SiSikhem Nonggauka Sanu Majaat EisiDina
34
1 Vavalii seeleo siDina,
teunga bengkel niYakub ane niLea,
umaꞌo monjaoꞌi lasiatoo tebengkel nuKanaꞌan.
2 Tepuang eiwilaya heꞌua siHemor,
tetoo nuHewi.
Siia umai sotoo teunga langkai,
tetopenya siSikhem.
Watu siSikhem neꞌita siDina,
iraꞌopnya terandaa heꞌua lamai heꞌua siSikhem nomajujut siDina noꞌoturu concoono siia.
3 Tapi siia seilumo tutuu eisiDina,
teunga niYakub heꞌua.
Siia nongagalani terandaa heꞌua.
Siia nongusaha antau terandaa heꞌua seilu valii concoono siia.
4 SiSikhem nonjarita eisiamanya,
“Siaꞌu nomongi eisiꞌoo ualamo terandaa heꞌua antau majari telapiꞌu.”
5 Watu siYakub neꞌeepe teunganya siDina pinogugauk niSikhem sanu majaat,
teunga-unganya telangkai ulengi monjaga tepetuvuong-petuvuong eitana ogio.
Karna heꞌua siia boi noodoy netaang siira netencile.
6 SiHemor,
siama niSikhem,
umaꞌo eisiYakub untuk mejajaritaong concoono siia.
7 Papaas eiwatu heꞌua teunga-unga niYakub najaok lamai tetana ogio.
Neꞌeepe tegauk heꞌua siira netetarigut ane nongoungkul tutuu karna siSikhem noꞌoturu concoono teunga niYakub,
tegauk sanu menciing eiꞌIsrael.
Heꞌua tegauk sanu jio masipato nogauka.
8 SiHemor nonjarita eisiYakub,
“Teungaꞌu siSikhem seilu tutuu eiungamu.
Siaꞌu momongi antau siꞌoo mombeena teungamu eisiSikhem majari telapinya.
9 Maemo melalapiong concoono siꞌami.
Venii terandaa-randaa niꞌemiu eisiꞌami ane siꞌemiu ala terandaa-randaa bengkel niꞌami.
10 Lamai heꞌua siꞌemiu maala momoia concoono siꞌami eitana eini.
Pomoia eipaio sanu seilu niꞌemiu.
Siꞌemiu maala mabebas melampa eipapaio ane mongoli tetana eiriꞌini.”
11 Lamai heꞌua siSikhem nonjarita eisiama niDina ane eisisiaꞌanya,
“Ane maala,
mopaꞌasanang teamboku.
Lamai heꞌua siaꞌu mombeena tesapa-sapa sanu seilu niꞌemiu.
12 Paꞌabari tutuu tepomongiong ane tepombee ane siaꞌu mombee heꞌua sima siꞌemiu monjarita eisiaꞌu.
Tapi veena terandaa heꞌua majari telapiꞌu.”
13 Karna siSikhem nonggauka sanu majaat eisiDina,
tetuai niira,
teunga-unga niYakub heꞌua nonipu siSikhem ane siamanya.
14 Siira nonjarita eirotoo heꞌua,
“Siꞌami jio maala monggauka heꞌua.
Siꞌami mesili mombeena tetuai niꞌami nopolapi concoono tetoo sanu jio sinuna.
15 Siꞌami maala monyituruꞌi tepomongiong niꞌemiu heꞌua tapi umai boi sobua tesarat.
Siꞌemiu kanaboi majari sima siꞌami.
Tebatuanya jojoo telangkai niꞌemiu kanaboi nosuna.
16 Touk heꞌua siꞌami mombee terandaa-randaa niꞌami eisiꞌemiu ane siꞌami mongala terandaa-randaa niꞌemiu.
Siꞌami momoia eitana niꞌemiu ane majari sabangsa.
17 Tapi ane siꞌemiu jio seilu monarima tesarat niꞌami heꞌua,
siꞌami mongala vavalii terandaa heꞌua ane siꞌami umaꞌomo.”
18 SiHemor ane siSikhem nonyituruꞌi tepomongiong niira.
19 SiSikhem masadia lolongkang monuruꞌimo nosuna karna siia nongagalani siDina.
SiSikhem inoongkoi tutuu heꞌuapa jojoo terurus niamanya ntaninya.
20 Lamai heꞌua siHemor ane teunganya siSikhem umaꞌo eipejajaoꞌong eibamba nukota,
ane nonjarita eitoo-too nukota niira,
sima eini,
21 “Tetoo-too niꞌIsrael heꞌua nembombosiong concoono siꞌita.
Patuvaya siira momoia eitana eini concoono siꞌita ane mabebas melampa eipapaio.
Tetana eini maloas.
Siꞌita maala mongala terandaa-randaa niira majari telapi-lapi niꞌita ane siꞌita maala mombee terandaa-randaa niꞌita eisiira.
22 Tapi tetoo-too heꞌua boi monyituruꞌi momoia concoono siꞌita ane majari sabangsa concoono siꞌita nepake sangaya tesarat.
Jojoo telangkai niꞌita kanaboi nosuna sima siira.
23 Jamo jojoo tepetuvuong,
tebinaatang-binaatang ntaninya ane tesasagara niira majari teharta niꞌita.
Jadi maemo siꞌita monyituruꞌimo tepomongiong niira antau siira momoia concoono siꞌita.”
24 Jojoo tetoo nukota sanu neincong eibamba nukota heꞌua nonyituruꞌimo teꞌusul niHemor ane niSikhem.
Lamai heꞌua jojoo telangkai eikota heꞌua sinuna.
25 Tolueleo lamai heꞌua,
watu tetoo-too langkai heꞌua ulengi mepees karna sinuna,
rotoo teunga niYakub,
heꞌua tesiaꞌa-siaꞌa niDina sanu tinope siSimeon ane siLewi,
nongala teꞌiabut niira,
lamai heꞌua odo-odoy nentama umaꞌo eilalong nukota.
Lamai heꞌua siira nomate jojoo telangkai eiriꞌua.
26 SiHemor ane teunganya siSikhem pinatei valii.
Lamai heꞌua siira nongala siDina lamai tevonua niSikhem ane umaꞌomo.
27 Touk heꞌua,
teunga-unga niYakub nonjaoꞌi tetoo-too sanu naate ane nongago jojoo teisi nukota heꞌua karna siSikhem nonggauka sanu majaat eisiDina.
28 Siira nongago tebembe-bembe,
tedomba-domba,
tesapi-sapi,
tekeledai-keledai,
ane jojoo sanu umai eilalong ane eiaang nukota.
29 Siira nongago jojoo tesasagara sanu ooli,
neraꞌop jojoo tebengkel ane teunga-unga,
ane nongago jojoo teisi nuvonua-vonua eikota heꞌua.
30 SiYakub nonjarita eisiSimeon ane siLewi,
“Siꞌemiu mopoꞌosusa siaꞌu.
Eleo eini tetoo-too nuKanaꞌan ane tetoo-too nuPeris ane jojoo tetoo eitana eini mengkeles eisiaꞌu.
Tetoo-too niꞌita jio nabari.
Ane tetoo-too heꞌua jojoo mosituruk monjaoꞌi mongeva siaꞌu,
siꞌita concoono jojoo terurus niꞌita nopatei niira.”
31 Tapi siira nonyimbat,
“Siꞌami jio maala momatuvaya tetuai niꞌami nopogutu simamo telonte.”