Tesiaꞌa-siaꞌa NiYusup Umaꞌo EiTana NuMesir Nongoli Tegando
42
1 Lamai heꞌua siYakub neꞌeepe umai tegando eiTana nuMesir,
siia nonjarita eiunga-unga langkainya,
“Inyaa siꞌemiu boi neꞌiꞌitaong!
2 Siaꞌu neꞌeepe umai tegando eiTana nuMesir.
Naꞌomo ane pongoli tegando heꞌua antau siꞌita netuvu ane jio maate nuorok.”
3 Karna heꞌua sompulutoo tesiaꞌa niYusup langkai umaꞌo mongoli tegando eiTana nuMesir.
4 Tapi siYakub jio nombee siBenyamin,
tetuai niYusup,
umaꞌo concoono siira,
siia nobule inyanyaa majari tesilaka eiunganya heꞌua.
5 Karna teorok eiTana nuKanaꞌan,
teunga-unga niYakub langkai concoono tetoo-too ntaninya umaꞌo mongoli tegando eiTana nuMesir.
6 SiYusup najarimo teGubernuur eiTana nuMesir,
ane siiamo sanu nobaluk tegando eijojoo tetoo eitana heꞌua.
Karna heꞌua tesiaꞌa-siaꞌanya najaok ane noposuncul eitolonya.
7 Watu siYusup neꞌita tesiaꞌa-siaꞌanya siia selengaan moꞌotoi siira.
Tapi siia pura-puraa jio moꞌotoi.
Siia nonyingga ane noꞌutanya eisiira,
“Siꞌemiu tetoo lamai paio?”
Siira nonyimbat,
“Siꞌami lamai teTana nuKanaꞌan ane najaok eiriꞌini mongoli sanu noꞌinang.”
8 SiYusup moꞌotoi tesiaꞌa-siaꞌanya,
tapi siira jio moꞌotoi siia.
9 Lamai heꞌua siia nolambot teupiongnya sima siira.
Siia nonjarita,
“Siꞌemiu eini tepongita-ngita.
Siꞌemiu najaok mongingitai eipaio tetana eini jio jinagai.”
10 Siira nonyimbat,
“Jio bogubernuur.
Siꞌami najaok mongoli sanu noꞌinang.
11 Siꞌami eini senciama,
ane siꞌami eini tetoo sanu mondolong,
jio tepongita-ngita.”
12 Tapi siYusup nonjarita eisiira,
“Jio tutuu!
Siꞌemiu najaok mongingitai eipaio tetana eini jio jinagai.”
13 Siira nonyimbat,
“Siꞌami eini sompulu rotoo sorurus,
siꞌami eini senciama eiTana nuKanaꞌan.
Tetuai sanu pomabusong niꞌami ulengi concoono siama niꞌami ane sotoo jiongo.”
14 SiYusup nonyimbat,
“Tutuunyamo sima tejaritaꞌu,
siꞌemiu eini tepongita-ngita.
15 Siaꞌu monyoꞌarai siꞌemiu.
Siaꞌu nojanji nonope tetope nupuang sima eini:
Ane tetuai niꞌemiu sanu pomabusong jio noꞌomung niꞌemiu menekai,
siꞌemiu jio metencile lamai tetana eini.
16 Tujumo sotoo lamai siꞌemiu metencile mongala tetuai niꞌemiu.
Sanu ntaninya notaang eipanjara eiriꞌini jaok tejarita niꞌemiu tutuu.
Ane jio,
siaꞌu nojanji nonope tetope nupuang,
siꞌemiu eini boi tepongita-ngita!”
17 Lamai heꞌua siira jojoo ntinamaa eipanjara teendenya tolueleo.
18 Nagana tolueleo siYusup nonjarita eisiira,
“Siaꞌu tetoo nobule ane nonuut eiꞌAlataꞌala.
Ane siꞌemiu monggauka sima eini,
siꞌemiu jio nohukum maate sima tepongita-ngita.
19 Ane siꞌemiu tetoo-too sanu mondolong patuvaya sotoo lamai siꞌemiu notaang eipanjara,
sanu ntaninya metencile ane mongomung tegando sanu inoli niꞌemiu untuk terururusmu sanu mooroꞌong.
20 Touk heꞌua siꞌemiu kanaboi mongomung sanu pomabusong eisiaꞌu.
Tegauk heꞌua mepopoꞌita siꞌemiu tetoo-too sanu mondolong ane siꞌemiu jio nohukum maate.”
Siira nonuut siYusup.
21 Lamai heꞌua siira nejajaritaong,
“Siꞌita hinukum karna teꞌasasala niꞌita eituai niꞌita.
Maampo siꞌita neꞌita siia nasesa ane siia nonjarita,
‘Ondona agalani siaꞌu,’
siꞌita jio nonulung siia.
Heꞌua sabanya siꞌita naꞌaala teꞌasesesa eini.”
22 SiRuben nonjarita,
“Luulu siaꞌu nonjarita eisiꞌemiu inyaa nosilakai tetuai heꞌua.
Siꞌemiu jio noꞌinepea.
Eꞌeini siꞌita pinesavai karna siia maate.”
23 SiYusup moꞌotoi tesapa sanu jinaritaa niira,
tapi siira jio moꞌotoi heꞌua,
karna siira nonjarita concoono siYusup nepake tetoo sanu nombatuaa tebasa.
24 SiYusup nolinjoꞌi siira,
ane notumangis.
Touk notumangis,
siia netencile eisiira ane nonjaritaonye concoono siira.
Lamai heꞌua nongala siSimeon.
Siia inotoi eitolo nurururusnya.
Terururus NiYusup Netencile Umaꞌo EiTana NuKanaꞌan
25 Lamai heꞌua siYusup nomarentaa antau tekarung-karung sanu inomung nurururusnya noisii tegando,
ane tedoi niira sosotoo noꞌembea eikarung-karung heꞌua.
Siia nomarentaa valii antau vineena tevalung noꞌinang eijalang.
Teparentanya heꞌua ginauka.
26 Touk heꞌua siaꞌa-siaꞌa niYusup nelulang tegando eibabok nukeledai-keledai niira.
Lamai heꞌua siira umaꞌomo.
27 Lamai heꞌua siira nengondok eipaio siira motitindoung.
Sotoo lamai siira nombuꞌas tekarung untuk momaꞌinang tekeledainya.
Initanya tedoi eibabok nugando heꞌua.
28 Jinaritaaꞌonya eirururusnya,
“Tedoiꞌu tinencilea.
Itai,
umai eikarungu eini!”
Neꞌita tedoi heꞌua siira nesisiligong.
Siira nobule ane gugugur.
Siira nejajaritaong,
“Masesa tutuu sanu ginauka nuꞌAlataꞌala eisiꞌita!”
29 Watu siira najaok eiTana nuKanaꞌan,
siira nongulara eisiama niira tesapa sanu najari.
Siira nonjarita,
30 “TeGubernuur nuMesir nonyingga ane nonjarita eisiꞌami,
‘Siꞌemiu eini tepongita-ngita.’
31 Siꞌami nonyimbat,
‘Siꞌami tetoo-too sanu mondolong,
jio tepongita-ngita.
32 Siꞌami jojoo sompulu rotoo,
senciama,
ane sotoo lamai siꞌami jiongo,
sanu pomabusong concoono siama niꞌami eiTana nuKanaꞌan.’
33 Tegubernuur heꞌua nonjarita,
‘Siaꞌu monyoꞌarai siꞌemiu antau meꞌita siꞌemiu tetoo-too sanu mondolong atau jio.
Sotoo lamai siꞌemiu notalau,
sanu ntaninya metencile ane mongomung tegando eirururus niꞌemiu sanu mooroꞌong.
34 Watu siꞌemiu metencile ane mongomung tetuai niꞌemiu sanu pomabusong heꞌua,
siaꞌu moꞌotoi siꞌemiu jio tepongita-ngita,
tapi tetoo-too sanu mondolong.
Terurusmu sanu tinaangu,
utencilea eisiꞌemiu,
ane siꞌemiu maala majaok eitana eini mongoli tegando.’ ”
35 Watu siira nopoꞌokosong tekarung-karung niira,
siira neꞌita tedompet-dompet niira sosotoo sanu eisi tedoi.
Meꞌita tedoi heꞌua,
siira ane tesiama niira nobule.
36 Tesiama niira nonjarita,
“Siꞌemiu nonyabaa teunga-ungaꞌu napada.
b SiYusup jiongo ane siSimeon jiongo valii.
Eꞌeini siꞌemiu seilu mongala siBenyamin valii.
Siaꞌu tutuu masesamo karna jojoo tegauk niꞌemiu.”
37 Lamai heꞌua siRuben nonjarita eisiamanya,
“Veenaꞌomo siBenyamin eisiaꞌu,
jamo siaꞌu mongomung siia metencile.
Ane jio,
siꞌoo maala momate rotoo teungaꞌu sanu langkai.”
38 Tapi siYakub nonjarita,
“Jio!
SiBenyamin jio maala noꞌomung niꞌemiu.
Siaꞌanya naatemo ane eꞌeini boi siia sanu ulengi netuvu lamai siira senciina.
Siaꞌu eini meisimo.
Ane siia mesilaka eipelampaong heꞌua siꞌemiu monyabaa siaꞌu maate nuondong.”