Tebija NiꞌAbraham Lamai Telapinya Sanu Ntaninya
(1Taw. 1:32-33)
25
1 SiꞌAbraham nolapi concoono sotoo tebengkel santaninyaonye sanu tinope siKetura.
2 Telapinya heꞌua noguungaa teunga-unga sanu tinope siSimran,
siYoksan,
siMedan,
siMidian,
siꞌIsybak,
ane siSuah.
3 SiYoksan siama niSyeba ane niDedan,
ane tebija niDedan heꞌua tetoo-too niꞌAsyur,
tetoo-too niLetush,
ane tetoo-too niLeum.
4 Teunga-unga niMidian heꞌua siꞌEva,
siꞌEver,
siHenokh,
siꞌAbida,
ane siꞌEldaꞌa.
Siira jojoo tebija niKetura.
5 Touk siꞌAbraham naate,
jojoo teharta vineena eisiꞌIshak.
6 Tapi jijiompo siꞌAbraham maate,
siia nombeena tepombee-pombee eiunga-unga nusarue-saruenya.
Lamai heꞌua tinujunya teunga-unga heꞌua nombalik umaꞌo eipomoiaong eisabata nutimur nuTana nuKanaꞌan,
antau mongavari siꞌIshak teunganya.
SiꞌAbraham Naate Ane Tinanona
7-8 Teꞌumur niꞌAbraham nagana 175 ntoung watu siia naate.
9 Siia tinanona nuunga-unganya,
heꞌua siꞌIshak ane siꞌIsmael,
eiGoa nuMakhpela sanu tepatagnya eijoꞌong sabata tetimur nuMamre.
Luulu tejoꞌong heꞌua tejoꞌong niꞌEvron teunga niSohar,
tetoo nuHet
10 tapi inolimo niꞌAbraham lamai tetoo-too nuHet heꞌua.
Ampi heꞌua siꞌAbraham tinanona concoono siSara,
telapinya.
11 Touk siꞌAbraham naate,
teꞌAlataꞌala nombarakai siꞌIshak teunga niꞌAbraham.
Watu heꞌua siꞌIshak nomoia moꞌosuk eibumbun sanu tinope teLahai-Roi.a
Tebija NiꞌIsmael
(1Taw. 1:28-31)
12 Eini tetuturong tebija niꞌIsmael,
teunga niꞌAbraham ane niHagar.
SiHagar heꞌua tebengkel nuMesir,
tevotuang niSara.
13 Einimo tetope nuunga-unga niꞌIsmael neancu-ancunong sima tepoguunga siira.
SiNebayot,
teunga siaꞌa niꞌIsmael,
ancunaꞌonya siKedar,
siꞌAdbeꞌel,
siMibsam,
14 siMisyma,
siDuma,
siMasa,
15 siHadad,
siTema,
siYetur,
siNavish ane siKedma.
16 Heꞌuamo teunga-unga niꞌIsmael,
ane heꞌua tetope-tope niira,
monuruk tekampung niira ane monuruk teponendaong niira,
sompulu rotoo tepuang,
concoono tesuku-suku niira.
17 Teꞌumur niꞌIsmael nagana 137 ntoung watu siia naate.
18 Tebijanya nomoia eitana eiolot teKota nuHawila ane teKota nuSyur lamai teTana nuMesir jaok teKota nuꞌAsyur.
Siira nomoia neꞌaꞌantaong lamai tebija niꞌAbraham sanu ntaninya.
Tepoguungaa SiꞌEsau Ane SiYakub
19 Eini tetuturong tebija niꞌIshak,
teunga niꞌAbraham.
20 Teꞌumur niꞌIshak 40 ntoung watu siia nolapi concoono siRibka,
teunga niBetuel ane tetuai niLaban,
siira tetoo-too nuꞌAram lamai teTana nuPadan-Aram.
21 SiRibka malaung,
b karna heꞌua siꞌIshak nongganea eiSiopuc telapinya.
TeSiopu nonyimbat tegane niꞌIshak,
jaok siRibka nolumalo.
22 Jijiompo teunga-unga heꞌua nopoguungaa,
siira nesusubitong eilalong nuꞌoungaongnya.
SiRibka noꞌutanya,
“Neteꞌuya tegauk eini najari eiꞌalaeꞌu?”
Lamai heꞌua siia noꞌutanya eiSiopu sima teunganya heꞌua.
23 TeSiopu nonjarita eiSiia,
“Tebija nuunga-unga eiꞌoungaongmu majari robangsa.
Tebija nuunga-ungamu majari robangsa sanu neꞌaꞌantaong.
Tetuainya moꞌuig heꞌuapa tesiaꞌanya.
Tesiaꞌa majari tevotuang nutuainya.”
24 Najaoko tewatunya siRibka moguungaa,
ane siia noguungaa rotoo teunga langkai nepinga.
25 Sanu siaꞌa terupanya mododa,
ane teꞌulinya sima tejuba sanu ovulu.
Karna heꞌua siia tinopei siꞌEsau.d
26 Watu teunga ororuaaꞌonya pinoguungaa,
telimanya nondiit teꞌintid niꞌEsau.
Karna heꞌua siia tinopei siYakub.
e Teꞌumur niꞌIshak 60 ntoung watu siira pinoguungaa.
SiꞌEsau Nobaluk Tehaaknya Sima Teunga Siaꞌa
27 Rotoo teunga heꞌua mabaꞌay.
SiꞌEsau najari tetopogubas sanu mapande ane seilu momoia eitana ogio.
Tapi tesipa niYakub heꞌua metenaang ane seilu momoia eitenda.
28 SiꞌIshak magalang eisiꞌEsau,
heꞌuapa eisiYakub,
sabanya siꞌIshak seilu menginang teꞌanes sanu nogubas niꞌEsau.
Tapi siRibka magalang eisiYakub,
heꞌuapa eisiꞌEsau.
29 Vavalii seeleo watu siYakub pepees nogabu,
siꞌEsau najaok lamai tepogubasongnya.
Siia noorok tutuu.
30 Siia nonjarita eisiYakub,
“Siaꞌu noorok tutuu.
Momongi sedeꞌi sanu mododa pinogabu niꞌoo heꞌua.”
(Heꞌua tesabanya siia tinope siꞌEdom.f)
31 SiYakub nonyimbat,
“Maala,
tapi pobaluko luulu tehaakmu sima teunga siaꞌa.”g
32 SiꞌEsau nonjarita,
“Siaꞌu sedeꞌipo maate moorok.
Jio oguna eisiaꞌu tehaak heꞌua.”
33 SiYakub nonyimbat,
“Pojanji eꞌeini siꞌoo mombeena tehaakmu heꞌua eisiaꞌu.”
Karna heꞌua siꞌEsau nojanji ane nombeena tehaaknya eisiYakub.
34 Touk heꞌua siYakub nombeenaꞌonya teroti ane setilalong lamai tetambue mododa heꞌua.
SiꞌEsau nenginang ane nenginung heꞌuapa umaꞌo.
Sima heꞌua siꞌEsau jio mohargai tehaaknya sima teunga siaꞌa.