SiYusup Ane Telapi NiPotivar
39
1 SiYusup inomung nutoo-too nuꞌIsmael eiTana nuMesir,
ane pinobaluk eisiPotivar,
tetoo nuMesir,
sanu apangka nupuang,
tetopomimpin nutoo-too sanu monjaga tepuang.
2 TeSiopua nonagui siYusup jaok siia kalepu ohasil eilalong nupokarajaaongnya.
Siia nomoia eivonua nutogunya,
tetoo nuMesir heꞌua.
3 SiPotivar neꞌita teSiopu concoono siYusup ane jojoo sanu nogauka niYusup ohasil sanu mombosi.
4 SiPotivar nasanang teambok eisiYusup ane nongengkatnya najari tetopondulunya.
Lamai heꞌua siYusup vineena tekuasa eibabok jojoo tetoo eivonuanya ane eibabok jojoo tesasagaranya.
5 Mompamula lamai watu heꞌua,
karna siYusup,
teSiopu nombarakai tetoo nuMesir heꞌua ane jojoo tesasagaranya sanu eivonua ane eijoꞌongnya.
6 Jojoo tesasagara niPotivar pinarcayaaꞌonya eisiYusup.
Karna heꞌua siPotivar jio paraluu momikir sima tepokarajaaong eivonua boi momikir sima sanu noꞌinang.
SiYusup heꞌua moꞌuig ane magaya.
7 Lamai heꞌua,
telapi niPotivar manaꞌaro meseilua eisiYusup,
lamai heꞌua siYusup pineubunya moꞌoturu concoono.
8 SiYusup jio seilu,
ane nonjarita eisiia,
“SiPotivar nomarcayaa jojoo tesagaranya eisiaꞌu.
Siia jiongo paraluu nomikira tesapa-sapa eivonua eini.
9 Eiriꞌini siaꞌu nokuasa selio-lio tekuasanya.
Jojoo pinarcayaaꞌonya tapi siꞌoo jio karna siꞌoo telapinya.
Siaꞌu tutuu jio maala monggauka sanu majaat sima heꞌua ane moꞌodosa eiꞌAlataꞌala!”
10 Maampo telapi niPotivar tatarus neubu siYusup seeleo-seeleo,
tapi siia jio seilu moꞌoturu concoono siia.
11 Vavalii seeleo sima heꞌua,
siYusup nentama eilalong nuvonua monggauka tepokarajaaongnya,
jio umai eiriꞌua sotoo tevotuang sanu ntaninya.
12 Telapi niPotivar nondiit tebaju niYusup ane nonjarita,
“Maemo siꞌita moꞌoturu concoono.”
Tapi tebaju niYusup netetalau eilima nubengkel heꞌua ane siia nelinjok nesuvung.
13 Watu telapi niPotivar neꞌita siYusup nelinjoko ane tebajunya netetalau,
14 siia noleva tevotuang-votuangnya langkai ane nonjarita,
“Arai itai!
Tetoo nuꞌIbrani sanu inomung nulapiꞌu eivonua eini,
nonjaati siꞌita.
Siia nentama eilalong nukamaru ane seilu moꞌoturu concoono siaꞌu,
tapi siaꞌu neroroa noporos.b
15 Watu siia neꞌeepe siaꞌu neroroa,
siia nelinjok umaꞌo eiaangnya ane tebajunya netetalau.”
16 Lamai heꞌua silapi niPotivar nongembea tebaju heꞌua eisevinya jaok silapinya metencile.
17 Watu silapinya netencile,
siia lolongkang nonutura tejarita heꞌua eisilapinya,
“Tetoo nuꞌIbrani sanu inomung niꞌoo menekai heꞌua,
nentama eikamaru ane seilu monjaati siaꞌu.
18 Tapi siaꞌu neroroa,
siia nelinjok umaꞌo eiaangnya ane tebajunya netetalau.”
19 Watu siPotivar neꞌeepe tejarita nilapinya,
siia najari nongoungkul tututuu.
20 Siia nomarentaa antau siYusup selengaan noraꞌop ane nontamaa eilalong nupanjara,
concoono sanu pinanjaraa nupuang.
21 Tapi teSiopu nonagui siYusup ane tatarus inagalani-Nya,
karna heꞌua tetopomimpin nupanjara magalang eisiia.
22 Tetopomimpin heꞌua nomarcayaa tetoo-too sanu pinanjara ntaninya eisiYusup,
ane siYusup sanu vineena tekuasa nomimpin jojoo tepokarajaaong sanu nogauka eilalong nupanjara heꞌua.
23 Tetopomimpin nupanjara heꞌua jiongo nomikir jojoo sanu pinarcayaa eisiYusup,
karna teSiopu nonagui siia jaok siia ohasil eilalong jojoo tepokarajaaongnya.