SiYusup Nonjarita Sisee Siia
45
1 SiYusup jiongo maala montaang teamboknya eitolo nuvotuang-votuangnya.
Tinujunya tevotuang-votuangnya molinjoꞌi siia.
Karna heꞌua jio umai tetoo nuMesir concoono siia watu siia monjaritaa eirururusnya sisee siia.
2 Touk heꞌua,
siYusup notumangis moporos,
a ane tetoo-too nuMesir sanu umai eiaangnya neꞌeepe,
ane nekarevaong jaok tepomoiaong nupuang.
3 SiYusup nonjarita eirururusnya,
“Siaꞌu eini siYusup.
Ulengi netuvu siamaꞌu?”
Neꞌeepe heꞌua terururusnya nobule jaok siira jio maala nonjarita tesapa-sapa.
4 Lamai heꞌua siYusup nonjarita eisiira,
“Poꞌosuk menekai.”
Watu siira moꞌosuk eisiia,
siia nonjaritaonye,
“Siaꞌu eini terurus niꞌemiu,
siYusup sanu pinobaluk niꞌemiu eitoo-too sanu nongomung siaꞌu eiTana nuMesir.
5 Inyaa noondong teambok atau monyosol karna siꞌemiu nobaluko siaꞌu.
TeꞌAlataꞌala mboto sanu nongomung siaꞌu eiriꞌini nongaliurui siꞌemiu antau mopaꞌasalamat mabari tetoo.
6 Teorok paꞌali tetoung ororuaaꞌonya ane ulengi limantoung teendenya.
Tetoo-too jio momajeko atau melolu.
7 TeꞌAlataꞌala nonuju siaꞌu nongaliurui siꞌemiu antau siaꞌu mopaꞌasalamat siꞌemiu lamai teorok eini jaok kalepu umai mabari tebija niꞌemiu.
8 Karna heꞌua jio siꞌemiu sanu monyabaa siaꞌu eiriꞌini,
tapi teꞌAlataꞌala.
Siia nopaꞌajari siaꞌu tetopomimpin nuPuang nuMesir.
Siaꞌu vineena tekuasa eipomoiaong nupuang ane majari tegubernuur sanu nomarentaa jojoo tetoo eiTana nuMesir.
9 Poꞌolongkang petencile eisiama niꞌita ane ulara eisiia teunganya siYusup nonjarita sima eini,
‘TeꞌAlataꞌala nopaꞌajari siaꞌu teGubernuur nuMesir.
Pajaoko menekai molongkang eisiaꞌu eiriꞌini.
10 Siꞌoo maala momoia eiWilaya nuGosyen,
moꞌosuk eisiaꞌu.
Siꞌoo momoia ane jojoo teunga,
temoꞌupu,
tedomba,
tebembe,
tesapi ane teharta niꞌoo.
11 Ane siꞌoo umai eiGosyen,
siaꞌu maala momiara siꞌoo.
Karna teorok ulengi limantoung ane siaꞌu mongusahaa antau inyaa jaok siama ane soungaong niama concoono jojoo sanu umai eisiama majari nopukur.’ ”
12 SiYusup nonjaritaonye eirururusnya,
“Siꞌemiu neꞌitamo mboto,
ane siꞌoo valii Benyamin neꞌitamo,
siaꞌu mboto siYusup sanu nonjarita concoono siꞌemiu.
13 Ulara eisiama niꞌita mooge tutuu tekuasaꞌu eiriꞌini,
eiTana nuMesir.
Ulara eisiia tesapa sanu inita niꞌemiu.
Lamai heꞌua selengaan omung siia menekai.”
14 Lamai heꞌua siia negonggol siBenyamin,
tetuainya ane notumangis.
SiBenyamin valii notumangis ane negonggol siia.
15 SiYusup valii negonggol terururusnya pepees notumangis ane nembongii siira.
Touk heꞌua siira nejajaritaong concoono siia.
16 Watu tePuang nuMesir neꞌeepe tekareva sima terururus niYusup najaok,
tepuang ane jojoo tetoonya sanu apangka najari nasanang valii.
17 Touk heꞌua tepuang nonjarita eisiYusup,
“Tujumo terururusmu heꞌua melulana tegando eibabok nukeledai-keledai niira ane netencile eiTana nuKanaꞌan.
18 Molabot tesiama niꞌemiu ane jojoo terurusmu lamai heꞌua pombalik menekai.
Siaꞌu mombeena tetana sanu tututuu mombosi eiTana nuMesir,
ane siira metuvu masanang lamai tehasil nutana heꞌua.
19 Parentaaꞌomo siira valii mongomung lamai riꞌini lasiaroda untuk nopesavei nulapi-lapi,
nuunga-unga ane nusiama niꞌemiu majaok menekai.
20 Siira jio paraluu momikira tesasagara sanu nolinjoꞌi niira,
karna sanu tututuu mombosi eiTana nuMesir majari tesasagara niira.”
21 Teunga-unga niYakub nonuruꞌi jojoo teparenta nupuang heꞌua.
SiYusup nombeena eisiira lasiaroda,
sima sanu pinarentaa nupuang,
ane valii tevalung eijalang.
22 Vineenaꞌonya valii eisiira tepakean sanu vuou sasapaarong sotoo.
Tapi eisiBenyamin vineena tolugatusmboꞌa tedoi nuperak ane tepakean limapaar sanu vuou.
23 Siia nomaꞌatua eisiamanya sompulumbaang tekeledai siamanya sanu ilulani tesasagara sanu tututuu mombosi lamai teTana nuMesir,
ane valii sompulumbaang tekeledai siinanya sanu ilulani tegando,
teroti ane sanu noꞌinang ntaninya majari tevalung niamanya eipelampaong umaꞌo eiTana nuMesir.
24 Lamai heꞌua siia nonuju terururusnya,
ane siia nonjarita eisiira,
“Inyaa mebabantaong eijalang.”
25 Siira nolinjoꞌi teTana nuMesir ane umaꞌo eiTana nuKanaꞌan,
eisiYakub,
tesiama niira.
26 Siira nonjarita eisiamanya,
“SiYusup ulengi netuvu!
Siia tegubernuur sanu nomarentaa jojoo tetoo eiTana nuMesir!”
SiYakub dodontong neꞌeepe heꞌua,
ane siia jio nomarcaya eisiira.
27 Tapi touk siira nonjaritaa jojoo sanu jinaritaa niYusup eisiira ane watu siia neꞌita teroda-roda sanu pinaꞌatu niYusup untuk molabot siia ane mongomung siia umaꞌo eiTana nuMesir,
siia jiongo neingu.
28 Lamai heꞌua siYakub nonjarita,
“Siaꞌu nomarcaya.
Teungaꞌu siYusup ulengi netuvu!
Siaꞌu kanaboi umaꞌo mongita siia jijiompo siaꞌu maate.”