee sanu noꞌinang eisiamanya,
eirururusnya,
ane eijojoo tetoo sanu najaok concoono siamanya,
monuruk teꞌababarinya nuunga-unga niira.
Tegauk NiYusup Watu Teorok
13 Teorok heꞌua tututuu majaat,
jaok eipapaio jiongo umai sanu noꞌinang.
Tetoo-too nuMesir ane tetoo-too nuKanaꞌan noluntoy karna noorok.
14 Karna heꞌua siira umaꞌo nongoli tegando lamai siYusup.
Lamai heꞌua tedoi tepombayar inincona niYusup heꞌuapa inembeaꞌonya eivonua nupuang.
15 Watu notouk tedoi eiTana nuMesir ane eiTana nuKanaꞌan,
tetoo-too nuMesir najaok eisiYusup ane nonjarita,
“Venii siꞌami sanu noꞌinang!
Inyaa nopatuvaya siꞌami maate.
Tedoi niꞌami notouko.”
16 SiYusup nonyimbat,
“Ane tedoi notouko,
veena tepetuvuong-petuvuong niꞌemiu.
Lamai heꞌua siaꞌu mombenii sanu noꞌinang eisiꞌemiu.”
17 Lamai heꞌua siira nombeena tepetuvuong-petuvuong niira eisiYusup,
ane siia nombenii sanu noꞌinang eisiira sima tepombolos teꞌajaran,
tedomba,
tebembe,
tesapi ane tekeledai niira.
Eitoung heꞌua siYusup nombenii sanu noꞌinang eisiira ane siira nombolos nepake tebinaatang.
18 Tetoung ancunaꞌonya siira najaokonye eisiia ane nonjarita,
“Bogubernuur,
siꞌami jio maala monyoyoka lamai siꞌoo.
Tedoi niꞌami notouko ane tepetuvuong-petuvuong niꞌami najarimo tepetuvuong-petuvuongmu.
Siꞌami jiongo osapa-sapa sanu maala noveena niꞌami eisiꞌoo,
boi teꞌalae niꞌami mboto ane tetana niꞌami.
19 Inyaa nopatuvaya siꞌami maate!
Inyaa nopatuvaya tetana niꞌami jaok jio umai tetutudaong.
Olimo siꞌami ane tetana niꞌami nepake tegando sima tepombayarnya.
Siꞌami majari tevotuang-votuang nupuang ane tetana niꞌami majari tetana nupuang.
Venii siꞌami tegando antau monarusa teꞌotutuvu niꞌami ane valii tevuꞌu antau noambura eijoꞌong-joꞌong niꞌami,
antau tejoꞌong-joꞌong niꞌami ulengi umai tetutudaong!”
20 Lamai heꞌua siYusup nongoli jojoo tetana eiMesir untuk tepuang.
Jojoo tetoo nuMesir kanaboi mobaluk tetana niira,
karna tewatu nuorok heꞌua tututuu majaat.
Karna heꞌua tetana eiMesir majari tetana nupuang.
21 Jojoo tetoo eiMesir pinaꞌajari niYusup tevotuang.
22 Boi tetana nuꞌimam-imam sanu jio inolinya.
Siira jio paraluu mobaluk tetana niira karna siira vinenii magana sanu noꞌinang lamai sipuang.
23 SiYusup nonjarita eitoo-too heꞌua,
“Itaimo,
siꞌemiu ane tetanamu inoliꞌumo untuk tepuang.
Eini tevuꞌu-vuꞌu sanu maala noambura eijoꞌong-joꞌong niꞌemiu.
24 Watu melolu,
siꞌemiu kanaboi mombee eipuang sakarung lamai limakarung lamai jojoo tehasil niꞌemiu.
Tetoronya maala nopake niꞌemiu untuk tevuꞌu sanu noambura eijoꞌong ane sanu noꞌinang niꞌemiu ane soungaongmu.”
25 Siira nonyimbat,
“Siꞌoo nopaꞌasalamato siꞌami ane siꞌami seilu mogutu teambok niꞌoo masanang.
Siꞌami mesiap majari tevotuang nupuang.”
26 Lamai heꞌua siYusup nopaꞌajari heꞌua teꞌaturan eiTana nuMesir.
Sakarung lamai limakarung lamai jojoo tehasil melolu kanaboi noveena eipuang.
Jaok eleo eini heꞌua ulengi pinake.
Boi tetana nuꞌimam-imam sanu jio majari tetana nupuang.
Tepomongiong NiYakub Sanu Ponouꞌong
27 Sima heꞌua siYakub ane tetoo-toonyaa nomoia eiTana nuMesir,
eiWilaya nuGosyen.
Siira nongala tetana ane noꞌounga nomoꞌupu ane noniang nabari tutuu eiriꞌua.
28 SiYakub ulengi netuvu 17 ntoung eiTana nuMesir jaok teꞌumurnya najari 147 ntoung.
29 Watu moꞌosuko maate,
ilevainya siYusup,
teunganya heꞌua,
heꞌuapa jinaritanya eisiia,
“Ane siꞌoo magalang eisiaꞌu,
embea telimamu eiangkop nupalangaꞌub ane mojanji siꞌoo jio montanong siaꞌu eiTana nuMesir eini.
30 Seiluꞌu notanong concoono siamaꞌu ane sikakaiꞌu.
Omung tebatangu lamai tetana eini ane tanong eilalong nupontanonong niira.”
Heꞌuapa siYusup nonyimbat,
“Siaꞌu monggauka tesapa sanu inulara niꞌoo eisiaꞌu.”
31 SiYakub nonjarita,
“Pogutu tejanji siꞌoo monggaukaꞌonya.”
SiYusup nojanji,
ane siYakub noposuncul eipoꞌoturuongnya nonyukur eiꞌAlataꞌala.