SiꞌAbraham Ane SiꞌAbimelekh
20
1 SiꞌAbraham nombalik lamai teMamre umaꞌo eisabata nuselatan teTana nuKanaꞌan,
ane nomoia eiolot nuKota nuKadesh ane nuKota nuSyur.
Touk siia nomoia eiriꞌua,
siia nombalik eiKota nuGerar.
EiGerar siia nomoia sima tetoo sanu mokurang,a
2 siia nonjarita sima telapinya,
siSara,
“Siia tetuaiꞌu.”
Karna heꞌua tePuang siꞌAbimelekh lamai teGerar nonuju tetujuongnya ane siia nongala siSara.
3 Vavalii sembengi teꞌAlataꞌala najaok eipuang heꞌua eilalong nuupiong,
ane nonjarita,
“Siꞌoo maate,
karna inalamo niꞌoo tebengkel sanu pinolapimo.”
4 Tapi siꞌAbimelekh jiompo nonggama siSara.
Karna heꞌua jinarita nupuang heꞌua,
“BoSiopu,
b siaꞌu jio osala!
Jio mombosi momate siaꞌu concoono tebangsaꞌu!
5 SiꞌAbraham mboto nonjarita,
‘Siia tetuaiꞌu,’
ane tebengkel heꞌua nonjarita,
‘Siia tesiaꞌaꞌu.’
Siaꞌu nonggaukaꞌomo heꞌua nepake teambok sanu melivas,
jadi siaꞌu jio osala.”
6 Lamai heꞌua teꞌAlataꞌala nonyimbat eilalong nuupiong heꞌua,
“Tutuu,
Uotoi siꞌoo nonggaukaꞌonya nepake teambok sanu melivas.
Karna heꞌua Siaꞌu nonjagamo siꞌoo antau siꞌoo jio nonggauka tedosa eiSiaꞌu,
ane jio Upatuvaya siꞌoo nonggama tebengkel heꞌua.
7 Tapi eꞌeini,
tencilea siia eilapinya.
Telapinya heꞌua sotoo tenabi,
ane siia mongganea siꞌoo antau siꞌoo jio maate.
Tapi ane siꞌoo jio monencileaꞌonya,
lambot,
siꞌoo ane jojoo tetoomu maate!”
8 Lamai heꞌua titieleonyamai,
siꞌAbimelekh noleva jojoo tetoonya sanu apangka ane nongulara eisiira jojoo sanu majari heꞌua.
Siira najari nobule tutuu.
9 Touk heꞌua siꞌAbimelekh noleva siꞌAbraham ane nonjarita,
“Jio mombosi sanu ginaukamu eisiꞌami!
Tesapa tedosaꞌu eisiꞌoo,
jaok siꞌoo nonjaoka tedosa sanu mooge eini eisiaꞌu ane eirayatu?
Tututuu siꞌoo nonggaukaꞌomo eisiꞌami sanu jio masipato ginauka!
10 Neteꞌuya siꞌoo nogugauk sima heꞌua?”
11 SiꞌAbraham nonyimbat,
“Pinikiru eiriꞌini jio otoo sanu nobule eiꞌAlataꞌala,
jaok siaꞌu nopatei nutoo sanu meseilua telapiꞌu.
12 Siia heꞌua tutuu tetuaiꞌu.
Siꞌami sotoo tesiama,
tapi netantaniong tesiina ane lamai heꞌua siꞌami nelapiong.
13 Heꞌuapa teꞌAlataꞌala nonuju siaꞌu nolinjoꞌi tevonua nusiamaꞌu ane nongalalampa eitana ntaninya,
siaꞌu nonjarita eilapiꞌu,
‘Popoꞌitaa siꞌoo tutuu magalang eisiaꞌu sima eini:
eipapaio siꞌita umaꞌo,
ulara siꞌita montolituai.’ ”
14 Touk heꞌua siꞌAbimelekh nonencilea siSara eisiꞌAbraham,
ane watu heꞌua siia nombeena valii tevotuang-votuang nulangkai,
tevotuang-votuang nubengkel,
tedomba-domba,
tebembe-bembe ane tesapi-sapi.
15 SiꞌAbimelekh nonjarita eisiꞌAbraham,
“Eini jojoo tetanaꞌu.
Pomoia eipaio seilumu.”
16 Heꞌuapa siia nonjarita eisiSara,
“Eisiaꞌamu vineniiꞌumo seribumboꞌa teperak sima tetanda eijojoo tetoo sanu concoono siꞌoo,
antau siira moꞌotoi siꞌoo tutuu ane jio osala.”
17-18 Watu siꞌAbimelekh nongala siSara,
telapi niꞌAbraham,
teSiopu nogutu nalaung jojoo tebengkel eivonua niꞌAbimelekh.
Tapi watu siꞌAbraham nonggane eiꞌAlataꞌala,
teꞌAlataꞌala nepeꞌeondok tepees niꞌAbimelekh,
telapinya ane tevotuang-votuangnya bengkel,
jaok tebengkel-bengkel heꞌua naꞌaala noguungaaꞌonye.