SiYakub Umaꞌo EiTana NuMesir
46
1 Lamai heꞌua siYakuba nelengkat lamai teTana nuKanaꞌan concoono jojoo sanu umai eisiia.
Watu siia najaok eiKota nuBersyeba siia nonyambale tebinaatang sima tepombee eiꞌAlataꞌala sanu sinomba niꞌIshak siamanya.
2 Eilalong nupongita watu mondoung,
teꞌAlataꞌala nonjarita eisiia,
“Yakub,
Yakub!”
SiYakub nonyimbat,
“Ya,
boSiopu.”b
3 TeꞌAlataꞌala nonjarita,
“Siaꞌu teꞌAlataꞌala.
TeꞌAlataꞌala sanu sinomba niamamu.
Inyaa mobule umaꞌo teTana nuMesir.
Siaꞌu mopaꞌajari tebijamu tebangsa sanu mooge ampi heꞌua.
4 Siaꞌu monagui siꞌoo umaꞌo teTana nuMesir,
ane mongomung tebijamu metencile umaꞌo teTana nuKanaꞌan eini.
Watu siꞌoo maate,
siYusup umai eisevimu.”
5 Lamai heꞌua siYakub nelengkato lamai teBersyeba.
Teunga-unganya nonyavea siama niira concoono teunga-unga ane telapi-lapi niira umaꞌo eibabok nuroda sanu pinaꞌatu nuPuang nuMesir.
6 Siira valii nongomung tepetuvuong-petuvuong ane jojoo teharta sanu naala niira eiTana nuKanaꞌan,
heꞌuapa nelengkat umaꞌo teTana nuMesir.
SiYakub nongomung jojoo tebijanya.
7 Tebija sanu inomungnya heꞌua jojoo teunga ane temoꞌupu sanu telangkai ane tebengkel.
8 Eini tetope-tope nubija niYakub sanu nonuut umaꞌo teTana nuMesir.
9 SiRuben,
teunga siaꞌa concoono teunga-unganya.
Heꞌua siHenokh,
siPalu,
siHesron ane siKarmi.
10 SiSimeon concoono teunga-unganya.
Heꞌua siYemuel,
siYamin,
siꞌOhad,
siYakhin,
siSohar ane siSaul.
SiSaul teunga lamai sotoo telapi lamai teKanaꞌan.
11 SiLewi concoono teunga-unganya.
Heꞌua siGerson,
siKehat ane siMerari.
12 SiYehuda concoono teunga-unganya.
Heꞌua siSyela,
siPeres ane siSerah.
Tapi teunga-unga niYehuda sanu ntaninya,
heꞌua siꞌEr ane siꞌOnan naate eiTana nuKanaꞌan.
Teunga-unga niPeres heꞌua siHesron ane siHamul.
13 SiꞌIsakhar concoono teunga-unganya.
Heꞌua siTola,
siPua,
siꞌAyub ane siSimron.
14 SiSebulon concoono teunga-unganya.
Heꞌua siSered,
siꞌElon ane siYahleꞌel.
15 Siira jojoo teunga-unga langkai sanu pinoguungaa niLea untuk siYakub eiTana nuPadan-Aram.
Umai valii sotoo teunganya bengkel sanu tinope siDina.
Jadi jojoo tebija niYakub lamai silapinya siLea terekenongnya tolumpulu tolutoo.
16 SiGad concoono teunga-unganya.
Heꞌua siSipyon,
siHagi,
siSyuni,
siꞌEsbon,
siꞌEri,
siꞌArodi ane siꞌAreli.
17 SiꞌAsyer concoono teunga-unganya.
Heꞌua siYimna,
siYiswa,
siYiswi ane siBeria concoono siSerah,
terurus bengkel niira.
Teunga-unga niBeria heꞌua siHeber ane siMalkiel.
18 Jadi jojoo tebija niYakub lamai lapinya siSilpa,
tevotuang bengkel sanu vineena niLaban eisiLea teunganya bengkel,
terekenongnya sompulu onotoo.
19 SiRahel telapi niYakub umai rotoo teunga,
heꞌua siYusup ane siBenyamin.
20 EiTana nuMesir siYusup ounga rotoo teunga,
heꞌua siManasye ane siꞌEvraim sanu pinoguungaa nulapinya siꞌAsnat,
teunga niPotivera,
teꞌimam nuKota nuꞌOn.
21 SiBenyamin concoono teunga-unganya.
Heꞌua siBela,
siBekher,
siꞌAsybel,
siGera,
siNaꞌaman,
siꞌEhi,
siRosh,
siMupim,
siHupim ane siꞌAred.
22 Jadi jojoo tebija niYakub lamai silapinya siRahel terekenongnya tolumpulu apatoo.
23 SiDan concoono teunganya siHusim.
24 SiNavtali concoono teunga-unganya.
Heꞌua siYahseꞌel,
siGuni,
siYeser ane siSyilem.
25 Jadi jojoo tebija niYakub lamai siBilha,
tevotuang bengkel sanu vineena niLaban eisiRahel teunganya,
terekenongnya pitutoo.
26 Tebija niYakub sanu umaꞌo teTana nuMesir jojoo terekenongnya onompulu onotoo,
jio neterekeng telapi-lapi nuunga-unganya.
27 Teunga-unga niYusup sanu pinoguungaa eiTana nuMesir umai rotoo,
jaok tesoungaong niYakub sanu najaok eiTana nuMesir jojoo terekenongnya pitumpulutoo.
SiYakub Ane Tesoungaongnya EiTana nuMesir
28 SiYakub nonuju siYehuda nelampa mongaliurui siia untuk moleva siYusup antau monjaoꞌi siamanya eiWilaya nuGosyen.
Watu siira najaok eiGosyen,
29 siYusup nonyadiaa terodanya ane umaꞌo monjaoꞌi concoono siamanya ampi heꞌua.
Watu siira netepojaok,
siYusup negonggol siamanya ane notumangis neende.
30 SiYakub nonjarita eisiYusup “Eꞌeini siaꞌu mesiap maate,
karna neꞌitamo siꞌoo ane moꞌotoi siꞌoo ulengi netuvu.”
31 Lamai heꞌua siYusup nonjarita eisiaꞌa-siaꞌa ane tetuainya ane jojoo tetoo sanu najaok concoono siira,
“Siaꞌu jamo umaꞌo ane monjarita eisipuang,
‘Jojoo terurusu sanu nomoia eiTana nuKanaꞌan,
najaoko eisiaꞌu.
32 Siira tetopomiara-topomiara tedomba,
tebembe ane tesapi,
ane nongomungo jojoo tepetuvuong ane jojoo tesasagara niira.’
33 Ane tepuang moleva siꞌemiu ane moꞌutanya,
‘Tesapa tepokarajaaong niꞌemiu?’
34 Jaritaa eisiia sima eini,
‘Siꞌami eini tetopomiara-topomiara tepetuvuong lamai teꞌumur molumbi,
selilio sima tesiopu-siopu niꞌami sanu luulumai.’
Ane mongular sima heꞌua siia monuju siꞌemiu momoia eiGosyen.”
SiYusup nongulara heꞌua karna tetoo-too nuMesir nenciing momoia concoono tetopomiara-topomiara tepetuvuong.