Teupiong-upiong NiYusup
37
1 SiYakub nomoia eiTana nuKanaꞌan,
tetana sanu pinongalalampai niamanya.
2 Eini tetuturong tebija niYakub.
Watu siYusup,
teunga niYakub teꞌumurnya 17 ntoung,
siia nomiara tebembe-bembe ane tedomba-domba concoono tesiaꞌa-siaꞌa,
heꞌua teunga-unga niBilha ane niSilpa,
rotoo tesarue nusiamanya.
Siia nonjarita eisiamanya tegauk-gauk majaat sanu ginauka nusiaꞌa-siaꞌanya.
3 SiYakub nagalang eisiYusup heꞌuapa jojoo teunganya sanu ntaninya,
karna siYusup pinoguungaa niinanya watu siamanya neisimo.
Vavalii seeleo pinogutuaꞌonya siYusup sabala tejuba sanu mombosi tutuu.
4 Watu tesiaꞌa-siaꞌa niYusup neꞌita tesiama niira nagalang eisiYusup heꞌuapa eisiira,
siira nengkeles eisiYusup.
Siira jiongo nonjarita sanu mombosi eisiia.
5 Vavalii sembengi siYusup nongupi,
ane watu siia nongulara teupiongnya heꞌua eisiaꞌa-siaꞌanya,
siira nentiang nengkeles eisiia.
6 SiYusup nonjarita eisiira,
“Arai poꞌinepea teupiong sanu pinongupiꞌu eini!
7 Siaꞌu nongupi siꞌita jojoo pepees eijoꞌong mombeꞌes tegando,
lamai heꞌua sembeꞌes tegandoꞌu neꞌoro nondolong.
Tegando-gando sanu vineꞌesi niꞌemiu nomaliti sembeꞌes tegando sanu vineꞌesiꞌu lamai heꞌua noposuncul eipapalitnya.”
8 Tesiaꞌa-siaꞌanya nonjarita,
“Lele niꞌoo,
siꞌoo majari tepuang ane mokuasa eisiꞌami.
Jio maala sima heꞌua.”
Lamai heꞌua nentiang tengkeles niira eisiia karna teupiong-upiongnya ane sanu inularaꞌonya.
9 Lamai heꞌua siYusup nongupionye,
ane siia nongulara eisiaꞌa-siaꞌanya,
“Siaꞌu nongupionye,
siaꞌu neꞌita teeleo,
tevulang ane sompulu sobua tevituong noposuncul eisiaꞌu.”
10 Teupiong heꞌua jinaritaaꞌonya vavalii eisiamanya ane terururusnya,
ane siamanya nonyimang siia,
pinoꞌutanyainya,
“Siꞌoo jio maala monjaritaa teupiong sima heꞌua eitoo-too ntaninya.
Pinikir niꞌoo siaꞌu,
siinamu ane terururusmu majaok ane moposuncul monyomba eisiꞌoo?
Tantu jio!”
11 Tesiaꞌa-siaꞌa niYusup meerat eisiYusup,
tapi siamanya kalepu nomikira teupiong-upiong heꞌua.
SiYusup Pinobaluk Ane Inomung EiTana NuMesir
12 Vavalii seeleo tesiaꞌa-siaꞌa niYusup umaꞌo nomiara tebembe-bembe ane tedomba-domba nusiama niira moꞌosuk teKota nuSikhem.
13 Lamai heꞌua siYakub nonjarita eisiYusup,
“Naꞌomo mongita tesiaꞌa-siaꞌamu nomiara tepetuvuong-petuvuong niꞌita moꞌosuk teKota nuSikhem.”
SiYusup nonyimbat,
“Oie,
Papa.”
14 Siamanya nonjarita,
“Naꞌomo siꞌoo mongita iamaꞌo tekareva nusiaꞌa-siaꞌamu ane tepetuvuong-petuvuong tedomba.
Lamai heꞌua petencile mokala eisiaꞌu.”
Lamai heꞌua siYakub nonuju siia lamai tepomoiaong niira eiLembok nuHebron,
ane siYusup valii najaok eiSikhem.
15 Pepees siia nelampa animai umaꞌo nelolo tesiaꞌa-siaꞌa eitana heꞌua,
netepojaok siia concoono sotoo telangkai sanu noꞌutanya eisiia,
“Tesapa sanu nololo niꞌoo?”
16 SiYusup nonyimbat,
“Tesiaꞌa-siaꞌa niaꞌu.
Siira pepees nomiara tepetuvuong-petuvuong.
Inotoi niꞌoo eipaio siira?”
17 Tetoo heꞌua nongular,
“Siira nelampamo lamai eiriꞌini.
Inepeꞌu siira nonjarita sima siira seilu umaꞌo eiDotan.”
Lamai heꞌua umaꞌomo siYusup nonuut tesiaꞌa-siaꞌanya ane jinaoknya siira eiDotan.
18 Lamai teꞌaavarong initamo niira siYusup,
ane jijiompo siia najaok eisiira,
siira nosituruko momate siia.
19 Siira nejajaritaong,
“Itai,
tetoo sanu kalepu mongupi heꞌua majaoko.
20 Maemo siꞌita momate siia ane tebatangnya norampaka niꞌita eilalong nubumbun sanu noꞌogal.
Siꞌita monjarita sima siia inonyoko nubinaatang sanu mabarani.
Jamo siꞌita mengita iamaꞌo majari teupiong-upiongnya heꞌua.”
21 SiRuben neꞌeepe terancana niira heꞌua,
lamai heꞌua siia nonyoꞌarai mopaꞌasalamat siYusup.
Siia nonjarita,
“Inyaa nopatei siia.
22 Inyaa nopeꞌeteek teraanya tapi norampakaꞌomo niꞌita eilalong nubumbun sanu noꞌogal eitana sanu jio pinomoiai nutoo eini,
tapi inyaa siꞌita mombobog atau momaꞌiti siia.”
Tesaba heꞌua inularnya karna siia seilu mopaꞌasalamat siYusup ane mongomung siYusup metencile umaꞌo eivonua.
23 Lamai heꞌua siYusup najaok eisiaꞌa-siaꞌanya,
siira nongalina tejuba niYusup sanu mombosi tutuu heꞌua.
24 Lamai heꞌua siira nongomung siia ane irampaka niira eilalong nubumbun sanu noꞌogal.
25 Lamai heꞌua nongodung siira untuk menginang.
Watu heꞌua siira neꞌita peinconong topobabaluk sanu pepees eipelampaong lamai teTana nuGilead umaꞌo eiTana nuMesir.
Siira tetoo-too nuMidian,
tebija niꞌIsmael.
Teꞌunta-unta niira nelulang tedamag,
tesulu nuulam ane tesulu sanu mombongi.
26 Lamai heꞌua siYehuda nonjarita eirururusnya,
“Jio ogunanya momate tetuai niꞌita ane monyoyoka tepomateong heꞌua.
27 Maemo nopobaluk niꞌita siia eitoo-too nuꞌIsmael heꞌua.
Inyaamo nopeesi niꞌita siia,
karna siia valii tetuai niꞌita mboto.”
Terururusnya nonuruk.
28 Lamai heꞌua lasiatoo tetopobabaluk lamai teMidian nalabat,
siYusup sinuvuna nusiaꞌa-siaꞌanya lamai eilalong nubumbun heꞌua lamai heꞌua pinobaluk eitoo-too nuꞌIsmael heꞌua teolinya rompulumboꞌa nuperak.
a Lamai heꞌua siia inomung nutopobabaluk heꞌua umaꞌo eiTana nuMesir.
29 Watu siYusup pinobaluk nusiaꞌa-siaꞌanya,
siRuben jio concoono siira.
Karna heꞌua,
watu siRuben netencile umaꞌo eibumbun heꞌua,
siYusup jio jinaoknya eiriꞌua.
Jineakaꞌonya tepakeannya karna noondong.
30 Siia netencile eirururusnya ane nonjarita,
“Teunga heꞌua jiongo umai valii eiriꞌua!
Siaꞌu jio moꞌotoi tesapa sanu ugauka eꞌeini.”
31 Lamai heꞌua siira nonyambale sambaang tebembe ane nononjoma tejuba niYusup eilalong nuraa nubembe heꞌua.
32 Lamai heꞌua tejubanya pinaꞌatu niira eisiama niira ane netuung,
“Tejuba eini jinaok niꞌami.
Tejuba nuunga niꞌoo eini?”
33 SiYakub moꞌotoi tejuba heꞌua,
lamai heꞌua nonjarita,
“Tutuu,
eini tejuba nuungaꞌu!
Tantu siia ininango nubinaatang sanu mabarani.
Teungaꞌu siYusup naatemo binebenuto nubinaatang heꞌua!”
34 SiYakub nonjeaka tebajunya karna noondong ane nomake tepakean inapatei.
Lasiaeleo teendenya siia notumangis karna teunganya heꞌua naatemo.
35 Jojoo teunga-unganya,
telangkai ane tebengkel najaok nonyale-nyale,
tapi siia jio seilu nosalei.
Jinaritanya,
“Jaok maate siaꞌu tatarus motumangisi teungaꞌu.”
Lamai heꞌua siia tatarus noondong karna siYusup teunganya.
36 Pepees heꞌua,
eiTana nuMesir,
tetoo-too nuMidian heꞌua nobaluko siYusup eisiPotivar,
sotoo sanu apangka nupuang sanu nomimpin tetoo-too sanu monjaga tepuang.