SiYakub Netencile EiBetel
35
1 Vavalii seeleo teꞌAlataꞌala nonjarita eisiYakub,
“Siaꞌumo teꞌAlataꞌala sanu najaok eisiꞌoo watu siꞌoo nelinjok lamai siaꞌamu siꞌEsau.
Pelampamo molongkang umaꞌo eiBetel.
Pomoia ampi heꞌua ane pogutu teporampunong tepombee eiSiaꞌu.”
2-3 Lamai heꞌua siYakub nonjarita eisiira sombonua ane eijojoo tetoo concoono siia,
“Siꞌita melengkat lamai eiriꞌini ane umaꞌo eiBetel.
Ampi heꞌua siaꞌu nogutu teporampunong tepombee eiꞌAlataꞌala sanu nondulumo siaꞌu eiwatu masesa ane nonaguimo siaꞌu eipapaio siaꞌu nelampa.
Jadi rampakaꞌomo tepatung nudewa-dewa sanu umai eisiꞌemiu.
Peꞌelivas teꞌalae niꞌemiu ane pombolos tepakean niꞌemiu.”
4 Karna heꞌua siira nombeenaꞌomo eisiYakub jojoo tepatung nudewa sanu eisiira ane valii tengangantia niira.
Jojoo tesagara heꞌua tinanong niYakub eiangkop nupuu nuꞌayu sanu nooge moꞌosuk eiKota nuSikhem.
5 Watu siYakub ane siira concoono siia nelengkat,
teꞌAlataꞌala nogutu tetopomoia nukota-kota eipapalit siira majari mobule,
jaok siira jio nolilivur teunga-unga niYakub.
6 Lamai heꞌua najaoko siira eiTana nuKanaꞌan eiKota nuBetel sanu luulu tinope teLus.
7 Eiriꞌua siYakub nogutu teporampunong tepombee ane nonopei teporampunong heꞌua “El-Betel”b karna teꞌAlataꞌala najaok eisiia eiriꞌua watu siia nelinjok lamai siaꞌanya.
8 Ampi heꞌua valii siDebora,
sanu nomiara siRibka,
naate lamai heꞌua tinanong eiangkop nupuu nuꞌayu sanu nooge eisabata nuselatan nukota heꞌua.
Heꞌua tesabanya tepuu heꞌua tinopei “Tepuu Tumangis.”
TeꞌAlataꞌala Nombarakai SiYakub EiBetel
9 Touk siYakub netencile lamai teTana nuPadan-Aram,
teꞌAlataꞌala najaokonye eisiYakub ane nombarakainya.
10 TeꞌAlataꞌala nonjarita eisiia,
“Tetopemu siYakub.
Tapi eꞌeini siꞌoo jiongo tinope siYakub,
tapi siꞌIsrael.”
Sima heꞌua teꞌAlataꞌala nonopei siia siꞌIsrael.
11 Lamai heꞌua teꞌAlataꞌala nonjarita valii,
“Siaꞌu eini teꞌAlataꞌala Sanu Tututuu Mabaraka.
Poꞌounga pomoꞌupu ane paꞌabari.
Tebija niꞌoo majari sabangsa ane mabari tebangsa ane lasiatoo lamai tebijamu majari tepuang.
12 Tetana eini sanu vineenaꞌUmo eisiꞌAbraham ane eisiꞌIshak,
Uveena eisiꞌoo ane tebija niꞌoo.”
13 Lamai heꞌua teꞌAlataꞌala neteengkat nolinjoꞌimo siYakub.
14 Eipaio teꞌAlataꞌala nonjarita eisiYakub,
siia nongoroa sobua tevatu poolambotong.
Lamai heꞌua siia nondidiga teꞌanggur ane telatab nusaitun eibabok nuvatu heꞌua sima tepombee eiꞌAlataꞌala.
15 Eiriꞌua teꞌAlataꞌala nonjarita eisiYakub.
Siia nonopeinya “teBetel.”c
SiRahel Naate Watu Noguungaa SiBenyamin
16 Touk heꞌua siYakub ane tetoo-too concoono siia nolinjoꞌimo teBetel.
Watu siira jiompo najaok eiKota nuꞌEvrata,
siRahel moguunga.
Tapi teunganya mandasa mesuvung.
17 Watu siRahel mandasa noguunga,
nonjarita tesando eisiia,
“Inyaa mobule.
Teunga niꞌoo telangkaionye.”
18 Tapi siRahel moꞌosuko maate ane watu siia neambok ponouꞌong,
tinopeinya teunga heꞌua siBen-Oni.
d Tapi siamanya nonopeinya siBenyamin.e
19 Touk siRahel naate,
siia tinanona eisevi nujalang sanu umaꞌo eiꞌEvrata,
sanu eleo eini tinope teBetlehem.
20 SiYakub nongoroa sobua tevatu poolambotong eiriꞌua,
ane jaok eleo einif tevatu heꞌua ulengi eipontanonong niRahel.
21 Touk heꞌua siYakub nonarusa pelampaongnya,
lamai heꞌua nongulea tetendanya eitana nalabat lamai teMigdal-Eder.
22 Watu siira ulengi eipomoiaong heꞌua siRuben noꞌoturu concoono siBilha,
tesarue niamanya.
Inepemo niYakub sima tegauk heꞌua.
Teunga-unga niYakub
(1Taw. 2:1-2)
SiYakub umai sompulu rotoo teunga langkai.
23 Teunga-unga niLea heꞌua siRuben,
teunga siaꞌa niYakub,
siSimeon,
siLewi,
siYehuda,
siꞌIsakhar ane siSebulon.
24 Teunga-unga niRahel heꞌua siYusup ane siBenyamin.
25 Teunga-unga niBilha,
tevotuang niRahel,
heꞌua siDan ane siNavtali.
26 Teunga-unga niSilpa,
tevotuang niLea heꞌua siGad ane siꞌAsyer.
Teunga-unga niYakub heꞌua pinoguungaa eiTana nuPadan-Aram.
SiꞌIshak Naate
27 Lamai heꞌua najaoko siYakub eisiꞌIshak siamanya,
eipomoiaongnya eiMamre sanu tinope valii teKiryat-Arba sanu eleo eini tinope teHebron.
(Luulu siꞌAbraham ane siꞌIshak nomoia ampi heꞌua.)
28-29 Watu teꞌumurnya meisimo tutuu,
heꞌua sagatus oalumpuluntoung,
siꞌIshak naatemo.
Lamai heꞌua tinanonaꞌomo niꞌEsau ane niYakub,
teunga-unganya.