Tevotuang NiꞌAbraham Nelolo Sotoo Najari Telapi NiꞌIshak
24
1 SiꞌAbraham neisimo tututuu,
ane siia tututuu binarakai nuSiopu.a
2 Vavalii seeleo siꞌAbraham nonjarita eivotuangnya sanu neisimo,
sanu nongurus jojoo tehartanya,
“Embea telimamu eiangkop nupalangaꞌu.b
3 Mojanji nosabii nuSiopu Alataꞌala sanu nonguasai tejuniaa ane telangit,
antau siꞌoo jio meloloa telapi niꞌIshak teungaꞌu lamai tebengkel-bengkel nuKanaꞌan eini.
4 Siꞌoo kanaboi metencile umaꞌo eitanaꞌu ane eirururusu ane meloloa telapi sanu maala nopolapi nuungaꞌu,
siꞌIshak.”
5 Heꞌuapa tevotuang heꞌua noꞌutanya eisiia,
“Iamaꞌo ane terandaa heꞌua jio seilunya molinjoꞌi tevonuanya ane jio seilu monuut siaꞌu menekai eitana eini?
Siaꞌu mongomung teunga nutuan heꞌua eitana lamai teꞌasal nutuan?”
6 Tapi siꞌAbraham nonyimbat,
“Jio!
Inyaa noꞌomung niꞌoo teungaꞌu umaꞌo ampi heꞌua!
7 TeSiopu,
teꞌAlataꞌala sanu nonguasai telangit,
nongomung siaꞌu lamai tevonua niamaꞌu lamai tetana nurururusu,
ane Siia nojanji eisiaꞌu Siia mombeena tetana eini eibijaꞌu.
Siia valii monuju temalaekat-Nya untuk monuluni siꞌoo antau siꞌoo maꞌajaok sotoo telapi lamai ampi heꞌua untuk teungaꞌu.
8 Tapi ane terandaa heꞌua jio seilu monuut concoono siꞌoo,
siꞌoo nebebas lamai tejanji eini.
Boi inyaa noꞌomung niꞌoo teungaꞌu heꞌua umaꞌo ampi heꞌua.”
9 Lamai heꞌua tevotuang heꞌua nongembea telimanya eiangkop nupalanga niꞌAbraham,
tetuannya,
ane nojanji monggauka tesapa sanu pinomongi niꞌAbraham heꞌua.
10 Tevotuang heꞌua nongala sompulumbaang teꞌunta ane nengangayaongc tesasagara sanu ooli teharta niꞌAbraham ane umaꞌo eikota pomoiaong niNahor,
siaꞌa niꞌAbraham,
eisabata nuꞌutara eiWilaya nuMesopotamia.
11 Watu siia najaok eiriꞌua,
pinopoꞌondoknya teꞌunta-unta heꞌua moꞌosuk eibumbun eiaang nukota.
Teeleo beimbengimo,
ane heꞌua tewatunya tebengkel-bengkel majaok eibumbun ane monambu teogo.
12 Lamai heꞌua tevotuang heꞌua nonggane,
“BoSiopu,
teꞌAlataꞌala sanu sinomba nutuanu siꞌAbraham,
tuluni,
antau maꞌaala telapi niꞌIshak eleo eini.
Popoꞌitaa Siꞌoo monggalani tetuanu siꞌAbraham sima eini.
13 Itai,
siaꞌu neꞌoro moꞌosuk tebumbun eini.
Sedeꞌimaꞌo valii terandaa-randaa lamai tekota majaok monambu teogo.
14 Siaꞌu monjarita eisotoo lamai siira,
‘Mongitulung nyaua tepongembeongmu teogo ane venii siaꞌu menginung.’
Ane siia nonyimbat,
‘Inungo,
ane teꞌunta-unta niꞌoo valii upainung,’
siaꞌu moꞌotoi siia sanu pinilei nuSiopu untuk tevotuangmu siꞌIshak.
Ane tegauk heꞌua majari,
siaꞌu moꞌotoi teSiopu nopoꞌitaa teꞌagagalang Niꞌoo eituanu siꞌAbraham.”
15-16 Pepees siia nonggane heꞌua,
siRibka,
sotoo terandaa sanu magaya tutuu,
sanu jiompo moꞌoturu concoono sotoo telangkai,
najaok eibumbun heꞌua nonyumbi tepongembeong teogo eibabok nudodompalnya.
Siia teunga niBetuel,
ane tetosiaꞌang niBetuel siNahor ane siMilka.
SiNahor heꞌua tesiaꞌa niꞌAbraham.
SiRibka nenyau eibumbun heꞌua ane nongisia teogo eipongembeongnya,
lamai heꞌua siia umenek.
17 Tevotuang niꞌAbraham heꞌua nelinjok nongosuꞌinya ane nonjarita,
“Tuluni,
bounga,
painungomai siaꞌu sedeꞌi teogo lamai tepongembeong teogomu heꞌua.”
18 Terandaa heꞌua nonyimbat,
“Inungo,
Mangge.”
Heꞌuapa lolongkang nonyaua tepongembeong teogonya lamai tedodompalnya,
ane nondiit tepongembeong teogo heꞌua vinenaꞌonya eivotuang heꞌua teogo.
19 Watu tevotuang heꞌua notouk nenginung,
terandaa heꞌua nonjarita,
“Siaꞌu monambu teogo nuꞌunta-unta niMangge valii antau jojoo tebinaatang heꞌua maala menginung jaok mabasa.”
20 Lamai heꞌua selengaan teogo eilalong nupongembeong heꞌua tinubanaꞌonya eilalong nupenginunong nuꞌunta-unta.
Lamai heꞌua siia nelinjok netencile umaꞌo tebumbun untuk monambu teogo nelabi nabari valii jaok jojoo tebinaatang heꞌua mabasa nenginung.
21 Pepees terandaa heꞌua nokarajaa,
tevotuang niꞌAbraham heꞌua tatarus nonyinyilig ane nopoodoy.
Siia seilu moꞌotoi teSiopu mondulu siia maꞌaala telapi niꞌIshak atau jio.
22 Touk jojoo teꞌunta-unta nenginung nabasa,
tevotuang niꞌAbraham mongala tenganganti nuenged tebulaan sanu kira-kira 5 gram ane sapaar tegalang tebulaan sanu 110 gram.
Lamai heꞌua vineenaꞌonya eirandaa heꞌua.
23 Heꞌuapa tevotuang heꞌua nonjarita,
“Arai ulara sisee siamamu.
Umai tepomoiaong eivonuamu siaꞌu ane tetagu-taguꞌu maala motitindoung?”
24 Terandaa heꞌua nonyimbat,
“Siamaꞌu siBetuel,
teunga niNahor ane niMilka.
25 Eivonua niꞌami umai teremput sanu maala nopake niꞌemiu nopoꞌoturui nubinaatang ane valii mabari tegugus sanu maala noꞌinang nubinaatang.
Siꞌami opomoiaong antau siꞌoo maala motitindoung.”
26 Lamai heꞌua noposuncul tevotuang heꞌua nonyomba teSiopu.
27 Siia nonjarita,
“Pujimo teSiopu,
teꞌAlataꞌala nutuanu siꞌAbraham.
TeSiopu nesetia ane magalang eisituanu siꞌAbraham.
TeSiopu nongomung siaꞌu umaꞌo eivonua nurururusnya.”
28 Lamai heꞌua terandaa heꞌua nelinjok eivonua niinanya ane nongulara eisiira sombonua niinanya jojoo sanu najari heꞌua.
29-30 SiRibka umai sotoo tesiaꞌa langkai,
tetopenya siLaban.
Siia neꞌeepe tejarita nutuainya tesapa sanu jinaritaa nuvotuang heꞌua.
Siia neꞌita valii tenganganti eienge ane tegalang eiꞌongkong nutuainya heꞌua.
Lamai heꞌua nelinjok siLaban nesuvung lamai tevonua monjaoꞌi tevotuang niꞌAbraham heꞌua sanu neꞌoro concoono teꞌunta-untanya eiꞌosuk nubumbun.
31 Heꞌuapa siLaban nonjarita,
“Mangge,
tetoo binarakai nuSiopu!
Inyaa momoia eiaangnya eini.
Maemo umaꞌo eivonua niꞌami.
Siꞌami nonyadiaaꞌomo tepoꞌoturuong niMangge ane valii tepomoiaong nuꞌunta-unta niMangge.”
32 Lamai heꞌua tevotuang heꞌua nonuut ane nentama eilalong nuvonua.
Teꞌomunong nyinaua lamai teꞌunta-unta ane vineena tegugus noꞌinang.
Touk heꞌua inomung nuvotuang heꞌua teogo teponambas tepaa nuvotuang niꞌAbraham ane tetoo-toonya.
33 Watu sanu noꞌinang inembea eitolonya,
tevotuang heꞌua nonjarita,
“Ane jiompo mongulara tetutuunong sanu uꞌomung,
siaꞌu jio menginang.”
SiLaban nonjarita,
“Ularaꞌomo.”
34 Lamai heꞌua tevotuang niꞌAbraham nonjarita,
“Siaꞌu eini tevotuang niꞌAbraham.
35 TeSiopu nombarakai tutuu tetuanu heꞌua jaok nopaꞌajari siia nakaya tutuu.
TeSiopu nombeena eisiia nabari tedomba,
tebembe,
tesapi,
teꞌunta,
tekeledai,
ane valii teperak,
tebulaan,
ane tevotuang telangkai ane tevotuang tebengkel.
36 Eiꞌumur sanu meisi,
siSara,
telapi nutuanu heꞌua noguungaa teunga langkai,
ane tetuanu mombeena jojoo tehartanya eiunganya heꞌua.
37 Siia nonuju siaꞌu nojanji antau nonuruꞌi teparentanya.
Jinaritaaꞌonya,
‘Inyaa momile telapi nuungaꞌu lamai terandaa-randaa nuKanaꞌan eini.
38 Tapi siꞌoo kanaboi umaꞌo eirururus niamaꞌu ane melolo sotoo telapi nuungaꞌu ampi heꞌua.’
39 Lamai heꞌua siaꞌu noꞌutanya eituanu,
‘Iamaꞌo ane terandaa heꞌua jio seilu monuut concoono siaꞌu?’
40 Heꞌuapa siꞌAbraham nonyimbat,
‘TeSiopu sanu kalepu uturuꞌi,
monuju temalaekat-Nya monagui siꞌoo maꞌaala telapi niꞌIshak.
Siꞌoo metepojaok telapi nuungaꞌu lamai terururusu mboto,
heꞌua lamai terururus niamaꞌu.
41 Ane siꞌoo umaꞌo eirururusu,
ane siira jio mombee terandaa heꞌua umaꞌo concoono siꞌoo,
siꞌoo mebebas lamai tejanjimu.’
42 Watu siaꞌu najaok eibumbun eikokua,
siaꞌu nonggane eilalong nuambok,
‘teSiopu,
teꞌAlataꞌala nutuanu siꞌAbraham,
ane Siꞌoo seilu,
tuluni siaꞌu maꞌaala telapi niꞌIshak.
43 Siaꞌu tatarus meꞌoro eiꞌosuk nubumbun eini.
Ane umai sotoo terandaa majaok nonambu teogo,
siaꞌu monjarita eisiia,
“Tuluni,
venii siaꞌu sedeꞌi teogo menginung lamai tepongembeongmu heꞌua.”
44 Ane siia nonjarita,
“Inungo,
ane siaꞌu monambu valii teogo nuꞌunta-unta,”
siaꞌu moꞌotoi siiamo sanu pinilei nuSiopu,
majari telapi nuunga nutuanu.’
45 Jiompo notouk valii siaꞌu monggane heꞌua eilalong nuambok,
najaoko siRibka nongomung tepongembeong teogo eibabok nudodompalnya ane umanyau nonambu teogo lamai tebumbun.
Lamai heꞌua siaꞌu nonjarita eisiia,
‘Tuluni venii siaꞌu teogo.’
46 Lolongkang siia nenyaua tepongembeong teogo heꞌua lamai tedodompalnya ane nonjarita,
‘Inungo,
ane teꞌunta-unta niꞌoo valii uvenii teogo.’
Heꞌuapa siaꞌu nenginung ane notouk heꞌua teꞌunta-untaꞌu valii vineniinya teogo.
47 Notouk heꞌua siaꞌu noꞌutanya,
‘Siꞌoo teunga nisee?’
Siia nonyimbat,
‘Siaꞌu teunga niBetuel,
teunga niNahor ane niMilka.’
Heꞌuapa siaꞌu nomakea tenganganti eiengenya ane tegalang eiꞌongkongnya.
48 Siaꞌu nopotuꞌu ane noposuncul nonyomba teSiopu.
Siaꞌu nomuji teSiopu,
teꞌAlataꞌala nutuanu siꞌAbraham.
Siia nongomung siaꞌu eijalang sanu tutuu naꞌajaok terandaa eini untuk teunganya.
49 Eꞌeini,
ane siꞌemiu nesiap monggauka sanu nesetia ane magalang eituanu,
mongulara eisiaꞌu.
Tapi ane jio,
ulara valii antau siaꞌu moꞌotoi kanaboi monggauka tesapa.”
50 SiLaban ane siBetuel nonyimbat,
“Siꞌami jio maala monjarita tesapa-sapa karna tesapa sanu najari najaok lamai teSiopu.
51 Eini siRibka.
Patuvaya siia monuut concoono siManggee ane majari telapi nuunga nutuanmu,
sima sanu inulara nuSiopu mboto.”
52 Watu tevotuang niꞌAbraham heꞌua neꞌeepe tejarita niira siia noposuncul nonyomba teSiopu.
53 Lamai heꞌua siia nonyuvuna tepakean,
ane teponggaya teperak ane tebulaan,
ane nombeena jojoo heꞌua eisiRibka.
Eisiaꞌanya ane siinanya vineniinya valii tepombee sanu nosuli.
54 Touk heꞌua tevotuang niꞌAbraham ane tetoo-toonya nenginang ane nenginung,
heꞌuapa notitindoung eiriꞌua.
Notouk siira nembaung titieleonyamai,
tevotuang heꞌua nonjarita,
“Patuvaya siaꞌu metencile umaꞌo eituanu.”
55 Tapi tesiaꞌa ane siina niRibka nonjarita,
“Patuvaya siRibka nomoia concoono siꞌami kira-kira sompulueleopo,
ane notouk heꞌua maala siia umaꞌo.”
56 Tapi tevotuang heꞌua nonjarita,
“Inyaa notaani siaꞌu.
TeSiopu nogutu tepelampaꞌu ohasil.
Patuvaya siaꞌu metencile eituanu.”
57 Siira nonyimbat,
“Maemo siꞌita moleva siRibka ane moꞌutanya teꞌeseseilunya.”
58 Lamai heꞌua siira noleva siRibka ane noꞌutanya,
“Seilu niꞌoo monuut tetoo eini?”
Nonyimbat terandaa heꞌua,
“Oie,
siaꞌu seilu.”
59-60 Lamai heꞌua siira nombeena siRibka ane tetopomiaranya umaꞌo concoono tevotuang niꞌAbraham ane tetoo-toonya.
Lamai heꞌua terururus niRibka nombarakai siia nonjaritaa tejarita eini,
“Botuai niꞌami.
Siꞌami nomongi eiꞌAlataꞌala mopaꞌajari siꞌoo siina nutoo nejuta
ane nomongia tebijamu mondaag temusu-musu niira jaok momoia eikota-kota niira!”
61 Lamai heꞌua nendolong siRibka ane tevotuang-votuangnya bengkel,
heꞌuapa nesave teꞌunta-unta ane nelampa nonuut tevotuang niꞌAbraham heꞌua.
62 Watu heꞌua siꞌIshak najaok lamai tetana sanu jio pinomoiai nutoo,
nalabat teBumbun nuLahai-Roi karna siia nomoia eiselatan nuTana nuKanaꞌan.
63 Watu beimbengimo siia nesuvung lamai tetendanya lalampa eitana ogio lamai heꞌua initanya teꞌunta-unta najaok.
64 Watu siRibka neꞌita siꞌIshak,
siia nenyau lamai teꞌuntanya,
65 ane noꞌutanya eivotuang niꞌAbraham heꞌua,
“Sisee telangkai heꞌua sanu pepees nelampa monjaoꞌi siꞌita?”
Tevotuang heꞌua nonyimbat,
“Siia tetuanu.”
Heꞌuapa siRibka nongala tepongompotnya ane nongompoti telionya.
66 Lamai heꞌua tevotuang heꞌua nonjaritaa eisiꞌIshak jojoo sanu ginaukaꞌonya.
67 Touk heꞌua siꞌIshak nongomung siRibka nentama eilalong nutenda niSara siinanya,
ane siia nolapi siRibka.
SiꞌIshak nongagalani siRibka.
Karna heꞌua masanango teambok niꞌIshak lamai teꞌoꞌoondong nuamboknya nolambot siinanya naate.