SiYusup Nombatuaa Teupiong-upiong NuPuang NuMesir
41
1 Nalabat rontoung,
tePuang nuMesir nongupi siia neꞌoro eipipit nuBangkalang nuNil.
2 Jio inototoi pitumbaang tesapi sanu magaya ane nempobogor,
nesuvung lamai tebangkalang ane nompamulamo nenginang tegugus eipipit nubangkalang heꞌua.
3 Lamai heꞌua pitumbaang tesapi sanu ntaninya nesuvung valii.
Tebinaatang-binaatang heꞌua nepodengkeng ane makajal.
Tesapi-sapi sanu nepodengkeng heꞌua neꞌoro eisevi nusapi-sapi sanu nempobogor,
eipipit nubangkalang heꞌua.
4 Lamai heꞌua tesapi-sapi sanu makajal ane nepodengkeng heꞌua nenginang tesapi-sapi sanu magaya ane nempobogor heꞌua.
Touk heꞌua tepuang nembaung.
5 Lamai heꞌua neteꞌoturuonye ane nongupi orongkaninaꞌonya sembengi heꞌua.
Eilalong nuupiongnya siia neꞌita sampaa tegando sanu eisi pitupapaanong tegando sanu eisi ane natasak.
6 Lamai heꞌua netuvuonye valii pitupapaanong tegando sanu ntaninya,
sanu nepodengkeng ane nekungkurutong noꞌogal karna tebarat sanu moondak.
7 Lamai heꞌua tegando sanu nedengkeng heꞌua nongonyok pitupapaanong sanu eisi eikokua.
Touk heꞌua tepuang nembaung ane nasadar siia nongupionye!
8 Titieleonyamai tepikiran nupuang nabalesa,
karna heꞌua siia nonuju tetoo noleva jojoo tesando ane jojoo tetoo sanu mapande eiTana nuMesir.
Heꞌuapa jinaritaaꞌonya teupiongnya eisiira,
tapi jio sotoo sanu maala mombatuaaꞌonya.
9 Lamai heꞌua tetoponyadiaa sanu noinung nupuang nonjarita eipuang,
“Eleo eini siaꞌu nolambot teꞌasasalaꞌu.
10 Luulu sipuangu nongoungkul eitopogutu teroti ane eisiaꞌu,
heꞌuapa siꞌami ntinamaa eilalong nupanjara,
eivonua nutopomimpin nutoo-too sanu monjaga tepuang.
11 Vavalii sembengi siꞌami nongupi,
ane teupiong niꞌami jio selilio tebatuanya.
12 Sotoo teunga logas nuꞌIbrani,
umai ampi heꞌua concoono siꞌami.
Siia tevotuang nutopomimpin nutoo-too sanu monjaga tepuang.
Siꞌami nonjaritaa teupiong-upiong niꞌami eisiia,
heꞌuapa binatuaaꞌonya teupiong-upiong heꞌua.
13 Jojoo mapaas najari sima inularaꞌonya.
Sipuang nonencilea tepangkaꞌu sima pamulaongnya,
tapi tetopogutu teroti heꞌua hinukum naate.”
14 Lamai heꞌua tepuang nonuju tetoo moleva siYusup.
Selengaan siia sinuvuna lamai tepanjara.
Touk heꞌua siYusup nongkour ane nombolos tepakeannya,
heꞌuapa siia umaꞌo eisipuang.
15 Tepuang nonjarita eisiia,
“Siaꞌu nongupi,
ane jio umai sotoo sanu maala mombatuaaꞌonya.
Umai sanu nokarevaa eisiaꞌu,
siꞌoo boi meꞌeepe teupiong-upiong ane maala mombatuaaꞌonya.”
16 SiYusup nonyimbat,
“Jio siaꞌu,
bopuang,
boi teꞌAlataꞌala sanu mombatuaa ane mombee tebatuanya sanu mombosi.”
17 Lamai heꞌua nonjarita tepuang,
“Siaꞌu nongupi pepees neꞌoro eipipit nuBangkalang nuNil.
18 Heꞌuapa jio inototoi pitumbaang tesapi sanu magaya ane nempobogor,
nesuvung lamai tebangkalang ane nompamulamo nenginang tegugus eipipit nubangkalang heꞌua.
19 Heꞌuapa nesuvung valii pitumbaang tesapi sanu ntaninya,
sanu nepodengkeng ane tebinaatang-binaatang heꞌua nepodengkeng makajal.
Siaꞌu jiompo neꞌita tesapi makajal tutuu sima heꞌua eijojoo eiTana nuMesir.
20 Tesapi-sapi sanu nepodengkeng nenginang notouk tesapi-sapi sanu nempobogor eikokua.
21 Tapi touk heꞌua tesapi-sapi sanu makajal heꞌua ulengi makajal.
Heꞌuapa siaꞌu nembaung lamai tepoꞌoturuꞌu.
22 Lamai heꞌua siaꞌu neteꞌoturuonye ane nongupi orongkaninaꞌonya sembengi heꞌua.
Eilalong nuupiongnya siaꞌu neꞌita sampaa tegando sanu eisi pitupapaanong tegando sanu eisi ane natasak.
23 Lamai heꞌua netuvu valii pitupapaanong tegando sanu malante,
nekungkurutong ane noꞌogal karna moondak.
24 Tepapaanong nugando sanu nedengkeng heꞌua nongonyok tepapaanong sanu eisi eikokua.
Jinaritaaꞌumo rongaya teupiongu heꞌua eisando-sando,
tapi jio umai sotoo sanu maala mombatuaaꞌonya.”
25 SiYusup nonjarita eisipuang,
“Rongaya teupiong heꞌua selio-lio tebatuanya.
TeꞌAlataꞌala nongulara eisipuangu tesapa sanu nogaukaꞌo-Nya.
26 Pitumbaang tesapi sanu mombosi heꞌua tebatuanya pituntoung,
ane pitupapaanong tegando sanu eisi heꞌua pituntoung valii.
Rongaya teupiong heꞌua selio-lio tebatuanya.
27 Pitumbaang tesapi sanu nepodengkeng ane makajal,
sanu nesuvung lamai tebangkalang heꞌua ancunaꞌonya ane pitupapaanong tegando sanu nedengkeng ane nekungkurutong karna tebarat sanu moondak.
Heꞌua teꞌajajaok nuorok eꞌendenya pituntoung.
28 Sima inularaꞌu eisipuangu,
teꞌAlataꞌala nepopoꞌitaaꞌomo eisipuang tesapa sanu nogaukaꞌo-Nya.
29 Jamo majaok pituntoung tehasil mabari eijojoo tejoꞌong eiTana nuMesir.
30-31 Touk heꞌua majaok pituntoung teorok,
ane tehasil nujoꞌong mabari heꞌua noꞌelingana tututuu,
karna watu teorok heꞌua majaat tutuu jaok tetana eini majari moꞌogal.
32 Teupiong-upiong najari rongkaning,
heꞌua tebatuanya tegauk heꞌua tinantua nuꞌAlataꞌala ane teꞌAlataꞌala sedeꞌipo monggaukaꞌonya.
33 Karna heꞌua,
aginyamo sipuang momile sotoo sanu mapande ane moꞌotoi mabari ane mombeniinya tekuasa mongatur teTana nuMesir.
34-35 Aginyamo valii sipuang momile lasiatoo ntaninya,
ane mombenii siira tekuasa antau mongincona sakarung lamai limakarung lamai jojoo tepelolu tegando eꞌendenya pituntoung sanu tepelolu mabari heꞌua,
ane monambunaꞌonya eikota-kota ane monjagainya.
36 Tegando sanu notambuna heꞌua majari sanu noꞌinang eꞌendenya pituntoung eꞌende nuorok sanu majaok eiTana nuMesir.
Ane sima heꞌua tetoo-too jio maate nuorok.”
SiYusup Inengkat Majari TeGubernuur EiTana NuMesir
37 Tepuang ane jojoo tetoonya sanu apangka seilu terancana niYusup heꞌua.
38 Lamai heꞌua tepuang nonjarita eisiira,
“Jio umai siꞌita maꞌaala tetoo sima eini,
karna siYusup tinuluni nuꞌAlus nuꞌAlataꞌala.”
39 Lamai heꞌua tepuang nonjarita eisiYusup,
“Karna teꞌAlataꞌala nongulara jojoo eini eisiꞌoo,
jio umai tetoo ntaninya sanu mapande ane moꞌotoi mabari sima siꞌoo.
40 Siꞌoo uengkat majari tegubernuur,
ane jojoo tetooꞌu monuruꞌi teparentamu.
Boi siaꞌu sanu nelabi mokuasa heꞌuapa siꞌoo.”
41-42 Notouk heꞌua tepuang nongalina lamai tebubuanong nulimanya tesincing sanu otanda nupomarenta,
ane ntinamaaꞌonya eibubuanong nulima niYusup ane nonjarita,
“Nomake tesincing eini siꞌoo uengkat majari tegubernuur eijojoo teTana nuMesir.”
Lamai heꞌua pinakeaꞌonya eisiYusup sabala tejuba sanu maꞌalus,
ane sinogotaꞌonya eigorogot niYusup salae terante bulaan.
43 Heꞌuapa vineenaꞌonya eisiYusup tekareta sanu ororuaaꞌonya majari tepesaveongnya,
ane tetoponjaga-toponjaga nupuang umaꞌo eitolo nukareta heꞌua ane oula-ular,
“Jagai!
Venii tejalang!
Venii tejalang!”
Sima heꞌua siYusup inengkat majari tegubernuur eijojoo teTana nuMesir.
44 Tepuang nonjarita eisiia,
“Siaꞌu tepuang ane siaꞌu nongulara sima eini.
Ane jio noveena niꞌoo,
jio umai sotoo eijojoo tepomoiaong eiTana nuMesir maala monggauka tesapa-sapa.”
45-46 Lamai heꞌua tepuang nombeena tetope nuMesir eisiYusup,
heꞌua siSavnat-Paaneah.
Vineenaꞌonya valii sotoo telapi sanu tinope siꞌAsnat,
teunga niPotivera,
teꞌimam nuKota nuꞌOn.
Jadi sima heꞌua siYusup najari sanu nomarenta jojoo tetoo eiTana nuMesir.
Teꞌumur niYusup 30 ntoung watu siia nompamula tepokarajaaongnya eiPuang nuMesir.
Lamai heꞌua siYusup umaꞌo lamai tevonua nupuang nomaliti jojoo tetana.
47 Eilalong nupituntoung teꞌakakaya heꞌua,
tetana mohasila tepelolu sanu nabari tutuu.
48 SiYusup nomarentaa tegando heꞌua inincona ane tinambuna eikota-kota.
Eilalong jojoo tekota inembea tegando tehasil nujoꞌong-joꞌong sanu moꞌosuk tekota-kota heꞌua.
49 Tegando sanu tinambunaꞌonya heꞌua nabari tutuu jaok siYusup nengondok norekengnya,
karna teꞌababarinya sima tebayas eipipit nudagat.
50 Jijiompo teorok heꞌua najaok,
siꞌAsnat,
telapi niYusup,
noguungaa rotoo teunga langkai.
SiꞌAsnat heꞌua teunga niPotivera,
teꞌimam nuKota nuꞌOn.
51 SiYusup nonjarita,
“TeꞌAlataꞌala nogutu siaꞌu nongelingana jojoo teꞌasesesaꞌu ane terururusu concoono tesiamaꞌu.”
Karna heꞌua tinopeinya teunganya sanu siaꞌa siManasye.a
52 Siia nongular valii,
“TeꞌAlataꞌala nombeenaꞌomo teunga-unga eisiaꞌu eitana nuꞌosususaꞌu.”
Heꞌuapa tinopeinya teunganya sanu ororuaaꞌonya “siꞌEvraim.”b
53 Pituntoung teꞌakakaya sanu irasai eiTana nuMesir heꞌua nonouk.
54 Lamai heꞌua najaok pituntoung tewatu nuorok,
mapaas sima sanu jinaritaa niYusup.
Eipapaio najari teorok,
tapi jojoo tetoo eiTana nuMesir umai sanu noꞌinang.
55 Lamai heꞌua jojoo tetoo nuMesir nompamulamo masesa nuorok,
siira nomongi sanu noꞌinang lamai tepuang.
Lamai heꞌua tepuang nonjarita eisiira,
“Umaꞌo eisiYusup,
gaukaꞌomo tesapa sanu noularaꞌonya eisiꞌemiu.”
56 Watu teorok heꞌua najari majaat tutuu ane eipapaio,
siYusup nomboꞌaa jojoo tepongembeong ane nobaluk tegando eitoo-too nuMesir.
57 Lamai jojoo tepomoiaong eijuniaa tetoo-too najaok eiTana nuMesir mongoli tegando lamai siYusup,
karna tetoo-too eipapaio mandasa tutuu lamai teorok heꞌua.