Teꞌaparcayaong NiꞌAbraham Sinoꞌarai
22
1 Touk heꞌua teꞌAlataꞌala nonyoꞌarai teꞌaparcayaong niꞌAbraham.
TeꞌAlataꞌala noleva,
“Abraham!”
Heꞌuapa siꞌAbraham nonyimbat,
“Tesapa,
boSiopu.”
2 TeꞌAlataꞌala nonjarita,
“Omungo siꞌIshak,
teungamu sotoo-tooanaꞌonya,
sanu tututuu noꞌagalanimu,
ane umaꞌo eiTana nuMoria.
Ampi heꞌua,
eibuut sanu Utujua eisiꞌoo,
veena teungamu sima tepombee sanu norampuni eiSiaꞌu.”
3 Lamai heꞌua titieleonyamai,
siꞌAbraham nembaung.
Inuleaꞌonya tepongodunong eikeledainya lamai heꞌua ilevainya rotoo tevotuangnya ane siꞌIshak teunganya.
Siia nontias teꞌayu sanu nopake morampung tepombee.
Lamai heꞌua siira apatoo nelampa umaꞌo eibuut sanu inulara nuꞌAlataꞌala eisiia.
4 Eieleo ototoluaꞌonya initamo niꞌAbraham tebuut heꞌua lamai teꞌaavarong.
5 Lamai heꞌua siia nonjarita eivotuang-votuangnya,
“Pomoia siꞌemiu eiriꞌini concoono tekeledai eini.
Siaꞌu ane teungaꞌu umaꞌo eiriꞌua untuk monyomba teSiopu,
touk heꞌua siꞌami metencile eisiꞌemiu.”
6 SiꞌAbraham nongembea teꞌayu nuapi nupombee heꞌua eidodompal niꞌIshak.
Siia mboto nongomung telading ane tetutug meguntung teꞌayu.
Watu siira nelampa concoono,
7 siꞌIshak nonjarita,
“Papa!”
SiꞌAbraham nonyimbat,
“Tesapa boungaꞌu?”
SiꞌIshak noꞌutanya,
“Siꞌita nongomungo tetutug ane teꞌayu,
tapi eipaio teunga nudomba sanu nosambale ane norampuni sima tepombee heꞌua?”
8 SiꞌAbraham nonyimbat,
“Teungaꞌu,
teꞌAlataꞌala mboto monyadiaa teunga nudomba heꞌua.”
Heꞌuapa siira rotoo nelampa tatarus.
9 Watu siira najaok eibuut sanu jinaritaa nuꞌAlataꞌala eisiꞌAbraham,
siia nogutu teporampunong tepombee ane nonusung teꞌayu sanu norampuni heꞌua eibabonya.
Heꞌuapa pinunguinya telima ane tepaa niꞌIshak ane dinulinaꞌonya eiporampunong,
eibabok nuꞌayu norampuni heꞌua.
10 Notouk heꞌua,
inalanya telading sanu noponyambalea teunganya.
11 Tapi temalaekat nuSiopua nonjarita eisiia lamai tesuruga,
“Abraham,
Abraham!”
Nonyimbat siꞌAbraham,
“Tesapa boSiopu?”
12 TeSiopu nonjarita,
“Inyaa nopatei teungamu heꞌua atau nopepeꞌuya siia.
Eꞌeini Siaꞌu moꞌotoi siꞌoo noongko ane nonuruꞌi eiSiaꞌu,
karna siꞌoo jio montaani teungamu sanu sotoo-tooanaꞌonya untuk nombeenaꞌonya eiSiaꞌu.”
13 Heꞌuapa siꞌAbraham nonyilig umaꞌo eiteꞌe eiriꞌua ane neꞌita sambaang tedomba siamanya sanu tetanduknya netesait eilalong nuvumbu.
SiꞌAbraham nongala tedomba heꞌua heꞌuapa sinambale ane vinenaꞌonya eiꞌAlataꞌala sima tepombee sanu irampuni tebolos nuunganya.
14 SiꞌAbraham nonopei teponyombaong heꞌua,
“TeSiopu nonyadiaa sanu noparalua.”
Jaok eleo eini tetoo-too nongular,
“Eibabok nubuut-Nya teSiopu nonyadiaa sanu noparalua.”
15 Sangkaningonye valii lamai tesuruga temalaekat nuSiopu nonjarita eisiꞌAbraham,
16 “Sima eini teSiopu nonjarita,
‘Siaꞌu nojanji nonyabii tembotoꞌU,
karna siꞌoo nonggauka tegauk eini jio nontaani teungamu sanu sotoo-tooanaꞌonya untuk nombeena eiSiaꞌu,
17 Siaꞌu mombarakai tutuu siꞌoo ane mogutu tebija niꞌoo mabari sima tevituong-vituong eilangit ane teꞌababari nubayas eipipit nudagat.
Tebijamu mondaag temusu-musu niira jaok momoia eikota-kota niira.
18 Lamai tebijamu jojoo tebangsa eijuniaa maꞌaala teberkat,
karna siꞌoo nonuruꞌi teparentaꞌU.’ ”
19 Notouk heꞌua netencilemo siꞌAbraham concoono teunganya eirotoo tevotuangnya,
heꞌuapa siira jojoo umaꞌo eiBersyeba,
ane siꞌAbraham nomoia eiriꞌua.
Tebija NiNahor
20 SiꞌAbraham umai osiaꞌa langkai sanu tinope siNahor.
Touk tegauk eiBuut nuMoria heꞌua,
siꞌAbraham neꞌeepe siMilka,
telapi niNahor,
umai ounga langkai oalutoo.
Oalutoo heꞌua
21 siꞌUs,
sanu siaꞌa,
siBus,
tetuainya,
siKemuel,
sanu lamai heꞌua majari siama niꞌAram,
22 siKesed,
siHaso,
siPildash,
siYidlap,
ane siBetuel,
23 sanu lamai heꞌua majari siama niRibka.
Heꞌuamo teunga oalutoo sanu pinoguungaa niMilka eisiNahor,
tesiaꞌa niꞌAbraham.
24 SiNahor osarue sanu tinope siReuma ane tebengkel heꞌua noguungaa siTebah,
siGaham,
siTahash ane siMaꞌakha.