SiꞌIshak Nombarakai SiYakub
27
1 Watu siꞌIshak neisimo ane tematanya jiongo meꞌita,
siia noleva siꞌEsau,
teunganya sanu siaꞌa,
ane nonjarita eisiia,
“Ungaꞌu!”
SiꞌEsau nonyimbat,
“Tesapa?”
2 SiꞌIshak nonjarita,
“Siꞌoo moꞌotoi siaꞌu meisimo.
Siaꞌu jio moꞌotoi siambengi siaꞌu maate.
3 Karna heꞌua alamo tepanamu,
naꞌomo gubasa sambaang tebinaatang eipogubasong niꞌoo.
4 Pogabua siaꞌu sanu noꞌinang sanu mombosi sima sanu seiluꞌu,
lamai heꞌua omung menekai eisiaꞌu.
Touk siaꞌu menginangnya,
Siaꞌu mombarakai siꞌoo jijiompo siaꞌu maate.”
5 Pejajaritaong niꞌIshak ane niꞌEsau heꞌua inepe niRibka.
Watu siꞌEsau nelengkat umaꞌo mogubas,
6 siRibka nonjarita eisiYakub,
“Inepeꞌu siamamu nonjarita eisiꞌEsau sima eini,
7 ‘Pogubas sambaang tebinaatang ane pogabua siaꞌu sanu noꞌinang sanu mombosi.
Touk siaꞌu menginangnya,
siaꞌu mombarakai siꞌoo eitolo nuSiopua jijiompo siaꞌu maate.’
8 Karna heꞌua,
teungaꞌu,
poꞌinepea ane gauka tesapa sanu ujaritaa.
9 Naꞌomo pilei rombaang teunga nubembe sanu mombosi lamai tepetuvuong-petuvuong niꞌita antau siaꞌu mogabu sanu mombosi sima teꞌeseseilu niamamu.
10 Lamai heꞌua omung eisiia antau noꞌinangnya,
touk heꞌua siia mombarakai siꞌoo jijiompo siia maate.”
11 Tapi siYakub noꞌutanya eisiinanya,
“Ina,
iamaꞌo?
Teꞌalae niꞌEsau ovulu,
ane teꞌalaeꞌu jio.
12 Inyanyaa sipapa monggama teꞌalaeꞌu ane moꞌotoi siaꞌu monipunya.
Siia jio mombarakai,
boi mongutuk siaꞌu.”
13 Siinanya nonyimbat,
“Boungaꞌu,
siaꞌu monarima tekutuk heꞌua.
Gauka tesapa sanu pinarentaaꞌu.
Naꞌomo ane ala tebembe-bembe heꞌua.”
14 Lamai heꞌua siYakub umaꞌo nongala tebembe-bembe heꞌua ane nombeena eisiinanya.
Siia nogabu sanu noꞌinang sanu mombosi sima teꞌeseseilu niꞌIshak.
15 Lamai heꞌua siRibka nongala tepakean niꞌEsau sanu mombosi,
sanu inembeaꞌonya eitenda,
ane pinakeaꞌonya eisiYakub,
teunganya sanu pomabusong.
16 Siia valii nomakea teꞌuli nubembe eiꞌongkong ane eigorogot niYakub sanu jio ovulu.
17 Lamai heꞌua vineenaꞌonya eisiYakub sanu noꞌinang sanu mombosi heꞌua ane teroti sanu pinogutunya.
18 Touk heꞌua siYakub umaꞌo eisiamanya ane nonjarita,
“Siamaꞌu!”
Siamanya nonyimbat,
“Tesapa?
Sisee siꞌoo,
siꞌEsau atau siYakub?”
19 SiYakub nonyimbat,
“SiꞌEsau,
teungamu sanu siaꞌa.
Sanu tinuunamu inalaaꞌumo.
Pongodungo ane inango teꞌanes sanu ginubasu eini,
antau siꞌoo maala mombarakaimo siaꞌu.”
20 SiꞌIshak noꞌutanya,
“Iamaꞌo siꞌoo naꞌaala nolongkang tutuu?”
SiYakub nonyimbat,
“Karna teSiopu Alataꞌala sanu sinombamu nonulung siaꞌu.”
21 Lamai heꞌua siꞌIshak nonjarita eisiYakub,
“Poꞌosuk eisiaꞌu antau monggama siꞌoo ane siaꞌu maala moꞌotoi siꞌoo siꞌEsau atau jio.”
22 SiYakub nongosuꞌi siamanya,
ane siamanya heꞌua nonggama siia lamai heꞌua nonjarita,
“Tesuaramu sima tesuara niYakub,
tapi teꞌongkongmu sima teꞌongkong niꞌEsau.”
23 SiꞌIshak jio moꞌotoi siYakub karna teꞌongkongnya ovulu sima teꞌongkong niꞌEsau.
Watu siYakub nobarakaimo niamanya,
24 siia ulengi noꞌutanya sangkaningonye,
“Tutuu siꞌoo teungaꞌu,
siꞌEsau?”
SiYakub nonyimbat,
“Tutuu.”
25 Lamai heꞌua siꞌIshak nonjarita,
“Venii siaꞌu teꞌanes heꞌua.
Touk siaꞌu menginang,
siaꞌu mombarakai siꞌoo.”
SiYakub nombeena teꞌanes heꞌua eisiia ane valii teꞌanggur sanu noinung.
Siia nenginang ane nenginungnya.
26 Lamai heꞌua siamanya nonjarita eisiia,
“Boungaꞌu,
poꞌosuk ane mbongiib siaꞌu.”
27 SiYakub nopoꞌosuk ane nembongi siamanya.
Watu siamanya naꞌanyok teboo nupakean niꞌEsau,
siia nombarakainya.
SiꞌIshak nonjarita,
“Teboo sanu mombosi nuungaꞌu sima teboo eipogubasong sanu binarakai nuSiopu.
28 Siaꞌu nomongi teꞌAlataꞌala mombee tengolu lamai telangit ane mogutu tetudaong morumbang!
Mombee tegando ane teꞌanggur sanu mabari.
29 Siaꞌu nomongi teꞌAlataꞌala mogutu tebangsa-bangsa majari tevotuang-votuang niꞌoo
ane tesuku-suku noposuncul eitolo niꞌoo.
Siꞌoo monguasai jojoo terurusmu,
ane tebija niinamu monuruk eisiꞌoo.
Tetoo-too sanu mongutuk siꞌoo nokutuk
ane tetoo-too sanu mombarakai siꞌoo nobarakai.”
SiꞌEsau Nomongi Nobarakai NiꞌIshak
30 Touk siꞌIshak nombarakai siYakub,
siia nesuvung.
Watu siYakub paꞌali nesuvung,
siꞌEsau najaok lamai tepogubasong.
31 Siia nogabu sanu noꞌinang sanu mombosi valii ane nongomung eisiamanya,
“Bosiamaꞌu,
pongodungo ane inango teꞌanes sanu inomungu eini,
antau siꞌoo maala mombarakaimo siaꞌu.”
32 SiꞌIshak noꞌutanya,
“Sisee siꞌoo?”
Siia nonyimbat,
“Siaꞌu siꞌEsau teungamu sanu siaꞌa.”
33 SiꞌIshak netetarigut tutuu ane gugugur.
Siia noꞌutanya,
“Sisee sanu nogubas ane nombee teꞌanes eisiaꞌu eikokua?
Siaꞌu nenginangnya jijiompo siꞌoo najaok.
Lamai heꞌua siaꞌu nombarakai siia,
ane teberkatc heꞌua majari seende-endenya eisiia.”
34 Watu siꞌEsau neꞌeepe heꞌua,
siia notumangis tutuu karna mepees tutuu teambok.
Siia nonjarita,
“Siamaꞌu barakai siaꞌu valii!”
35 SiꞌIshak nonjarita,
“Tetuaimu najaok ane nonipu siaꞌu.
Siia nongala teberkatmu.”
36 SiꞌEsau nonjarita,
“Masipato tetopenya siYakub.
d Eini rongkaninaꞌonya siia nonipu siaꞌu.
Siia nongala tehaak sima teunga siaꞌa,
ane nongala valii teberkat sanu kanaboi noveena eisiaꞌu.
Siamaꞌu jiongo oberkat ntaninya untuk siaꞌu?”
37 SiꞌIshak nonyimbat,
“Boungaꞌu,
siia monguasai siꞌoo,
ane terururusmu majari tevotuang-votuangnya.
Siaꞌu nomongimo antau teꞌAlataꞌala mombeniinya tegando ane teꞌanggur sanu mabari tutuu.
Siaꞌu jiongo maala monggauka tesapa-sapa eisiꞌoo.”
38 SiꞌEsau nomongi vavalii eisiamanya,
“Siamaꞌu jiongo oberkat ntaninya untuk siaꞌu?
Barakai siaꞌu valii.”
Lamai heꞌua siꞌEsau notumangis tutuu.
39 Lamai heꞌua siꞌIshak nonjaritaonye,
“Tepomoiaong niꞌoo maavar lamai tetana sanu morumbang
ane maavar lamai tengolu lamai telangit.
40 Siꞌoo metuvu mepake teꞌiabut memumusuong ane mongangga
tapi majari tevotuang nutuaimu.
Tapi watu siꞌoo mongeva,
siꞌoo malapas lamai tekuasanya.”
41 Lamai heꞌua siꞌEsau nengkeles eisiYakub karna siamanya nombarakai siia.
SiꞌEsau nomikir,
“Jiongo meende siama niꞌami maate,
touk tewatu sanu moondong heꞌua siaꞌu momate siYakub!”
SiꞌIshak Nonuju SiYakub Umaꞌo EisiLaban
42 Watu siRibka neꞌeepe lamai tetoo terancana niꞌEsau,
teunga sanu siaꞌa heꞌua,
siia nonuju tetoo noleva siYakub,
teunga sanu pomabusong,
ane nonjarita,
“Poꞌinepea,
siaꞌamu,
siꞌEsau,
seilu mesava ane momate siꞌoo.
43 Boungaꞌu,
gauka tesapa sanu ujaritaa.
Naꞌomo molongkang eisiaꞌa niaꞌu,
siLaban,
eiKota nuHaran.
44 Pomoia concoono siia ampi heꞌua meende sedeꞌi,
jaok siaꞌamu jiongo nongoungkul.
45 Watu siia mongelingana tesapa sanu pinogugauk niꞌoo eisiia,
siaꞌu monuju tetoo mongala siꞌoo.
Siaꞌu jio seilu siꞌoo nopatei lamai heꞌua siꞌEsau nopatei,
e jaok napadaf siꞌemiu rotoo seeleo.”
46 Lamai heꞌua siRibka nonjarita eisiꞌIshak,
“Siaꞌu nengkeleso neꞌita tegauk-gauk nulapi-lapi niꞌEsau lamai teHet.
Ane siYakub valii nolapi tebengkel nuHet,
aginyamo siaꞌu maate.”