SiYehuda Ane SiTamar
38
1 Eiwatu heꞌua siYehuda nolinjoꞌi terururusnya ane nomoia concoono sotoo telangkai sanu tinope siHira.
SiHira heꞌua tetoo nuꞌAdulam.
2 Eiriꞌua siYehuda neꞌuꞌutanyaong concoono sotoo tebengkel nuKanaꞌan,
teunga niSyua,
lamai heꞌua siira nelalapiong ane noꞌoturu concoono.
3 Lamai heꞌua tebengkel heꞌua nolumalo ane noguungaa sotoo teunga langkai.
SiYehuda nonopeinya siꞌEr.
4 Heꞌuapa telapinya nolumaloonye lamai heꞌua noguungaa.
Teunga ororuaaꞌonya valii telangkai,
tinopeinya siꞌOnan.
5 Heꞌuapa telapinya nolumaloonye lamai heꞌua noguungaa.
Teunga ototoluaꞌonya valii telangkai,
ane tinopeinya siSyela.
Watu siSyela pinoguungaa soungaong niYehuda nomoia eiKota nuKesib.
6 Watu moogemo siꞌEr,
teunga pomabusong niYehuda,
siia pinopolapi niamanya concoono sotoo tebengkel,
tetopenya siTamar.
7 Tapi tegauk-gauk niꞌEr,
teunga pomabusong niYehuda heꞌua,
majaat tutuu eipongita nuSiopu,
a jaok teSiopu nomate siia.
8 Lamai heꞌua siYehuda nonjarita eisiꞌOnan tetuai niꞌEr,
“Naꞌomo eitimbala nusiaꞌamu,
ane poꞌoturu concoono siia monurut teꞌaturan sanu tinantua nuada niꞌita eiipag langkai,
b antau tesiaꞌamu maꞌaala tebija.”
9 Tapi,
ane tetimbala nusiaꞌanya heꞌua noꞌounga,
siꞌOnan moꞌotoimo teunga heꞌua jio noanggap teunganya,
boi teunga nusiaꞌanya.
Jadi,
ane siia noꞌoturu concoono tetimbala nusiaꞌanya heꞌua,
pinatuvayaaꞌonya temaaninya sinuvuna eiaangnya antau tesiaꞌanya jio maꞌaala tebija.
10 Tapi tegauk-gauk niꞌOnan heꞌua,
majaat tutuu eipongita nuSiopu,
jaok teSiopu nomate siia valii.
11 Lamai heꞌua siYehuda nonjarita eisiTamar tetomodaitnya heꞌua,
“Petencilemo eivonua nusiamamu ane pomoia eiriꞌua sima tetimbala jaok teungaꞌu siSyela majari mooge.”
Siia nonjarita sima heꞌua karna nobule inya-inyaa siSyela nopatei nuSiopu valii,
sima rotoo tesiaꞌanya.
Lamai heꞌua netencilemo siTamar eivonua nusiamanya.
12 Lasiantoung lamai heꞌua telapi niYehuda naate.
Touk siia noondong,
siia umaꞌo eipaio tetoo-too sanu negoncing tevulu nudomba-dombanya eiKota nuTimna concoono siHira,
tetagunya tetoo nuꞌAdulam.
13 SiTamar neꞌeepe tekareva sima siYehuda temeniangnya majaok eiTimna antau megoncing tevulu nudomba-dombanya.
14 Lamai heꞌua siia nombolos tepakean nutimbalanya nepake tepakean ntaninya.
Telionya inompotinya nepake tepongompot,
lamai heꞌua siia nongodung eibamba nuKota nuꞌEnaim,
eijalang sanu umaꞌo eiTimna.
SiTamar moꞌotoi siSyela,
teunga niYehuda sanu pomabusong,
nabaꞌayo,
tapi siia jiompo valii pinopolapi concoono teunga logas heꞌua.
15 Watu siYehuda neꞌita siTamar,
pinikirnya tebengkel heꞌua sotoo telonte,
karna telionya inompoti.
16 Lamai heꞌua siYehuda nongosuꞌinya eipipit nujalang heꞌua,
ane nonjarita,
“Maemo,
siaꞌu seilu moꞌoturu concoono siꞌoo.”
Siia jio moꞌotoi tebengkel heꞌua tetomodaitnya mboto.
SiTamar nonyimbat,
“Ane siaꞌu moꞌoturu concoono siꞌoo,
tesapa noveena niꞌoo eisiaꞌu?”
17 SiYehuda nonjaritaonye,
“Siaꞌu momaꞌatu eisiꞌoo sambaang tebembe sanu molumbi lamai tekaawan nupetuvuongu.”
SiTamar nonyimbat,
“Maala,
tapi kanaboi umai sanu notagala,
jaok siꞌoo momaꞌatu tebembe heꞌua.”
18 SiYehuda noꞌutanya,
“Notagala tesapa?”
SiTamar nonyimbat,
“Veena siaꞌu tesitempel niꞌoo concoono tetalinya ane tetoꞌon sanu diniit niꞌoo heꞌua.”
SiYehuda nombeena tesasagara heꞌua eisiia,
lamai heꞌua siira noꞌoturumo concoono,
ane siTamar najari nolumalo.
19 SiTamar netencile eivonuanya ane nombuꞌas tepongompot sanu nongompoti telionya,
lamai heꞌua nombolos tepakean,
nepakeonye tepakean nutimbalanya.
20 Jio meende lamai heꞌua siYehuda nonuju siHira,
tetagunya,
mongomung tebembe heꞌua ane momongi notencilea sanu tinagala,
tapi siHira jio naꞌajaok tebengkel heꞌua.
21 SiHira noꞌutanya eilangkai-langkai eiꞌEnaim,
“Eipaio telonte sanu biasa metaang eipipit nujalang eini?”
Siira nonyimbat,
“Jio umai olonte eriꞌini.”
22 Lamai heꞌua netencile siHira eisiYehuda ane nonjarita,
“Siaꞌu jio naꞌajaok tebengkel heꞌua.
Telangkai-langkai ampi heꞌua nonjarita jio umai olonte eiriꞌua.”
23 SiYehuda nonjarita,
“Patuvaya tesasagara heꞌua majari tesasagaranya antau tetoo-too jio megisii siꞌita.
Siaꞌu nomaꞌatuaꞌomo tebembe eini,
tapi siꞌoo jio monjaoꞌi siia.”
24 Kira-kira tolumbulang lamai heꞌua inulara eisiYehuda sima siTamar tetomodaitnya nogugauk sima telonte ane nolumalomo.
Lamai heꞌua siYehuda nonuju,
“Alamo siia ane rampuni siia jaok maate!”
25 Watu siTamar inomung eiaangnya,
siia nomaꞌatu tetutuunong eimeniangnya langkai,
jinaritaaꞌonya,
“Siaꞌu ilumaloi nutogusasagara eini.
Paresamo sisee togusitempel concoono tetalinya ane tetoꞌon eini.”
26 SiYehuda neꞌita tesasagara heꞌua ane nonjarita,
“Tebengkel heꞌua jio osala.
Siia mondolong heꞌuapa siaꞌu,
karna siaꞌu jio molapia siia concoono teungaꞌu siSyela.”
Touk heꞌua siYehuda jiongo noꞌoturuonye concoono siTamar.
27 Watu najaoko tewatu siTamar noguunga,
mapataso umai teunga nepinga eilalong nuꞌoungaongnya.
28 Pepees siia noguungaa,
sotoo teunga nepinga heꞌua nonyuvuna telimanya,
lamai heꞌua tesando nonggama telima nuunga ane nongkoto tegapas sanu mododa.
Siia nonjarita,
“Teunga eini nesuvung luulu.”
29 Tapi teunga heꞌua nonggiur telimanya vavalii,
ane teunga sanu ntaninya pinoguungaa luulu.
Lamai heꞌua tesando nonjarita,
“Moꞌuig tutuu siꞌoo nomamaris nesuvung!”
Karna heꞌua teunga sanu pinoguungaa luulu heꞌua tinopeinya siPeres.c
30 Touk heꞌua pinoguungaaꞌomo tetuainya sanu telimanya umai ogapas sanu mododa.
Siia vinenii tetope siSerah.d