SiꞌIshak Nomoia EiKota NuGerar
26
1 EiTana nuKanaꞌan najarionye teorok,
sima sanu najarimo watu siꞌAbraham ulengi tutuvu.
Karna heꞌua siꞌIshak umaꞌo eisiꞌAbimelekh,
tepuang nutoo-too nuPilistin,
eiKota nuGerar.
2 Tegauk heꞌua pinogutunya karna teSiopua najaok eisiia ane nonjarita,
“Inyaa umaꞌo eiMesir.
Pomoiamo eitana sanu Utujua eisiꞌoo.
3 Pomoia eitana eini sima tetoo sanu mokurang.
Siaꞌu monagui siꞌoo ane mombarakai siꞌoo.
Jojoo tetana eini Uveena eisiꞌoo ane eibija niꞌoo.
Siaꞌu monggauka tesapa sanu jinanjiaꞌUmo eisiꞌAbraham siamamu.
4 Siaꞌu mopaꞌabari tebija niꞌoo sima tevituong eilangit.
Jojoo tetana eini Uveena eisiira.
Lamai tebijamu jojoo tebangsa eijuniaa maꞌaala teberkat.
5 Siaꞌu mombarakai siꞌemiu,
karna siꞌAbraham nonuruk eiSiaꞌu.
Siia nonggauka teparentaꞌU.
Siia nonuruꞌi tehukumU,
tesapa sanu jinaritaaꞌU ane sanu pinaguruaꞌU eisiia.”
6 Karna heꞌua siꞌIshak nomoia eiKota nuGerar.
7 Watu tetoo-too eiriꞌua noꞌutanya sima silapinya,
siꞌIshak nonyimbat,
“Siia tetuaiꞌu,”
karna siia nobule nonjarita,
“Siia telapiꞌu.”
SiꞌIshak nobule inyaa-nyaa tetoo-too eiriꞌua momate siia antau mongala siRibka telapinya,
karna siRibka magaya tutuu.
8 Touk siꞌIshak neendemo nomoia eiriꞌua,
vavalii seeleo tePuang siꞌAbimelekh nonyilig lamai tejandela ane neꞌita siꞌIshak negonggolong concoono siRibka.
9 Lamai heꞌua siꞌAbimelekh noleva siꞌIshak ane nonjarita,
“Tebengkel heꞌua tutuu telapimu.
Neteꞌuya siꞌoo nonjarita siia tetuaimu?”
SiꞌIshak nonyimbat,
“Siaꞌu nomikir,
ane siaꞌu nonjarita siia telapiꞌu,
siaꞌu nopatei.”
10 SiꞌAbimelekh nonjarita,
“Jio mombosi sanu pinogugauk niꞌoo eisiꞌami.
Ane rapangnya sotoo lamai tetoo-tooꞌu moꞌoturu concoono telapimu,
siꞌoo sanu monyabaa tedosa heꞌua.”
11 Lamai heꞌua siꞌAbimelekh nomarentaa eijojoo tetoonya,
“Sisee-see mogugauk sanu majaat eitoo eini atau eilapinya,
nohukum maate.”
12 Touk heꞌua siꞌIshak nongambura tevuꞌu-vuꞌu eitana,
toung heꞌua naꞌaala tehasil sagatusngkaning lamai sanu inambura karna teSiopu nombarakai siia.
13 Teꞌakakayanya nentiang ane siia najari nakaya tutuu.
14 Mabari tutuu tedomba,
tebembe,
tesapi ane tevotuang jaok tetoo-too nuPilistin eiriꞌua meerat neꞌita siia.
15 Lamai heꞌua siira nonambuni tetana eilalong jojoo nubumbun sanu ginaung nuvotuang-votuang niamanya watu ulengi netuvu siꞌAbraham.
16 Lamai heꞌua siꞌAbimelekh nonjarita eisiꞌIshak,
“Naꞌomo lamai tetana niꞌami.
Siꞌoo nokuasa heꞌuapa siꞌami.”
17 Karna heꞌua siꞌIshak umaꞌo ane nongulea tetenda-tendanya eiLembok nuGerar ane nomoia eiriꞌua.
18 Siia nonggaung vavalii tebumbun-bumbun sanu ginaung watu ulengi netuvu siꞌAbraham ane sanu tinambuni nutoo-too nuPilistin touk siꞌAbraham naate.
Tebumbun-bumbun heꞌua tinopei niꞌIshak selilio sima vineena niamanya.
19 Tevotuang-votuang niꞌIshak nonggaung tebumbun sanu vuou eiLembok nuGerar ane naꞌajaok eibumbun heꞌua teogo sanu noncolog.
20 Tetopomiara-topomiara tepetuvuong eiGerar nebabantaong concoono tetopomiara-topomiara tepetuvuong niꞌIshak.
Siira nonjarita,
“Eini teogo niꞌami.”
Karna siira nebabantaong,
siꞌIshak nonopei tebumbun heꞌua teꞌEsek.b
21 Tevotuang-votuang niꞌIshak nonggaung tebumbun eisantaninya,
lamai heꞌua siira ane tetoo-too eiGerar nebabantaongonye sima tebumbun heꞌua.
Karna heꞌua,
siꞌIshak nonopei tebumbun heꞌua teSitna.c
22 Lamai heꞌua siia nombalik lamai eiriꞌua ane nonggaung tebumbunonye.
Tapi jio najari nebabantaong eiolot tevotuang-votuang niꞌIshak ane tetoo-too eiGerar.
Karna heꞌua siꞌIshak nonopei tebumbun heꞌua Rehobotd ane nonjarita,
“Eꞌeini teSiopu nopaꞌaloas tepomoiaong niꞌita,
ane siꞌita majari mabari eitana eini.”
23 Lamai heꞌua siꞌIshak nelampa ane najaok eiKota nuBersyeba.
24 Ndoung heꞌua teSiopu najaok eisiia ane nonjarita,
“Siaꞌumo teꞌAlataꞌala niamamu siꞌAbraham.
Inyaa mobule.
Siaꞌu monagui siꞌoo.
Siaꞌu mombarakai siꞌoo ane mombee eisiꞌoo tebija sanu mabari karna tejanjiꞌU eisiꞌAbraham,
tevotuangU.”
25 Lamai heꞌua siꞌIshak nogutu teporampunong tepombee ane nonyomba teSiopu eiriꞌua.
Siia nongulea tetenda-tendanya eiriꞌua ane tevotuang-votuangnya nonggaung tebumbun sanu ntaninya.
Tepejanjiong NiꞌIshak Ane NiꞌAbimelekh
26 Vavalii seeleo tePuang siꞌAbimelekh najaok lamai teKota nuGerar,
concoono siꞌAhusat,
tetoo sanu nondulu siia momikir,
ane siPikhol,
tetopomimpin nutantaranya,
untuk monjaoꞌi siꞌIshak.
27 Lamai heꞌua siꞌIshak noꞌutanya eisiira,
“Neteꞌuya siꞌemiu monjaoꞌi siaꞌu,
luulu siꞌemiu nengkeles ane nonuju siaꞌu lamai tetana niꞌemiu?”
28 Lamai heꞌua siira nonyimbat,
“Siꞌami neꞌita mapatas teSiopu nonagui siꞌoo.
Karna heꞌua aginya siꞌita mogutu tejanji.
29 Maemo siꞌita nojanji siꞌoo jio mogutu teꞌajajaat eisiꞌami,
sima heꞌua valii siꞌami jio nogutu teꞌajajaat eisiꞌoo.
Siꞌami nombosimo eisiꞌoo ane nomatuvayaa siꞌoo nelampa lamai siꞌami eilalong nembombosiong.
Eꞌeini siꞌoo binarakai nuSiopu.”
30 Lamai heꞌua siꞌIshak nomaꞌinang siira ane siira nenginang ane nenginung concoono.
31 Lamai heꞌua titieleonyamai,
siira nembaung ane nogutu tejanji.
Lamai heꞌua siꞌIshak nonjarita,
“Poꞌombosi eijalang.”
Siira neꞌaꞌantaong sima tetoo sanu membombosiong.
32 Eieleo heꞌua valii tevotuang-votuang niꞌIshak najaok ane nongulara eisiia sima tebumbun sanu ginaung niira.
Siira nonjarita,
“Siꞌami naꞌaalamo teogo.”
33 Lamai heꞌua siꞌIshak nonopei tebumbun heꞌua teSyeba.
e Heꞌua tesabanya tekota heꞌua tinopei teBersyebaf jaok eleo eini.
Telapi-lapi NiꞌEsau Lamai Tesuku Ntaninya