SiSara Naate Ane SiꞌAbraham Nongoli Tetana Tepontanonong
23
1 Teꞌumur niSara nagana 127 ntoung.
2 Lamai heꞌua siia naatemo eiKota nuKiryat-Arba,
sanu eꞌeini tinope teKota nuHebron,
eiTana nuKanaꞌan.
SiꞌAbraham noondong ane notumangis karna silapinya naate.
3 Lamai heꞌua siꞌAbraham nolinjoꞌimo tebatang nilapinya heꞌua ane umaꞌomo eitoo-too nuHet,
sanu nomoia eikampung heꞌua.
Siia nonjarita eisiira,
4 “Siaꞌu eini tetoo sanu mokurang sanu nomoia eitana niꞌemiu.
Ane maala,
patuvaya siaꞌu mongoli selibok tetana eiriꞌini antau siaꞌu maala montanona silapiꞌu.”
5 Siira nonyimbat,
6 “BoMangge,
siꞌoo noongkoi niꞌami simamo tetopomimpin sanu moꞌuig eiolot niꞌami,
jadi tanongo silapimu eilalong nupontanonong niꞌami sanu mombosi tututuu.
Siꞌami jojoo masanang monyadiaa tepontanonong untuk silapimu.”
7 Lamai heꞌua siꞌAbraham noposuncul eitolo nutoo-too nuHet heꞌua.
8 Lamai heꞌua siia nonjarita eisiira,
“Ane siꞌemiu jojoo momatuvayaa siaꞌu montanona silapiꞌu eiriꞌini,
dului siaꞌu pomongiaꞌomai eisiꞌEvron,
teunga langkai niSohar,
9 antau siia mobaluk eisiaꞌu teGoaa nuMakhpela sanu eipipit nujoꞌongnya.
Nombosi siia mobaluk tetana heꞌua eisiaꞌu ane sinabii niꞌemiu jojoo.
Teolinya ubayari jojoo antau tetana heꞌua majari tetanaꞌu ane nopake sima tepontanonong.”
10 Eiwatu heꞌua siꞌEvron pepees nongodung concoono tetoo-too nuHet heꞌua eipejajaoꞌong eibamba nukota.
Lamai heꞌua concoono sinabiimo jojoo nutoo sanu umai eiriꞌua,
siia nonyimbat,
11 “Jio boManggeꞌu.
Poꞌinepeaꞌomo siaꞌu!
Tejoꞌong ane tegoa sanu umai ampi heꞌua uveenaꞌomo eisiꞌoo,
sinabii jojoo tetoo sanu umai eiriꞌini,
antau siꞌoo maala montanona silapi niꞌoo.”
12 Heꞌuapa siꞌAbraham noposunculonye eitolo nutoo-too nuHet heꞌua.
13 Inepemo jojoo nutoo siia nonjarita eisiꞌEvron “Siaꞌu momongi siꞌoo meꞌeepe siaꞌu.
Siaꞌu seilu mongoli tejoꞌong heꞌua.
Tarimamo tedoi antau siaꞌu montanonaꞌomo silapiꞌu ampi heꞌua.”
14 SiꞌEvron nonyimbat,
15 “BoManggeꞌu,
soꞌompol tetana sanu teolinya boi apakilo santanga teperak.
b Siꞌoo ane siaꞌu jio paraluu momikir sima teolinya.
Tanonaꞌomo silapi niꞌoo ampi heꞌua.”
16 SiꞌAbraham nosituruko teoli heꞌua.
Siia norekeng teperak teꞌabarinya sima sanu tinantua niꞌEvron ane sinabii nutoo-too nuHet,
teolinya apakilo santanga teperak,
monuruk timbangan sanu pinake nutopobabaluk.
Lamai heꞌua siia nombayaro eisiꞌEvron.
17 Sima heꞌua tejoꞌong niꞌEvron sanu eiMakhpela eisabata nutimur nuKota nuMamre,
najarimo tetana niꞌAbraham.
SiꞌAbraham najari tetogunya jojoo sanu eilalong nuonto nutana heꞌua tejoꞌong,
tegoa,
ane jojoo tepuu.
18 Jojoo tetoo nuHet,
sanu najaok eilalong nupejajaoꞌong heꞌua eibamba nukota,
nonyabii tetana heꞌua najari tetana niꞌAbraham.