SiYakub Netepojaok Concoono SiꞌEsau
33
1 SiYakub neꞌita siꞌEsau najaok concoono apagatustoonya.
Siia nonilal teunga-unganya eiolot niLea,
niRahel ane rotoo tesaruenya.
2 Siia nongembea rotoo tesaruenya ane teunga-unga niira eitolo,
ancunaꞌonya siLea concoono teunga-unganya.
SiRahel ane teunganya siYusup inembeaꞌonya pupuri.
3 SiYakub nelampa eitolo niira jojoo.
Watu nongosuꞌi tesiaꞌanya,
siia noposuncul pitungkaning.
4 Tapi siꞌEsau lilinjok nolabot siYakub,
ane negonggol ane nembongi siia.
Lamai heꞌua siira rotoo notumangis.
5 Watu siꞌEsau neꞌita jojoo tebengkel ane teunga-unga heꞌua,
siia noꞌutanya,
“Sisee siira sanu umai concoono siꞌoo eini?”
SiYakub nonyimbat,
“Siira teunga-unga sanu vineenaꞌomo nuAlataꞌala eisiaꞌu,
tevotuangmu.”
6 Lamai heꞌua rotoo tesarue concoono teunga-unga nongosuꞌi siꞌEsau ane noposuncul.
7 Lamai heꞌua siLea ane teunga-unganya nongosuꞌi ane noposuncul.
Touk heꞌua siYusup concoono siRahel nongosuꞌi ane noposuncul.
8 SiꞌEsau noꞌutanya eisiYakub,
“Neteꞌuya siꞌoo nomaꞌatu jojoo tebinaatang heꞌua eisiaꞌu?”
SiYakub nonyimbat,
“Antau mopaꞌasanang teambokmu,
siaꞌaꞌu sanu uongkoi.”
9 Tapi siꞌEsau nonjarita,
“BoTuaiꞌu,
tehartaꞌu nabarimo.
Siꞌoo jio paraluu mombee eisiaꞌu.”
10 SiYakub nonjarita,
“Inyaa!
Ane siaꞌu nopaꞌasanango teambokmu,
tarimamo tepombeeꞌu eini lamai telimaꞌu.
Ane siaꞌu neꞌita teliomu,
heꞌua sima meꞌita telio nuꞌAlataꞌala.
Karna siꞌoo nonarima siaꞌu mombosi.
11 Siaꞌu nomongi eisiꞌoo tarimamo tepombeeꞌu eini.
TeꞌAlataꞌala sanu mombosi eisiaꞌu,
nombee jojoo sanu pinaraluuaꞌu.”
SiYakub nomongi tatarus jaok siꞌEsau nonarima tepombee heꞌua.
12 SiꞌEsau nonjarita,
“Maemo siꞌita melengkat.
Siaꞌu monagui siꞌoo.”
13 Tapi siYakub nonyimbat,
“Siaꞌaꞌu moꞌotoimo teunga-ungaꞌu moluntoy ane tepetuvuong-petuvuongu ulengi nonusu.
Ane momajujut melampa lolongkang,
maampo seeleo,
jojoo tepetuvuong heꞌua maate.
14 Aginya siꞌemiu melampa luulu,
siaꞌu melampa pupuri.
Siaꞌu melampa sedeꞌi-sedeꞌi monuruk teꞌoꞌosi nupetuvuong-petuvuong ane nuunga-unga jaok metepojaok siꞌoo,
siaꞌaꞌu eiWilaya nuSeir.”
15 SiꞌEsau nonjarita,
“Ane sima heꞌua,
utalau eisiꞌoo lasiatoo tetoo-tooꞌu.”
Tapi siYakub nonyimbat,
“Inyaamo montisusa.
Ane siaꞌu mopaꞌasanang teambokmu,
heꞌua maganamo.”
16 Eleo heꞌua siꞌEsau nelengkat netencile eiWilaya nuSeir.
17 Tapi siYakub umaꞌo eiKampung nuSukot,
siia nogutu tevonua ane tevonua-vonua nupetuvuongnya.
Tepomoiaong heꞌua tinopei teSukot.a
18 Eilalong nupelampaongnya lamai teTana nuPadan-Aram,
siYakub najaok masalamat eiKota nuSikhem eiTana nuKanaꞌan,
ane nongulea tetenda moꞌosuk tekota heꞌua.
19 Tetana nuponendaong heꞌua inolinya lamai tetoo-too niHemor,
siama niSikhem,
teolinya sagatusmboꞌa teperak.
20 Lamai heꞌua siia nogutu teporampunong tepombee eiriꞌua ane nonopeinya,
“TeꞌAlataꞌala niꞌIsrael siiamo teꞌAlataꞌala.”