SiYusup Nombatuaa Teupiong-upiong
40
1 Touk tegauk-gauk heꞌua rotoo tevotuang nuPuang nuMesir,
heꞌua tetoponyadiaa sanu noinung nupuang ane tetopogutu terotinya,
nogutu teꞌasasala eipuang.
2 Nongoungkul tepuang eirotoo tetoo sanu apangka heꞌua.
3 Karna heꞌua siira ntinamaaꞌonya eilalong nupanjara eivonua nutopomimpin nutoo-too sanu monjaga tepuang,
eipomoiaong siYusup tinaang.
4 Tetopomimpin nutoo-too sanu monjaga tepuang nomile siYusup nonulung siira.
Siira pinanjaraa ampi heꞌua neende.
5 Vavalii sembengi tetoponyadiaa sanu noinung nupuang ane tetopogutu terotinya heꞌua rotoo nongupi.
Tebatua nuupiong niira heꞌua jio selio-lio.
6 Modondong titieleo siYusup najaok eisiira.
Siira initanya mosusa teambok.
7 Lamai heꞌua siia noꞌutanya eisiira,
“Neteꞌuya siꞌemiu mosusa teambok eleo eini?”
8 Siira nonyimbat,
“Eimondoung siꞌami nongupi,
tapi jio umai sanu maala mombatuaaꞌonya.”
SiYusup nonjarita eisiira,
“Boi teꞌAlataꞌala sanu maala mogutu tetoo mombatuaa teupiong.
Soꞌarai jaritaa teupiongmu heꞌua.”
9 Lamai heꞌua tetoponyadiaa sanu noinung nonjaritaa teupiongnya,
“Eilalong nuupiong heꞌua siaꞌu neꞌita tepuu nuꞌanggur eitoloꞌu.
10 Tepuu heꞌua umai tolumpanga.
Tepanga-panga heꞌua paꞌali manaꞌaro mesumpi,
selengaan tebanca-bancanya nesuvung,
lamai heꞌua tevuanya najari natasak.
11 Watu heꞌua siaꞌu pepees nonggama tepenginunong nupuang,
jadi siaꞌu nongala tevua nuꞌanggur heꞌua ane siaꞌu nomojot eilalong nupenginunong nupuang,
lamai heꞌua siaꞌu nombeena eisiia.”
12 SiYusup nonjarita,
“Einimo tebatuanya:
Tolumpanga heꞌua tebatuanya tolueleo.
13 Eilalong tolueleo eini tepuang molapasa siꞌoo,
siia mongampuni siꞌoo ane monencilea siꞌoo eipangkamu sanu luulu.
Siꞌoo mombee tepenginunong eipuang sima luulu.
14 Tapi molambot siaꞌu watu siꞌoo mombosimo.
Tuluni ulara sima siaꞌu eipuang,
antau siaꞌu nolapasa lamai tepanjara eini.
15 Karna,
otutuunya luulu siaꞌu inangga lamai tetana nutoo-too nuꞌIbrani ane eiriꞌini valii,
eiTana nuMesir eini,
jio umai siaꞌu nonggauka sanu majaat.
Jio masipato ntinamaa eilalong nupanjara.”
16 Touk tetopogutu teroti heꞌua neꞌeepe sima tebatua nuupiong tetoponyadiaa sanu noinung nupuang heꞌua nombosi,
siia nonjarita eisiYusup,
“Siaꞌu nongupi valii.
Siaꞌu nonyuung tolukaranji teroti neuncuncunong eibabok nuvaꞌi.
17 Eilalong nukaranji sanu eibabonya tutuu jinaok nengangayaonga teroti nupuang,
tapi temamanuk najaok nenginang sanu eilalong nukaranji sanu sinuungu heꞌua.”
18 SiYusup nonjarita,
“Eini tebatua nuupiong heꞌua:
Tolukaranji heꞌua tebatuanya tolueleo.
19 Eilalong tolueleo eini tepuang molapasa siꞌoo lamai tepanjara ane monuju tetoo mongkolog tevaꞌimu lamai heꞌua mentoena tebatangmu eisamata teerii,
ane temamanuk menginang teisimu.”
20 Tolueleo lamai heꞌua tepolambot teeleo sipuang pinoguungaa,
ane siia nogutu teparoa nooge eijojoo tetoonya sanu apangka.
Siia nomarentaa antau tetoponyadiaa sanu noinung nupuang ane tetopogutu teroti nolapasa lamai tepanjara ane noꞌomung eitolo jojoo tetoo sanu apangka heꞌua.
21 Tetoponyadiaa sanu noinung nupuang tinencileaꞌonya eipangka sanu luulu.
Siia nombeeonye tepenginunong eipuang.
22 Tapi tetopogutu teroti hinukum naate.
Jojoo heꞌua najari sima jojoo tesapa sanu inulara niYusup.
23 Tapi tetoponyadiaa sanu noinung nupuang heꞌua jio nolambot valii eisiYusup.
Siia tututuu nongelinganinya.