Tepoguungaa SiꞌIshak
21
1 TeSiopua nombarakai siSara,
sima sanu jinanjiaꞌo-Nya.
2 SiSara nolumalo lamai heꞌua noguungaa sotoo teunga langkai eisiꞌAbraham watu siꞌAbraham neisimo eiwatu sanu tinantua nuꞌAlataꞌala.
3 SiꞌAbraham nonopei teunga heꞌua siꞌIshak.b
4 Watu teꞌumur niꞌIshak oalueleo,
siꞌAbraham nonyuna siia,
sima pinarentaa nuꞌAlataꞌala eisiia.
5 Teꞌumur niꞌAbraham 100 ntoung watu siꞌIshak pinoguungaa.
6 SiSara nonjarita,
“TeꞌAlataꞌala nogutu siaꞌu nengisi karna masanang.
Tiap tetoo sanu neꞌeepe tegauk heꞌua mengisi masanang concoono siaꞌu.”
7 Lamai heꞌua siia nonjarita valii,
“Luulu jio umai tetoo sanu nongulara eilapiꞌu,
‘SiSara monyusui teunga.’
Tapi siaꞌu noguungaaꞌomo sotoo teunga langkai eisiꞌAbraham watu siia neisimo tutuu.”
SiHagar Ane SiꞌIsmael Binugo
8 Teunga heꞌua nabaꞌay,
ane eiwatu teeleo siia mompamulamo nopepeꞌeondok nonusu siꞌAbraham mogutu teparoa sanu mooge.
9 Vavalii seeleo,
siꞌIsmael,
teunga niꞌAbraham ane niHagar tebengkel nuMesir heꞌua,
pepees monumboy siꞌIshak,
teunga niSara.
10 SiSara neꞌita tegauk heꞌua ane nonjarita eisiꞌAbraham,
“Bugo tevotuang bengkel heꞌua ane teunganya.
Jio maala teunga nubengkel heꞌua monarima tetilal lamai tebudel sanu noveena eiungaꞌu siꞌIshak.”
11 SiꞌAbraham tututuu masesa teambok neꞌeepe teꞌusul heꞌua,
karna siꞌIsmael teunganya valii.
12 Tapi teꞌAlataꞌala nonjarita eisiꞌAbraham,
“Inyaa siꞌoo masesa teambok sima tevotuangmu,
siHagar,
ane teunga heꞌua.
Turuꞌi teꞌeseseilu niSara,
karna lamai siꞌIshak siꞌoo maꞌaala tebija sanu jinanjiaꞌU heꞌua.
13 Tapi eiunga niHagar Uveena valii mabari tebija jaok siira majari sobua tebangsa,
karna siia teungamu valii.”
14 Lamai heꞌua titieleonyamai,
siꞌAbraham nongala tevalung ane sobua tepongembeong teogo pinogutu lamai teꞌuli.
Siia nongembea heꞌua eitundung niHagar,
ane nonuju siia concoono teunga umaꞌo.
Heꞌuapa nelengkato siHagar ane nongalalampa eitana sanu jio pinomoiai nutoo moꞌosuk teBersyeba.
15 Watu teogo niira notouk,
siHagar nongembea teunganya eiangkop nupuu sanu medeꞌi.
16 Lamai heꞌua siia nongodung kira-kira sagatus meter lamai teunga heꞌua.
Siia nonjarita eilalong nuambok,
“Jio mataanu meꞌita teungaꞌu maate.”
Heꞌuapa notumangis siia.
17 TeꞌAlataꞌala neꞌeepe tesuara niꞌIsmael,
ane lamai telangit temalaekat nuꞌAlataꞌala nonjarita eisiHagar,
“Tesapa sanu inosusaa niꞌoo,
Hagar?
Inyaa nobule.
TeꞌAlataꞌala neꞌeepe tesuara nuungamu lamai tepodulinong ampi heꞌua.
18 Naꞌomo eiungamu,
dului siia meꞌoro ane monanau siia.
Siaꞌu monjaria tebijanya tebangsa sanu mabari.”
19 Lamai heꞌua teꞌAlataꞌala nopoꞌitaa eisiHagar sobua tebumbun.
Lamai heꞌua umaꞌo siia ane nongisi teogo eipongembeong teogo lamai teꞌuli heꞌua.
Heꞌuapa pinainungnya teunganya.
20-21 TeꞌAlataꞌala nonagui siꞌIsmael.
Teunga heꞌua nabaꞌay.
Siia nomoia eiTana nuParan sanu jio pinomoiai nutoo,
ane najari tetopomana sanu mapande.
Siinanya nopopolapi siia concoono sotoo tebengkel nuMesir.
SiꞌAbraham Ane SiꞌAbimelekh Nogutu Tepejanjiong
22 Vavalii seeleo tePuang siꞌAbimelekh ane tetopomimpin nutantaranya,
siPikhol,
najaok eisiꞌAbraham ane nonjarita,
“TeꞌAlataꞌala nonagui siꞌoo eilalong jojoo sanu ginaukamu.
23 Karna heꞌua siaꞌu nomongi siꞌoo mojanji,
eiriꞌini eitolo nuꞌAlataꞌala,
siꞌoo jio majeko eisiaꞌu,
atau eiunga-ungaꞌu,
atau eibijaꞌu.
Sima siaꞌu nombosi teambok eisiꞌoo,
pogugauk sima heꞌua valii eisiaꞌu ane eitoo-too eitana sanu pinomoiaimu eini.”
24 SiꞌAbraham nonjarita,
“Siaꞌu nojanji.”
25 Tapi lamai heꞌua siꞌAbraham nonyalai siꞌAbimelekh sima sobua tebumbun sanu inagoi nuvotuang-votuang nupuang heꞌua.
26 SiꞌAbimelekh nonjarita,
“Siaꞌu jio moꞌotoi sisee sanu nonggaukaꞌonya.
Jiompo siꞌoo nongularaꞌonya eisiaꞌu ane eꞌeini siaꞌu paꞌali neꞌeepe sima tegauk heꞌua.”
27 Lamai heꞌua siꞌAbraham nombeena lasiambaang tedomba ane lasiambaang tesapi eisiꞌAbimelekh,
ane rotoo tetoo heꞌua nogutu tepejanjiong.
28 SiꞌAbraham nontania pitumbaang teunga nudomba sanu siinanya lamai tekaawan nudombanya.
29 SiꞌAbimelekh noꞌutanya eisiia,
“Neteꞌuya siꞌoo nonggauka heꞌua?”
30 SiꞌAbraham nonyimbat,
“Tarima pitumbaang teunga nudomba eini sima tetanda siMangge nongakui siaꞌu nonggaung tebumbun eini.”
31 Sima heꞌua tepomoiaong heꞌua tinopei teBersyeba,
c karna eiriꞌua rotoo tetoo heꞌua nogutu tejanji.
32 Touk siira nogutu tepejanjiong eiBersyeba,
siꞌAbimelekh ane siPikhol netencile umaꞌo tetana nutoo-too nuPilistin.
33 Heꞌuapa siꞌAbraham nonuda sompuung tepuu nutamariska eiBersyeba ane eiriꞌua siia nonyomba teSiopu,
teꞌAlataꞌala sanu netuvu seende-endenya.
34 Touk heꞌua siꞌAbraham nomoia lasiantoung eitana nutoo-too nuPilistin.