Tesiaꞌa-siaꞌa Langkai NiYusup Umaꞌo EiTana NuMesir Concoono SiBenyamin
43
1-2 Teorok eiTana nuKanaꞌan nentiang majaat.
Watu notouk tegando lamai teTana nuMesir,
siYakub nonjarita eiunga-unganya,
“Naꞌomo eiTana nuMesir ane pongolionye sedeꞌi sanu noꞌinang.”
3 Lamai heꞌua siYehuda nonyimbat eisiamanya.
“TeGubernuur nuMesir nolambota siꞌami tutuu.
Ane siꞌami jio mongomung tetuai niꞌami,
siꞌami jio maala netepojaok tegubernuur.
4 Ane siꞌoo mombee tetuai heꞌua umaꞌo concoono siꞌami,
siꞌami umaꞌo mongoli sanu noꞌinang.
5 Tapi,
ane siꞌoo jio mombee siBenyamin umaꞌo,
siꞌami jio umaꞌo,
karna tegubernuur heꞌua nonjarita,
‘Ane tetuaimu heꞌua jio concoono siꞌemiu,
siꞌemiu jio maala metepojaok siaꞌu.’ ”
6 SiYakuba noꞌutanya,
“Neteꞌuya siꞌemiu nepeꞌesesamo siaꞌu jaok nongular eitoo heꞌua,
siꞌemiu ulengi otuai?”
7 Siira nonyimbat,
“Tetoo heꞌua moꞌutanya mengkaning-ngkaning sima siꞌami ane terurus niꞌita,
‘Ulengi netuvu tesiama niꞌemiu?
Siꞌemiu ulengi otuai telangkai ntaninya?’
Siꞌami nonyimbat jojoo tepoꞌutanyaongnya.
Iamaꞌo siꞌami moꞌotoi siia momarentaa siꞌami mongomung tetuai niꞌami heꞌua?”
8 Lamai heꞌua siYehuda nonjarita eisiamanya,
“Tujumo teunga logas heꞌua concoono siaꞌu.
Siꞌami umaꞌo molongkang antau siꞌami,
siꞌoo ane teunga-unga niꞌita jio maate mooroꞌong.
9 Siaꞌu nojanji monjaga siia ane siamaꞌu maala monuntut siia lamai siaꞌu.
Ane siaꞌu jio mongomung siia metencile eisipapa,
b siaꞌu noꞌanggap nipapa masala jaok teeleo siaꞌu maate.
10 Ane siꞌita jio netaango neende,
rongkaning menekai umaꞌo siꞌita lamai teTana nuMesir.”
11 Lamai heꞌua siama niira nonjarita,
“Ane kanaboi sima heꞌua,
pogugauko sima eini:
omungo tehasil sanu mombosi lamai tetana eini,
embea eikarung-karung niꞌemiu sima tepombee eigubernuur heꞌua.
Mongomung sedeꞌi tesulu nuulam,
sedeꞌi temanisan,
tedamag,
tesulu sanu mombongi,
tevua-vua nubeau ane tevua-vua nubadam.
12 Omung valii tedoi rongkaning teꞌababarinya,
karna tedoi heꞌua jinaok eilalong nukarung kanaboi notencilea niꞌemiu.
Laboi jio tinutunggai niira monggauka heꞌua.
13 Omung valii tetuaimu,
ane metencile molongkang eigubernuur heꞌua
14 Siaꞌu momongi teꞌAlataꞌala Sanu Tututuu Mabaraka antau tegubernuur merasai moondong eisiꞌemiu,
jaok siBenyamin ane siSimeon nopatuvayaaꞌonya metencile concoono siꞌemiu.
Ane teunga-unga heꞌua kanaboi napada,
patuvaya sima heꞌua.”
15 Lamai heꞌua tesiaꞌa-siaꞌa langkai niYusup nongomung tepombee-pombee heꞌua ane tedoi rongkaning teꞌababarinya,
ane umaꞌo eiTana nuMesir concoono siBenyamin.
Najaok ampi heꞌua,
siira netepojaok concoono siYusup
16 Watu siYusup neꞌita siBenyamin ane tesiaꞌa-siaꞌanya,
siia nonjarita eitopondulunya,
“Omungo telangkai-langkai eini eivonuaꞌu.
Sambale sambaang tebinaatang ane monyadiaaꞌomo heꞌua,
karna moondak eleo siira menginang concoono siaꞌu.”
17 Tetopondulu nonggauka teparenta niYusup heꞌua ane nongomung telangkai-langkai umaꞌo eivonuanya.
18 Siira nobule karna siira inomung eivonua niYusup.
Siira nonjarita,
“Siꞌita inomung eiriꞌini,
karna tedoi sanu jinaok eikarung-karung niꞌita watu siꞌita najaok luulu.
Siira moraꞌop siꞌita,
ane mongala tekeledai niꞌita ane mopaꞌajari siꞌita tevotuang-votuang niira!”
19 Watu siira moꞌosuk eibamba nuvonua niYusup,
siira nonjarita eitopondulunya,
20 “Momongiampun bomanggeꞌu,
siꞌami luulu najaoko eiriꞌini mongoli sanu noꞌinang.
21-22 Watu siꞌami netencile ane najaok eipaio siꞌami motitindoung heꞌua,
siꞌami nombuꞌas tekarung-karung niꞌami.
Jio inototoi jojoo tedoi sanu pinombayara tegando umai eikarung-karung niꞌami.
Jio moꞌotoi sisee nongembea tedoi heꞌua.
Eꞌeini siꞌami nongomung vavalii tedoi heꞌua.
Siꞌami valii umai tedoi ntaninya antau mongolionye sanu noꞌinang.”
23 Tetopondulu heꞌua nonjarita,
“Nopaꞌasanang teambok niꞌemiu.
Inyaa mobule.
TeꞌAlataꞌala sanu sinombaa niꞌemiu ane niama niꞌemiu,
Siia sanu nentamaa tedoi heꞌua eilalong nukarung-karung niꞌemiu.
Siaꞌu nonarimamo tepombayarong nugando heꞌua.”
Lamai heꞌua siia nongomung siSimeon eisiira.
24 Lamai heꞌua siia nongomung siira naꞌo eilalong nuvonua.
Siia nombeena teogo antau monambas tepaa niira ane nomaꞌinang tekeledai-keledai niira.
25 Touk heꞌua siira nonyadiaa tepombee sanu noveena eisiYusup.
Inularaꞌomo eisiira,
siira menginang concoono siia moondak eleo.
26 Watu siYusup najaok eivonua,
siira nombeena tepombee eisiia ane noposuncul eitana.
27 SiYusup noꞌutanya eisiira,
“Mesehat siꞌemiu?
Siꞌemiu nonjaritamo eisiaꞌu sima tesiama niꞌemiu sanu neisimo heꞌua.
Siia ulengi tutuvu ane mesehat?”
28 Siira nonyimbat,
“Tesiama niꞌami,
tevotuangmu,
ulengi tutuvu ane nesehat.”
Lamai heꞌua siira nopotuꞌu ane noposuncul.
29 Watu siYusup neꞌita siira jojoo,
initanya siBenyamin,
tetuainya sanu senciina,
siia noꞌutanya,
“Eini tetuai niꞌemiu sanu pomabusong heꞌua,
sanu jinaritaa niꞌemiu?
TeꞌAlataꞌala nombarakai siꞌoo,
teungaꞌu.”
30 Touk heꞌua siYusup selengaan umaꞌo lamai riꞌua melolo tepotumangisong,
karna siia jio maala mataannya teꞌagalangnya neꞌita tetuainya heꞌua.
Siia mentama eilalong nukamarnya mboto ane notumangis eiriꞌua.
31 Touk heꞌua siia nendoup telionya ane umaꞌo eiaangnya.
Siia nontaang teondong eiamboknya eirururusnya ane nonuju tevotuangnya,
“Sadiaaꞌomo sanu noꞌinang!”
32 SiYusup nenginang eimejanya mboto,
ane terururusnya eimeja ntaninya.
Tetoo-too nuMesir sanu eiriꞌua menginang eimeja ntaninya valii,
karna menciing menginang concoono tetoo-too nuꞌIbrani.
33 Terururus niYusup mongodung tumoloa eisiia.
Siira tinuju mongodung monurut teꞌumur niira lamai terurus sanu siaꞌa jaok terurus sanu pomabusong.
Watu siira meꞌita tecara heꞌua,
siira mesisiligong ane meingu.
34 Siira vinenii sanu noꞌinang lamai temeja niYusup,
ane siBenyamin vinenii limangkaning teꞌababarinya heꞌuapa terurus ntaninya.
Siira nenginung ane madandalan concoono siYusup.