SiYakub Nabata-bata Netepojaok Concoono SiꞌEsau
32
1 SiYakub nonarusa tepelampaongnya.
Lamai heꞌua temalaekat-malaekat nuꞌAlataꞌala najaok eisiia.
2 Watu siYakub neꞌita siira,
siia nonjarita,
“Eini teponendaong numalaekat-malaekat nuꞌAlataꞌala.”
Karna heꞌua tepomoiaong heꞌua tinopeinya teMahanaim.a
3 Lamai heꞌua siYakub nonuju tetoo-too mongaliurui siia umaꞌo eiWilaya nuSeir eiTana nuꞌEdom monjaoꞌi siꞌEsau,
tesiaꞌanya.
4 SiYakub nomarentaa eisiira,
“Jaritaa eisiaꞌaꞌu sanu uongkoi,
siꞌEsau,
sima eini,
‘Siaꞌu siYakub tevotuangmu.
Neendemo siaꞌu nomoia concoono siLaban jaok eꞌeini.
5 Siaꞌu umaimo tesapi-sapi,
tekeledai-keledai,
tedomba-domba,
tebembe-bembe ane tevotuang-votuang sanu langkai ane sanu bengkel.
Eꞌeini siaꞌu nomaꞌatu tekareva eini eisiꞌoo antau siaꞌu mopaꞌasanang teambok niꞌoo.’ ”
6 Lamai heꞌua tetoo-too sanu tinuju niYakub netencile ane nonjarita,
“Siꞌami umaꞌomo eisiaꞌamu,
siꞌEsau.
Eꞌeini siia menekai metepojaok concoono siꞌoo.
Siia majaok concoono apagatustoo.”
7 Neꞌeepe heꞌua siYakub nobule ane mabalesa.
Lamai heꞌua tetoo-toonya pinogutunya rolibok tepeinconong,
pinogutunya valii rolibok tepeinconong nudomba-domba,
nubembe-bembe,
nusapi-sapi,
ane nuꞌunta-untanya.
8 Siia nomikir,
“Ane siꞌEsau majaok mongeva sokolompoknya jaok nodaag,
sokolompoknyaonye sanu montaang masalamat.”
9 Lamai heꞌua siYakub nonggane,
“BoꞌAlataꞌala,
sanu sinombaa nikakaiꞌu siꞌAbraham ane siamaꞌu siꞌIshak.
BoSiopub sanu nonjaritaaꞌomo eisiaꞌu,
‘Petencile umaꞌo eitanamu ane eirururusmu ane Siaꞌu monggauka sanu mombosi eisiꞌoo.’
10 Siaꞌu jio masipato inagalani nuꞌAlataꞌala sanu mesetia eisiaꞌu,
tevotuangmu.
Luulu,
watu siaꞌu nelengkat lamai tetanaꞌu ane netava teBangkalang nuYordan eini,
siaꞌu jio nongomung tesapa-sapa boi tetoꞌonu.
Eꞌeini siaꞌu najaok concoono rokolompok tetoo-tooꞌu.
11 Siaꞌu nomongi tutuu,
paꞌasalamat siaꞌu lamai tesiaꞌa niaꞌu,
siꞌEsau.
Siaꞌu nobule inyanyaa siia majaok mongeva siaꞌu ane teunga-unga concoono siina-siina niira.
12 Siꞌoo,
teSiopu,
nonjaritamo,
‘Siaꞌu monggauka sanu mombosi eisiꞌoo ane monjaria tebijamu selilio teꞌababarinya tebayas eidagat sanu jio maala norekeng.’ ”
13 SiYakub notitindoung eiriꞌua.
Lamai heꞌua siia nongala sanggaat tebinaatang-binaatang antau noveenaꞌonya eisiꞌEsau,
siaꞌanya.
14 Siia nongala rogatusmbaang tebembe sanu siinanya,
rompulumbaang tebembe sanu siamanya,
rogatusmbaang tedomba sanu siinanya,
rompulumbaang tedomba sanu siamanya,
15 tolumpulumbaang tesiina nuꞌunta sanu pinonusui nuunga-unganya,
apampulumbaang tesapi sanu siinanya,
sompulumbaang tesapi sanu siamanya,
rompulumbaang tekeledai sanu siinanya ane sompulumbaang tekeledai sanu siamanya.
16 Pinotilalnya tepetuvuong-petuvuong heꞌua najari lasiakaawan ane vineenaꞌonya eisosotoo tevotuangnya.
Siia nonjarita eisiira,
“Pongaliurumo siꞌemiu ane jagai sasakaawan jio moꞌosuk tekaawan santaninya.”
17 SiYakub nomarentaa eivotuang sanu pabibia,
“Ane siꞌEsau,
tesiaꞌa niaꞌu,
netepojaok eisiꞌoo,
ane noꞌutanya,
‘Sisee tetopomimpinmu?
Mapaio siꞌoo?
Sisee tetogu binaatang-binaatang sanu inumbu niꞌoo?’
18 simbati siia sima eini,
‘Tetogunya tevotuangmu siYakub.
Siia nombeena eini eisiMangge,
siꞌEsau.
Siia menekai pupuri.’ ”
19 Eivotuang sanu ororuaaꞌonya,
ane eitotoluaꞌonya ane eijojoo tetoo sanu nongurus tekaawan-kaawan nupetuvuong heꞌua,
pinarentaaꞌonya sanu selilio.
20 SiYakub nonjaritaa,
“Siꞌemiu monjaritaa,
‘Tevotuangmu,
siYakub,
pupuri.’ ”
Karna siia nomikir,
“Ane siaꞌu mombee tepetuvuong-petuvuong heꞌua eisiꞌEsau,
siaꞌu mopaꞌasanang teamboknya.
Ane jamo siaꞌu metepojaok concoono siꞌEsau,
siia monarima siaꞌu mombosi.”
21 Jadi tepombee pinaꞌatu luulu,
ane siia notitindoung eiponendaong ulengi sembengi.
SiYakub Neeva-evaong Concoono TeꞌAlataꞌala EiPniel
22 Ndoung heꞌua siYakub nembaung ane nongomung rotoo telapinya,
ane rotoo tesaruenya ane sompulu sotoo teunganya,
netava teBangkalang nuYabok.
23 Touk siira netava,
siia netencile ane nomaꞌatu jojoo tesagaranya umaꞌo eisantava.
24 Siia nomoia eiriꞌua simotoonya.
Lamai heꞌua najaok sotoo neeva-evaong concoono siia jaok mantieleo.
25 Watu tetoo heꞌua moꞌotoi siia jio maala mondaaga siYakub,
siia nombobog siYakub eipalanga moꞌosuk tepalimping ane tevuꞌu nupalanga naꞌaladis lamai tevuꞌu nupalimping.
26 Tetoo heꞌua nonjarita,
“Lapasa siaꞌu karna mantieleomo.”
SiYakub nonyimbat,
“Ane siꞌoo mombarakai siaꞌu,
siaꞌu molapasa siꞌoo.”
27 Tetoo heꞌua noꞌutanya,
“Sisee tetopemu?”
Siia nonyimbat,
“SiYakub.”
28 Tetoo heꞌua nonjarita,
“Tetopemu jiongo notope siYakub,
c tapi siꞌIsrael.
d Karna siꞌoo neeva-evaongo concoono teꞌAlataꞌala ane concoono temanusia,
ane siꞌoo nondaag.”
29 SiYakub noꞌutanya,
“Ulara sisee tetopemu?”
Tetoo heꞌua nonyimbat,
“Siꞌoo jio paraluu noꞌutanya tetopeꞌU!”
Lamai heꞌua siYakub binarakainya.
30 SiYakub nonjarita,
“Telioꞌu neꞌitamo telio nuꞌAlataꞌala,
ane siaꞌu ulengi netuvu.”
Karna heꞌua tepomoiaong heꞌua tinopeinya tePniel.e