SiYakub Najaok Eivonua NiLaban
29
1 SiYakub nonarusa tepelampaongnya ane umaꞌo eitana sabata nutimur lamai teTana nuKanaꞌan.
2 Jio inototoi initanya tebumbun.
Eiriꞌua umai tolukaawan tebembe ane tedomba nopoduling karna biasa novenii menginung teogo lamai tebumbun heꞌua.
Tebumbun heꞌua tinaubi nuvatu sanu mooge.
3 Ane jojoo tebembe ane tedomba neincong eiriꞌua,
biasa tetopomiara nondulina tevatu,
lamai heꞌua tebembe ane tedomba pinainung.
Touk heꞌua tetopomiara nonauba vavalii tebumbun heꞌua.
4 Lamai heꞌua siYakub noꞌutanya eitopomiara-topomiara eiriꞌua,
“Botagu-taguꞌu,
lamai paio siꞌemiu?”
Siira nonyimbat,
“Lamai teKota nuHaran.”
5 SiYakub noꞌutanyaonye,
“Nootoi niꞌemiu siLaban temoꞌupu niNahor?”
Siira nonyimbat,
“Oie,
nootoi niꞌami.”
6 Lamai heꞌua siYakub noꞌutanyaonye,
“Iamaꞌo tekarevanya?”
Siira nonyimbat,
“Siia mombosi.
Itai,
heꞌua teunganya bengkel,
tetopenya siRahel.
Siia najaok concoono tekaawan nubembe ane nudomba niamanya.”
7 SiYakub nonjarita,
“Eini ulengi moondak teeleo jiompo tewatunya tepetuvuong-petuvuong nontamaa eipomoiaongnya.
Aginya tepetuvuong-petuvuong eini nopainung niꞌemiu lamai heꞌua noꞌomung nenginangonye tegugus.”
8 Siira nonyimbat,
“Siꞌami jio maala monggauka heꞌua jaok jojoo tebembe ane tedomba neincong.
Paꞌali tevatu ponaub tebumbun heꞌua maala modulina luulu.
Lamai heꞌua siꞌami momainung jojoo tekaawan heꞌua.”
9 Pepees siYakub nonjarita concoono siira,
siRahel najaok concoono tekaawan nudomba ane nubembenya.
Siia heꞌua tetopomiaranya.
10 Watu siYakub neꞌita siRahel,
teunga niLaban,
tesiaꞌa niinanya mboto,
najaok concoono tekaawan nubembe ane nudomba niamanya,
siYakub umaꞌo nondulina tevatu ponaub nubumbun heꞌua.
Lamai heꞌua siia nomainung tepetuvuong-petuvuong nimanggenya heꞌua.
11 Touk heꞌua siia nembongia siRahel lamai heꞌua notumangis karna masanang.
12 Siia nonjarita eisiRahel,
“Siaꞌu teunga niRibka,
terurus niamamu.”
Lamai heꞌua siRahel nelinjok umaꞌo eivonuanya ane nongulara eisiamanya.
13 Watu siLaban neꞌeepe tekareva niYakub,
teponungaonya heꞌua,
siLaban nelinjok nonjaoꞌi siia.
SiLaban nembongi siYakub ane negonggol siia,
ane neubu siia umaꞌo eilalong nuvonua.
Touk heꞌua siYakub nonjaritaa tekarevanya eisiLaban,
14 siLaban nonjarita,
“Tutuu,
siꞌoo terurusu.”
SiYakub nomoia eiriꞌua sombulang teendenya.
SiYakub Nolapi SiLea Ane SiRahel
15 Vavalii seeleo siLaban nonjarita eisiYakub,
“Jio mombosi siꞌoo mokarajaa eisiaꞌu jio maꞌaala tesapa-sapa,
karna siꞌoo terurusu.
Ulara eisiaꞌu soꞌuya tetambo sanu seilumu.”
16 SiLaban umai rotoo teunga bengkel.
Tebengkel sanu siaꞌa tetopenya siLea ane sanu tuai tetopenya siRahel.
17 SiLea tematanya magaya,
b tapi siRahel teꞌalaenya ane telionya magaya.c
18 SiYakub magalang eisiRahel.
Karna heꞌua siia nonjarita eisiLaban,
“Ane siMangge mombee siaꞌu molapi ncoono siRahel,
teungamu sanu pomabusong,
siaꞌu mokarajaa eisiMangge eꞌendenya pituntoung.”
19 SiLaban nonjarita,
“Aginyamo siaꞌu mombee siia eisiꞌoo heꞌuapa eitoo ntaninya.
Pomoiamo eiriꞌini.”
20 Lamai heꞌua siYakub nokarajaa eꞌendenya pituntoung antau molapi siRahel.
Tapi teendenya pituntoung heꞌua irasainya sima lasiaeleo,
karna agagalangnya eibengkel heꞌua.
21 Touk heꞌua siYakub nonjarita eisiLaban,
“Pituntoungo nalabato.
Veenaꞌomo siaꞌu molapi concoono teungamu.”
22 Lamai heꞌua siLaban nongundang jojoo tetoo ane nonggauka teparoa.
23 Tapi ndoung heꞌua,
jio siRahel najaok inantara niamanya,
boi siLea,
siYakub noꞌoturu concoono siia.
24 (SiLaban nombee tevotuangnya bengkel,
tetopenya siSilpa eisiLea,
antau majari tevotuangnya.)
25 Titieleonyamai siYakub moꞌotoi jio siRahel boi siLea sanu pinolapinya.
Lamai heꞌua siYakub umaꞌo eisiLaban ane noꞌutanya,
“Neteꞌuya siꞌoo nogugauk heꞌua eisiaꞌu?
Siaꞌu nokarajaamo antau molapi siRahel.
Neteꞌuya siꞌoo nonipu siaꞌu?”
26 SiLaban nonyimbat,
“Nonuruk teada niꞌami,
tesiaꞌa molapi luulu heꞌuapa tetuai.
27 Petaang soduminggu teparoa nuponinikaong eini,
touk heꞌua siaꞌu mombee siRahel eisiꞌoo.
Tapi siꞌoo kanaboi mokarajaa eisiaꞌu pituntoungonye.”
28 SiYakub nonuruk.
Touk soduminggu teparoa heꞌua,
siLaban nombee siRahel majari telapinya.
29 (SiLaban nombee tevotuangnya bengkel,
tetopenya siBilha eisiRahel,
antau majari tevotuangnya.)
30 SiYakub noꞌoturu concoono siRahel.
Siia magalang eisiRahel heꞌuapa eisiLea.
Lamai heꞌua siia nokarajaa pituntoungonye eisiLaban.
Teunga-unga NiYakub
31 Lamai heꞌua teSiopud neꞌita siLea jio noꞌagalani sima siRahel,
teSiopu nombee eisiLea teunga,
tapi siRahel malaung.e
32 SiLea nolumalo ane noguungaa sotoo teunga langkai.
Siia nonjarita,
“TeSiopu neꞌitamo teꞌasesesaꞌu,
ane telapiꞌu mongagalani siaꞌu.”
Teunga heꞌua tinopeinya siRuben.f
33 Lamai heꞌua siLea nolumaloonye ane noguungaa sotoo teunga langkai.
Siia nonjarita.
“TeSiopu nombeemo eisiaꞌu teunga eini karna inepe-Nya siaꞌu jio noꞌagalani nilapiꞌu.”
Teunga heꞌua tinopeinya siSimeon.g
34 Touk heꞌua siLea nolumaloonye ane noguungaa sotoo teunga langkai.
Siia nonjarita,
“Eꞌeini teambok nulapiꞌu melabi neteꞌoto eisiaꞌu karna noguungaa tolutoo teunga langkai eisiia.”
Teunga heꞌua tinopeinya siLewi.h
35 Lamai heꞌua siLea nolumaloonye ane noguungaa sotoo teunga langkai.
Siia nonjarita,
“Eꞌeini siaꞌu nomuji teSiopu.”
Teunga heꞌua tinopeinya siYehuda.
i Touk heꞌua siLea jiongo noꞌoungaonye.