Tepenginunong NiYusup Napada Ane Jinaok
44
1 Lamai heꞌua siYusup nomarentaa eitopondulunya “Isia tegando eilalong nukarung-karung nutoo-too heꞌua jaok mataan noꞌomung niira,
isia valii tedoi niira sosotoo eilalong nukarung eibabok nugando.
2 Isia valii tepenginunong nuperaku eikarung sanu eituai niira sanu pomabusong,
concoono tedoi tepombayar tegandonya.”
Tetopondulu heꞌua nonggauka jojoo sanu pinarentaanya.
3 Modondong titieleo siira nolinjoꞌimo siYusup,
concoono tekeledai-keledai niira.
4 Siira paꞌali nesuvung lamai tekota,
jiompo naavar lamai tekota heꞌua,
siYusup nonjarita eitopondulunya,
“Lilivur tetoo-too heꞌua.
Watu jinaoko,
jaritaa eisiira,
‘Neteꞌuya teꞌombombosi binolosi teꞌajajaat?
5 Neteꞌuya siꞌemiu nongangga tepenginunong nuperak nugubernuur?
Tepenginunong heꞌua pinakenya menginung ane sima teꞌalat mombolobiang.
Siꞌemiu nonggaukaꞌomo teꞌajajaat.’ ”
6 Watu tetopondulu heꞌua najaok eirururus niYusup,
inularaꞌonya tesapa sanu pinarentaa niYusup.
7 Siira nonyimbat eisiia,
“Bomangge,
tesapa sanu jinaritaamu?
Siꞌami jio maala nogugauk heꞌua!
8 Bomangge moꞌotoi tedoi sanu jinaok niꞌami eilalong nukarung-karung niꞌami tinencileaꞌomo niꞌami eisiꞌoo lamai teTana nuKanaꞌan.
Neteꞌuya siꞌami nongangga teperak atau tebulaan lamai tevonua nutuanmu?
9 Sisee sanu umai openginunong nupuang eiolot niꞌami,
siia nohukum maate,
ane siꞌami ntaninya majari tevotuang niꞌoo.”
10 Tetopondulu heꞌua nonjarita,
“Maala sima heꞌua,
tapi boi sisee sanu umai tepenginunong nupuang eiolot niꞌemiu,
siia majari tevotuangu.
Sanu ntaninya mebebas lamai teꞌasasala.”
11 Lamai heꞌua siira molongkang nenyaua ane nombuꞌas tekarung-karung niira.
12 Tetopondulu heꞌua nomaresa tekarung-karung heꞌua.
Siia nompamula lamai eikarung nururus sanu siaꞌa jaok tekarung nururus sanu pomabusong.
Tepenginunong niYusup heꞌua jinaok eikarung niBenyamin.
13 Watu siira neꞌita heꞌua tesiaꞌa-siaꞌa nonjeaka tepakean karna noondong tutuu.
Ilulana niira tekarung-karung eikeledai-keledai ane netencile umaꞌo vavalii eikota.
14 Watu siYehuda ane terururusnya najaok eivonua niYusup,
siia ulengi eiriꞌua.
Siira noposuncul eitolo niia.
15 SiYusup noꞌutanya eisiira,
“Tesapa sanu pinogugauk niꞌemiu eini?
Tantu siꞌemiu moꞌotoi tetoo sima siaꞌu nepake tepoꞌotoi ane maala moꞌotoi tegauk nutoo.”
16 SiYehuda nonyimbat,
“Bogubernuur,
tesapa sanu maala nonjaritaa niꞌami?
Iamaꞌo siꞌami mepopoꞌitaa eisiꞌoo siꞌami mondolong?
TeꞌAlataꞌala nepopoꞌitaa teꞌasasala niꞌami.
Eꞌeini siꞌami jojoo majari tevotuangmu,
jio boi tetoo sanu openginunong nupuang heꞌua.”
17 SiYusup nonjarita,
“Jio!
Siaꞌu jio mogugauk sima heꞌua!
Sisee umai openginunong heꞌua,
siia boi majari tevotuangu.
Siꞌemiu ntaninya maala metencile masalamat eisiama niꞌemiu.”
SiYehuda Nonyabataa SiBenyamin
18 Lamai heꞌua siYehuda nongosuꞌi siYusup ane nonjarita,
“Momongiampun bogubernuuru.
Patuvaya siaꞌu eini monjarita eisiꞌoo.
Inyaa mongoungkul eisiaꞌu.
Siꞌoo sima tePuang nuMesir.
19 Bogubernuur noꞌutanyamo eisiꞌami eini,
‘Siꞌemiu ulengi osiama atau orurus ntaninya?’
20 Siꞌami nonyimbat,
‘Siama niꞌami neisimo ane tetuai niꞌami pinoguungaa watu teꞌumur niama niꞌami neisimo.
Tesiaꞌa secinciina tetuai niꞌami naatemo,
eꞌeini boi tetuai heꞌua sanu ulengi netuvu lamai siira rotoo,
ane siia tutuu noꞌagalani niama niꞌami.’
21 Siꞌoo nonuju siꞌami mongomung siia menekai,
antau siia maala noꞌitamu.
22 Siꞌami nonjarita eisimangge teunga heꞌua jio maala maꞌanta lamai tesiamanya.
Ane siia maꞌanta lamai tesiamanya,
tesiamanya maate.
23 Tapi tegubernuur nonjarita eisiꞌami,
‘Ane siꞌemiu jio mongomung tetuai niꞌemiu sanu pomabusong,
siꞌemiu jio maala majaokonye eisiaꞌu.’
24 Watu siꞌami netencile umaꞌo eisiama niꞌami,
siꞌami nongulara eisiia jojoo sanu jinarita niꞌoo.
25 Touk heꞌua siama niꞌami nonuju siꞌami majaokonye vavalii mongoli sedeꞌi sanu noꞌinang.
26 Siꞌami nonyimbat,
‘Siꞌami jio maala.
Ane umaꞌo ampi heꞌua ane jio mongomung tetuai niꞌami sanu pomabusong,
siꞌami jio maala meꞌita tegubernuur.
Ane siia valii umaꞌo,
siꞌami maala umaꞌo.’
27 Lamai heꞌua siama niꞌami nonjarita,
‘Siꞌemiu moꞌotoi siRahel telapiꞌu,
teunganya boi rotoo.
28 Sanu pamulaongnya nolinjoꞌimo siaꞌu.
Siia pinateimo nubinaatang sanu mooge,
karna jaok eleo eini siaꞌu jio neꞌitaonye siia.
29 Siaꞌu eini meisimo.
Ane siꞌemiu mongala teunga eini lamai siaꞌu,
ane siia mesilaka eipelampaong heꞌua siꞌemiu monyabaa siaꞌu maate nuondong.’ ”
30-31 Ane siaꞌu metencile jio mongomung tetuai heꞌua,
tesiama niꞌami maate.
Siia seilu metuvu karna teunganya netuvu.
Siama niꞌami meisimo.
Ane tetuai heꞌua mesilaka eipelampaong heꞌua,
siꞌami monyabaa siama niꞌami maate nuondong.
32 Siaꞌu nojanjimo eisiia,
ane siaꞌu majari tebolos tetuai heꞌua.
Siaꞌu nonjarita eisiia,
ane siaꞌu jio mongomung siia,
siaꞌu monarima teꞌasesesa seende-endenya.
33 Siaꞌu nomongi tutuu eisiꞌoo,
patuvaya siaꞌu momoia eiriꞌini ane majari tevotuangmu mombolos tetuai niꞌami.
Patuvaya siia metencile concoono tesiaꞌa-siaꞌanya.
34 Ane tetuai heꞌua jio concoono siꞌami,
siaꞌu jio maala metencile umaꞌo eisiama niꞌami!
Siaꞌu jio mataan meꞌita teꞌasesesa nusiama niꞌami.