30
1 Watu siRahel neꞌita siia jio maala moguungaa teunga eisiYakub siia nogirang eisiaꞌanya,
ane nonjarita eisiYakub,
“Venii siaꞌu teunga!
Ane jio,
siaꞌu maate.”
2 SiYakub nongoungkul eisiRahel ane nonjarita,
“Siaꞌu eini jio teꞌAlataꞌala.
Siia sanu nonyabaa siꞌoo malaung.”a
3 Lamai heꞌua siRahel nonjarita,
“Eini tevotuangu siBilha.
Poꞌoturumo concoono siia antau siia moꞌounga ane sima heꞌua siaꞌu maala majari siina nuunga lamai siia.”
4 Touk heꞌua siRahel nombeena siBilha eisilapinya,
siYakub noꞌoturu concoono tevotuang heꞌua.
5 SiBilha nolumalo ane noguungaa sotoo teunga langkai.
6 SiRahel nonjarita,
“TeꞌAlataꞌala nonggauka sanu maꞌadil eisiaꞌu.
Inepe-Nya teganeꞌu ane vineenaꞌo-Nya sotoo teunga langkai.”
Teunga heꞌua tinopeinya siDan.b
7 Touk heꞌua siBilha nolumaloonye ane noguungaa teunga langkai sanu ororuaaꞌonya eisiYakub.
8 SiRahel nonjarita,
“Siaꞌu neeva-evaongo tutuu concoono tesiaꞌaꞌu,
ane siaꞌu nondaag.”
Teunga heꞌua tinopeinya siNavtali.c
9 Watu siLea moꞌotoi siia jiongo moꞌoungaonye,
vineenaꞌonya siSilpa tevotuangnya,
eisiYakub antau majari telapinya.
10 SiSilpa noguungaa sotoo teunga langkai.
11 SiLea nonjarita,
“Siaꞌu noꞌuntung.”
Teunga heꞌua tinopeinya siGad.d
12 SiSilpa noguungaaꞌonye sotoo teunga langkai ororuaaꞌonya eisiYakub.
13 SiLea nonjarita,
“Nasanango tutuu siaꞌu!
Jojoo tebengkel monjaritaa siaꞌu nasanango tutuu.”
Teunga heꞌua tinopeinya siꞌAsyer.e
14 Eiwatu melolu tegando,
siRuben umaꞌo eijoꞌong.
Ampi heꞌua jinaoknya sangaya tetudaong nuulam,
f inomungnya umaꞌo eisiLea siinanya.
Watu siRahel neꞌita tetudaong heꞌua siia nonjarita eisiLea,
“Venii siaꞌu sedeꞌi tetudaong nuulam sanu jinaok nuungamu heꞌua.”
15 SiLea nonyimbat,
“Siꞌoo nongalamo telapiꞌu.
Eꞌeini siꞌoo seilu mongala tetudaong nuulam sanu jinaok nuungaꞌu.”
SiRahel nonjarita,
“Ane siꞌoo mombee tetudaong nuulam heꞌua eisiaꞌu,
siꞌoo maala moꞌoturu concoono siYakub ndoung eini.”
16 Beimbengi heꞌua watu siYakub netencilemo lamai tejoꞌong,
siLea nolabot siia ane nonjarita,
“Ndoung eini siꞌoo kanaboi moꞌoturu concoono siaꞌu,
karna siaꞌu nonambo siꞌoo watu mombee tevua-vua lamai teungaꞌu.”
Lamai heꞌua siYakub noꞌoturu concoono siia ndoung heꞌua.
17 TeꞌAlataꞌala nomoꞌinepea tegane niLea,
ane siia nolumalo ane noꞌounga,
teunga langkai sanu olelimaaꞌonya.
18 SiLea nonjarita,
“TeꞌAlataꞌala nombeemo eisiaꞌu tetambo karna siaꞌu nombeemo siSilpa eisilapiꞌu.”
Karna heꞌua teunga heꞌua tinopeinya siꞌIsakhar.g
19 SiLea nolumaloonye ane noguungaa teunga langkai sanu oononaꞌonya eisiYakub.
20 SiLea nonjarita,
“TeꞌAlataꞌala nombeemo eisiaꞌu tepombee sanu mombosi.
Eꞌeini telapiꞌu momoia concoono siaꞌu,
h karna siaꞌu noguungaaꞌomo onotoo teunga langkai eisiia.”
Karna heꞌua teunga heꞌua tinopeinya siSebulon.i
21 Touk heꞌua siLea noguungaaꞌonye sotoo teunga bengkel sanu tinopeinya siDina.
22 Lamai heꞌua teꞌAlataꞌala nolambot siRahel.
TeꞌAlataꞌala nopoꞌinepea teganenya ane noveena eisiia teꞌatataan noꞌounga.
23 SiRahel nolumalo ane noguungaa sotoo teunga langkai.
SiRahel nonjarita,
“TeꞌAlataꞌala nongilanaꞌomo teꞌesisiliꞌu.
24 Patuvaya teSiopuj nombeeonye eisiaꞌu sotoo teunga langkai.”
Teunga heꞌua tinopeinya siYusup.k
SiYakub Ane SiLaban Nogutu Posinturuꞌong
25 Touk siRahel noguungaa siYusup,
siYakub nonjarita eisiLaban,
“Tuvayaaꞌomo siaꞌu metencile umaꞌo eitanaꞌu eipaio siaꞌu pinoguungaa.
26 Veena telapi-lapiꞌu ane teunga-ungaꞌu sanu majari tetamboꞌu.
Siꞌoo moꞌotoi,
siaꞌu nokarajaamo movoat tutuu eisiꞌoo.”
27 SiLaban nonjarita eisiYakub,
“Poinepea luulu.
Siaꞌu moꞌotoi lamai teramalan nuSiopu nombarakai siaꞌu karna tepokarajaaong niꞌoo.
28 Jaritaaꞌomo soꞌuya tetambo siꞌoo momongi,
ane siaꞌu mombeenaꞌonya eisiꞌoo.”
29 SiYakub nonyimbat,
“Mangge,
siꞌoo moꞌotoi siaꞌu nokarajaamo movoat tutuu eisiꞌoo,
ane tepetuvuong-petuvuong niꞌoo nentiang nabari karna siaꞌu nomiaranya.
30 Jijiompo siaꞌu najaok,
tepetuvuong-petuvuong niꞌoo sedeꞌi,
ane eꞌeini nabarimo.
TeSiopu nombarakai siꞌoo karna siaꞌu.
Tapi eꞌeini tewatunya siaꞌu mokarajaa untuk telapi-lapiꞌu ane teunga-ungaꞌu mboto.”
31 SiLaban noꞌutanya,
“Tesapa sanu uveena eisiꞌoo?”
SiYakub nonyimbat,
“Inyaa mombee tesapa-sapa.
Ane siMangge seilu teꞌusulu eini,
siaꞌu tataap momiara ane monjaga tekaawan nudomba ane nubembe niMangge.
32 Eini teꞌusulu.
Patuvayaa siaꞌu montania lamai tepetuvuong-petuvuong niꞌoo tedomba-domba sanu mobulitik ane mobulabak,
teunga-unga nudomba sanu meitong,
ane tebembe sanu mobulabak ane mobulitik.
Heꞌua boi tetambo sanu siaꞌu momongi.
33 Lamai heꞌua siꞌoo moꞌotoi siaꞌu mondolong atau jio.
Ane siꞌoo majaok momaresa tetamboꞌu ane meꞌita tebembe sanu jio mobulitik atau mobulabak,
atau teunga nudomba sanu jio meitong,
siꞌoo moꞌotoi siaꞌu nongangga tebinaatang heꞌua.”
34 SiLaban nonyimbat,
“Maala sima heꞌua!
Siꞌita monggauka tesapa sanu jinaritaamu heꞌua!”
35 Tapi eieleo heꞌua valii siLaban nontania jojoo tebembe siamanya sanu meringka ane mobulabak ane jojoo tebembe siinanya sanu mobulitik ane mobulabak,
atau sanu omeasnya.
Siia valii nontania teunga-unga nudomba sanu meitong.
Siia nontania tepetuvuong-petuvuong heꞌua untuk siia mboto.
Lamai heꞌua tinujunya teunga-unganya nomiara tebinaatang-binaatang heꞌua.
36 Touk heꞌua siira nelampa tolueleo concoono tedomba-domba ane nolinjoꞌi siYakub.
Tedomba-domba ane tebembe-bembe niLaban sanu netetalau heꞌua piniara niYakub.
37 Lamai heꞌua siYakub nongala tepanga-panga nuꞌayu sanu molumbi lamai tepuu nuhawar,
tepuu nubadam ane tepuu nuberangan,
nongulis sedeꞌi lamai teꞌulinya jaok majari mobulabak.
38 Inembeaꞌonya tepanga-panga heꞌua eitolo nubembe-bembe ane nudomba-domba heꞌua,
eilalong nupenginunongnya,
karna tepetuvuong-petuvuong heꞌua molapi eiwatu menginung.
39 Karna heꞌua,
watu tebembe-bembe ane tedomba-domba heꞌua molapi eitolo nupanga-panga heꞌua,
teunganya majari meringka,
mobulitik atau mobulabak.
40 SiYakub nongantaa teunga-unga nudomba siinanya sanu pepees molapi ane monoloaꞌonya eibembe-bembe ane eidomba-domba niLaban sanu meringka ane meitong antau ounga sanu meringka ane meitong.
Ncoono tecara eini siYakub nontiang teꞌabari nupetuvuongnya mboto ane mongantaaꞌonya lamai tepetuvuong-petuvuong niLaban.
41 Ane tepetuvuong-petuvuong sanu moꞌuig pepees nolapi,
siYakub nongembea tepanga-panga sanu inulisinya eitolo niira eilalong penginunong heꞌua.
42 Tepanga-panga heꞌua jio inembeaꞌonya eitolo nupetuvuong-petuvuong sanu moluntoy.
Jadi jojoo tebembe ane tedomba sanu memeas heꞌua moluntoy,
heꞌua tepetuvuong-petuvuong niLaban.
Jojoo tepetuvuong sanu meitong ane mobulabak heꞌua moꞌuig,
heꞌua tepetuvuong-petuvuong niYakub.
43 Sima heꞌua nentintiang teꞌakakaya niYakub.
Siia umai nabari tebembe,
tedomba,
teꞌunta,
tekeledai,
tevotuang bengkel ane tevotuang langkai.