SiYakub Nelinjok Nolinjoꞌi SiLaban
31
1 SiYakub neꞌeepe teunga-unga niLaban nonjarita sima eini,
“SiYakub nongalamo jojoo teharta niama niꞌita.
Jojoo teꞌakakayanya heꞌua lamai siama niꞌita.”
2 SiYakub neꞌita valii siLaban jiongo mombosi eisiia sima luulu.
3 Lamai heꞌua teSiopua nonjarita eisiYakub,
“Petencilemo eitana nusiopu-siopu niꞌemiu sanu luulumai ane eirururusmu.
Siaꞌu monagui siꞌoo.”
4 Lamai heꞌua siYakub nonuju tetoo-too noleva siRahel ane siLea metepojaok concoono siia eitana ogio,
eipaio siia nomiara tekaawan nudomba ane nubembenya.
5 SiYakub nonjarita eisiira,
“Siaꞌu neꞌita siama niꞌemiu jiongo mombosi eisiaꞌu sima luulu.
Tapi teꞌAlataꞌala sanu sinombaa niamaꞌu tataap nonagui siaꞌu.
6 Siꞌemiu moꞌotoi siaꞌu nokarajaamo eisiama niꞌemiu nepake jojoo teꞌuigu.
7 Maampo siaꞌu nokarajaa movoat eisiia,
siaꞌu inakalinya ane tetamboꞌu binolosi jaok sompulungkaning.
Tapi teꞌAlataꞌala jio momatuvayaa siia monggauka sanu majaat eisiaꞌu.
8 Ane siama niꞌemiu nonjarita,
‘Jojoo tebembe ane tedomba sanu mobulitik majari tetambomu,’
jojoo moꞌounga sanu teunganya mobulitik.
Ane siia valii nonjarita,
‘Jojoo tebembe ane tedomba sanu meringka majari tetambomu,’
jojoo moꞌounga teunganya sanu meringka.
9 Sima heꞌua teꞌAlataꞌala nongala tepetuvuong-petuvuong niama niꞌemiu ane nombeenaꞌonya eisiaꞌu.
10 Luulu eiwatu tebembe-bembe ane tedomba-domba heꞌua nolapi,
siaꞌu nongupi ane neꞌita jojoo tebembe siamanya nolapi,
sanu meringka,
mobulitik,
ane mobulabak.
11 Temalaekat nuꞌAlataꞌala nonjarita eisiaꞌu eilalong nuupiongu heꞌua,
‘Yakub!’
Siaꞌu nonyimbat,
‘Tesapa boSiopu.’
12 Temalaekat heꞌua nonjaritaonye,
‘Itai,
jojoo tebembe siamanya meseilua sanu meringka,
mobulitik atau mobulabak.
Siaꞌu nogutu heꞌua karna initaꞌUmo sanu pinogugauk niLaban eisiꞌoo.
13 Siaꞌu teꞌAlataꞌala sanu najaok eisiꞌoo eiBetel.
Ampi heꞌua siꞌoo nongoroa sobua tevatu poolambot,
ane nondidiga telatab nusaitun eibaboknya.
Siꞌoo valii nojanji eiSiaꞌu.
Eꞌeini linjoꞌi tetana eini ane petencilemo eitana nurururusmu.’ ”
14 Lamai heꞌua siLea ane siRahel nonyimbat,
“Jiongo umai otilal nuꞌakakaya niama niꞌami atau teharta sanu maala notarima niꞌami.
15 Siꞌami eini simamo tetoo sanu mokurang eisiama niꞌami.
Siia nobaluko siꞌami,
ane tesapa sanu tinarimanya heꞌua,
pinoꞌotouknya valii.
16 Jojoo teharta sanu inalamo nuꞌAlataꞌala lamai siama niꞌami heꞌua majari teharta niꞌami ane nuunga-unga niꞌami.
Gauka tesapa sanu pinarentaa nuꞌAlataꞌala eisiꞌoo.”
17-18 Lamai heꞌua siYakub mesisiap metencile umaꞌo eisiamanya eiTana nuKanaꞌan.
Telapi-lapinya ane teunga-unganya sinaveaꞌonya eiꞌunta,
ane inomungnya jojoo tepetuvuong ane jojoo tesapa sanu naalanya eiTana nuPadan-Aram.
19 Watu siLaban umaꞌo negoncing tevulu nudomba-dombanya,
siRahel nongangga tepatung-patungb niamanya.
20 SiYakub nongakal eisiLaban,
tetoo nuꞌAram heꞌua,
ane jio nongulara siia nelampa.
21 Siia nongala jojoo tehartanya ane nelampa lolongkang.
Siia netava eiBangkalang nuꞌEvrat ane umaꞌo eibuut-buut sanu tinope teGilead.
SiLaban Nongigus SiYakub
22 Lamai heꞌua nalabat tolueleo paꞌali inularaꞌonya eisiLaban siYakub nelinjoko.
23 Karna heꞌua siLaban nongincona tetoo-toonya ane siira nongigus siYakub eꞌendenya pitueleo ane jinaoknya eibubuut nuGilead.
24 Ndoung heꞌua teꞌAlataꞌala najaok eisiLaban eilalong nuupiongnya,
ane nonjarita,
“Jaga-jagai,
inyaa monjarita sanu mombosi atau sanu majaat eisiYakub.”
25 Watu siLaban najaok eisiia,
siYakub nonguleaꞌomo tetendanya eibubuut nuGilead.
SiLaban ane terururusnya valii nongulea tetenda niira ampi heꞌua.
26 Lamai heꞌua siLaban noꞌutanya eisiYakub,
“Neteꞌuya siꞌoo nongakal eisiaꞌu ane nongomung teunga-unga bengkelu sima tetoo tetawanan?
27 Neteꞌuya siꞌoo nongakal siaꞌu ane jio nongulara eisiaꞌu siꞌoo metencilemo?
Neteꞌuya siꞌoo jio mopooto antau siaꞌu maala mombee siꞌoo umaꞌo melampa masanang ane meꞌaꞌantaong mepake tegumbuyong,
temusik terabana ane tekacapi?
28 Siꞌoo jio nomatuvaya siaꞌu tewatu membongii temoꞌupu-moꞌupuꞌu ane teunga-ungaꞌu jijiompo siira umaꞌo.
Modoyo tutuu tegaukmu!
29 Siaꞌu moꞌuig valii ane maala monggauka sanu majaat eisiꞌemiu,
tapi imondoung teꞌAlataꞌala sanu sinombaa niamamu nonjarita eisiaꞌu,
‘Jaga-jagai,
inyaa monjarita sanu mombosi atau sanu majaat eisiYakub.’
30 Siaꞌu moꞌotoi siꞌoo nelinjoko karna nolamboto metencile eisiamamu.
Tapi neteꞌuya siꞌoo nongangga tepatung-patung sanu nonjagai tesoungaongu?”c
31 SiYakub nonyimbat,
“Siaꞌu nelampa jio nongulara karna nobule inyanyaa siꞌoo mongago teunga-unga bengkelmu lamai siaꞌu.
32 Tapi,
ane siꞌoo maꞌajaok sotoo eiriꞌini sanu nongangga tepatung-patung heꞌua,
siia nohukum maate.
Pelolo tepatung-patung heꞌua eiriꞌini.
Ane umai,
alamo.
Terururus niꞌita maala mongitanya.”
SiYakub jio moꞌotoi siRahel nongangga tepatung-patung heꞌua.
33 Lamai heꞌua siLaban umaꞌo ane nelolo tepatung heꞌua eitenda niYakub,
eitenda niLea,
ane eitenda rotoo tevotuang bengkel heꞌua tapi jio jinaoknya tepatung-patung heꞌua.
Touk heꞌua siia nentama eilalong nutenda niRahel.
34 Tapi siRahel nongembeaꞌomo tepatung-patung heꞌua eilalong nupongodunong eiꞌunta heꞌua,
ane siia nongodung eibaboknya.
SiLaban nelolo eipapaio eitenda niRahel,
tapi jio jinaoknya.
35 Lamai heꞌua siRahel nonjarita eisiamanya,
“Siamaꞌu inyaa mongoungkul,
siaꞌu jio maala meꞌoro molabot siꞌoo,
karna siaꞌu naꞌaraaong.”
SiLaban nelolo tutuu tepatung-patung heꞌua tapi jio jinaoknya.
36 SiYakub nongoungkul ane nebabantaong eisiLaban ane noꞌutanya,
“Teꞌasasala nusapa sanu pinogutuꞌu?
Tesapa tedosaꞌu jaok siꞌoo nongigus siaꞌu?
37 Eꞌeini,
siꞌoo nelolomo eijojoo tesasagaraꞌu.
Mangge naꞌajaok tesasagara niMangge?
Ane umai,
suvuna heꞌua eiriꞌini antau terururus niꞌoo ane terururusu maala notantua sisee eiolot niꞌita sanu tutuu.
38 Rompuluntoung siaꞌu nomoia concoono siꞌoo.
Tedomba-domba ane tebembe-bembe sanu siinanya jio umai naꞌatantanong,
ane tebembe atau tedomba sanu siamanya jio umai siaꞌu nenginang.
39 Sanu pinatei nubinaatang meila jio inomungu eisiꞌoo,
tapi siaꞌu mboto sanu nombolosinya.
Sanu inangga eieleonya atau eindoungnya siꞌoo nomongi tutuu eisiaꞌu kanaboi nombolosi tebinaatang heꞌua.
40 Siaꞌu masesa moondak teeleo ane mojolo eindoungnya.
Mengkaning-kaning siaꞌu valii jio meteꞌoturu.
41 Sima heꞌua siaꞌu nokarajaa eisiꞌoo eꞌendenya rompuluntoung.
Sompulu apantoung siaꞌu nokarajaa antau maala nolapi teunga-ungamu,
ane onontoung naꞌaala tebembe-bembe ane tedomba-domba heꞌua.
Eꞌendenya heꞌua siꞌoo nombalik tetamboꞌu jaok sompulungkaning.
42 Ane teꞌAlataꞌala jio nonagui siaꞌu,
heꞌuamo teꞌAlataꞌala sanu sinombaa niamaꞌu ane nikakaiꞌu,
siꞌAbraham,
teꞌAlataꞌala sanu nobulei ane noꞌongkoi niꞌIshak,
tantu boi siaꞌu tinuju niꞌoo netencile boi nongandoyang.
Tapi teꞌAlataꞌala nomamatui teꞌasesesaꞌu eilalong nupokarajaaongu.
Eimondoung Siia nonantua siMangge osala eilalong nuupiongmu.”
Tepejanjiong NiYakub Ane NiLaban
43 Lamai heꞌua siLaban nonyimbat eisiYakub,
“Rotoo tebengkel heꞌua teunga-ungaꞌu.
Teunga-unga niira heꞌua temoꞌupu-moꞌupuꞌu.
Jojoo tepetuvuong heꞌua jojoo tepetuvuongu.
Jojoo sanu inita niꞌoo eiriꞌini heꞌua jojoo teꞌee niaꞌu.
Tapi siaꞌu jio maala monggauka tesapa-sapa antau montaang teunga-ungaꞌu ane temoꞌupu-moꞌupuꞌu monuut siꞌoo.
44 Maemo siꞌita mogutu tepejanjiong concoono ane mongincona tevatu-vatu majari tetanda nupejanjiong niꞌita heꞌua.”
45 Lamai heꞌua siYakub nongala sobua tevatu ane inoroaꞌonya najari tevatu poolambotong.
46 Lamai heꞌua siia nonuju tetoo-toonya nongincona ane nonambuna tevatu-vatu.
Lamai heꞌua siira nenginang concoono eivatu-vatu heꞌua.
47 SiLaban nonopei tetambunong nuvatu heꞌua teYegar-Sahaduta,
d tapi siYakub nonopeinya teGaled.e
48 SiLaban nonjarita eisiYakub,
“Tetambunong nuvatu eini najari poolambot eiolot niꞌita.”
Heꞌua tesabanya pomoiaong heꞌua tinopei teGaled.
49 Tinopei valii teMispa,
f karna siLaban nonjarita,
“Patuvaya teSiopu nonjagai siaꞌu ane siꞌoo watu siꞌita neteꞌanta.
50 Ane siꞌoo monggauka sanu majaat eiunga-ungaꞌu,
atau molapi concoono tebengkel-bengkel sanu ntaninya,
maampo jio otoo sanu moꞌotoi,
lambot,
teꞌAlataꞌala sanu meꞌita siꞌita.”
51 Lamai heꞌua nonjaritaonye siLaban eisiYakub,
“Itaimo.
Eini tevatu-vatu sanu tinambuna,
ane tevatu nupoolambotong sanu inoroa.
52 Tetambunong nuvatu ane tevatu nupoolambotong eini molambota siꞌita antau siaꞌu jio maala molabati tetambunong nuvatu eini ane umaꞌo mongeva siꞌoo.
Sima heꞌua valii siꞌoo jio maala molabati tetambunong nuvatu eini ane umaꞌo mongeva siaꞌu.
53 TeꞌAlataꞌala sanu sinombaa niꞌAbraham ane sanu sinombaa niamaꞌu siNahor,
teꞌAlataꞌala sanu sinombaa tesiama niira majari tetopongadili eiolot niꞌita.”
Lamai heꞌua siYakub nojanji sinabii nuꞌAlataꞌala sanu binulei ane inongkoi niꞌIshak.
54 SiYakub nonyambale sambaang tebinaatang sima tepombee eibuut heꞌua.
Siia noleva terururusnya antau menginang concoono.
Touk nenginang,
siira notitindoung eibuut heꞌua.
55 Lamai heꞌua titieleonyamai,
siLaban nembongi teunga-unganya ane temoꞌupu-moꞌupunya ane nombarakai siira.
Touk heꞌua siia netencile umaꞌo eipomoiaongnya.