28
1 Lamai heꞌua siꞌIshak noleva siYakub,
nombarakai siia ane nomarentaa,
“Inyaa molapi terandaa lamai teTana nuKanaꞌan eini.
2 Naꞌomo eiTana nuPadan-Aram,
eisikakaimu siBetuel,
ane polapi sotoo teunga bengkel numanggemu siLaban.
3 Siaꞌu nomongi teꞌAlataꞌala Sanu Tututuu Mabaraka mombarakai siꞌoo ane telalapiongmu ane mombee eisiꞌoo teunga ane mopaꞌabari tebija niꞌoo jaok majari tebangsa sanu mooge.
4 Siaꞌu nomongi teꞌAlataꞌala mombarakai siꞌoo ane tebijamu selilio sima Siia mombarakai siꞌAbraham,
antau siꞌemiu maala majari tetogutana eini sanu pinongalalampai eini sanu vineena nuꞌAlataꞌala eisiꞌAbraham.”
5 Lamai heꞌua siꞌIshak nonuju siYakub umaꞌo eiTana nuPadan-Aram,
eisiLaban,
teunga niBetuel tetoo nuꞌAram heꞌua.
SiLaban heꞌua tesiaꞌa niRibka siina niYakub ane niꞌEsau.
SiꞌEsau Nolapionye
6 SiꞌEsau moꞌotoi siꞌIshak nombarakaimo siYakub ane nonuju siia umaꞌo eiTana nuPadan-Aram melolo telapi ampi heꞌua.
Siia moꞌotoi valii,
watu siꞌIshak nombarakai siYakub,
jio noveenaꞌonya siia molapi tebengkel nuKanaꞌan
7 ane siia moꞌotoi valii siYakub nonuruko eitosiaꞌangnya ane umaꞌo eiTana nuPadan-Aram.
8 Jadi siꞌEsau moꞌotoi siamanya jio seilu tebengkel nuKanaꞌan.
9 Karna heꞌua siꞌEsau umaꞌomo eisiꞌIsmael,
teunga niꞌAbraham.
Siia nolapi teunga niꞌIsmael sanu tetopenya siMahalat,
tetuai niNebayot.
SiMahalat heꞌua telapi sanu ototoluaꞌonya.
SiYakub Nongupi EiBetel
10 SiYakub nolinjoꞌimo teKota nuBersyeba ane umaꞌo eiKota nuHaran.
11 Eilalong nupelampaong siia najaok eisobua tebuut siia notitindoung eiriꞌua karna teeleo nosondoko.
Siia noꞌoturu nepake sobua tevatu sima tetambangonnya.
12 Lamai heꞌua siia nongupi ane neꞌita sobua teejang sanu neꞌoro eitana tetuvunya jaok eilangit.
Temalaekat-malaekat nuꞌAlataꞌala nenyau-nomenek nenyau-nomenek eiejang heꞌua.
13 TeSiopua neꞌoro eisevi niYakub ane nonjarita,
“Siaꞌu teSiopu,
teꞌAlataꞌala sanu sinomba niꞌAbraham ane niꞌIshak.
Siaꞌu mombee eisiꞌoo ane eibijamu tetana sanu pinoꞌoturuimu eini.
14 Tebijamu mabari sima teavu eijuniaa.
Siira mepeꞌebilay teonto nutanamu eibarat,
eitimur,
eiꞌutara,
ane eiselatan.
Lamai siꞌoo ane tebijamu,
Siaꞌu mombarakai jojoo tesuku eijuniaa.
15 Lambot,
Siaꞌu monagui siꞌoo ane monjagai siꞌoo mapapaio siꞌoo umaꞌo.
Siaꞌu mongomung siꞌoo metencile umaꞌo eitana eini.
Siaꞌu jio molinjoꞌi siꞌoo jaok Siaꞌu monggauka tesapa sanu jinanjiaꞌU eisiꞌoo.”
16 Lamai heꞌua siYakub nembaung ane nonjarita,
“TeSiopu umai eiriꞌini,
tapi eini paꞌali inotoiꞌu!
17 Eini tututuu tevonua nuꞌAlataꞌala,
tebamba nusuruga.”
SiYakub nobubuleong tutuu ampi heꞌua.
18 Lamai heꞌua titieleonyamai,
siYakub nembaung.
Siia nongala tevatu sanu pinetambangonnya ane nongoroa tevatu heꞌua.
Dinidigaꞌonya telatab nusaitun eibabok nuvatu heꞌua nogutu poolambotong eiꞌAlataꞌala.
19 Eiriꞌua tinopeinya teBetel.
b (Luulu tetope nukota heꞌua teLus.)
20 Lamai heꞌua siYakub nojanji,
“Ane teꞌAlataꞌala monagui ane monjagai siaꞌu eipelampaongu ane mombee eisiaꞌu sanu noꞌinang ane tepakean,
21 jaok siaꞌu metencile masalamat eivonua nutosiaꞌangu,
teSiopu majari teꞌAlataꞌala sanu nosomba niaꞌu.
22 Tevatu poolambotong sanu inoroaꞌu eini majari tevonua nuꞌAlataꞌala.
Lamai jojoo tesapa sanu vineena nuSiopu eisiaꞌu,
siaꞌu montilal sompulutilalong ane mombee setilalong eiSiopu.”