Telangkai-langkai NuSodom Seilu Mogugauk Sanu Majaat
19
1 Watu beimbengi,
rotoo temalaekat heꞌuaa najaok eiKota nuSodom.
SiLot pepees oduodung eitolo nubamba nukota heꞌua ane watu neꞌita siira,
nembaung siia ane nolabot siira.
Heꞌuapa noposuncul,
2 ane nonjarita,
“Mangge-mangge pesoopo eivonua nuvotuang niꞌemiu eini.
Potitindoung eiriꞌini ane tambasi tepaa niꞌemiu.
Lamai heꞌua titieleo siꞌemiu maala monarusa tepelampa.”
Siira nonyimbat,
“Jio,
siꞌami motitindoung eilapangan nukota.”
3 Tapi karna siia neubu siira tutuu,
siira nesoo ane nentama umaꞌo eilalong nuvonua niLot.
Heꞌuapa siia nonyadiaa sanu noꞌinang eisiira.
Siia nomanggang teroti sanu jio oragi,
heꞌuapa siira nenginang.
4 Tapi jijiompo siira moꞌoturu,
tetoo-too langkai lamai teKota nuSodom heꞌua,
lamai sanu molumbi jaok sanu meisi,
jojoo telangkai lamai eipapaio eikota heꞌua najaok nomaliti tevonua heꞌua.
5 Siira noleva eisiLot,
“Eipaio tetoo-too sanu najaok eisiꞌoo ndoung eini?
Omungo siira mesuvung menekai eisiꞌami,
antau nopakeb niꞌami siira.”
6 SiLot nesuvung ane nonjaoꞌi siira eibamba nuvonua ane nevombona tevombong eiteꞌe siia.
7 Siia nonjarita eisiira,
“Tetagu-taguꞌu inyaa mogugauk sanu majaat.
8 Siaꞌu ounga rotoo terandaa,
sanu jiompo moꞌoturu concoono telangkai.
Patuvaya siaꞌu mombeena siira eisiꞌemiu untuk nogauka teꞌeseseilu nuambok niꞌemiu.
Tapi inyaa siꞌemiu monggauka tesapa-sapa eilangkai-langkai eini,
karna siira najaok eivonuaꞌu ane siaꞌu kanaboi monjaga siira.”
9 Tapi tetoo-too nuSodom nonjarita,
“Polilik!
Siꞌoo najaok eiriꞌini sima tetoo sanu mokurang ane eꞌeini siꞌoo seilu monjarita tesapa sanu maala nogauka ane sanu jio maala nogauka niꞌami.
Siꞌami monggauka melabi majaat eisiꞌoo heꞌuapa rotoo heꞌua.”
Lamai heꞌua siira nonjurut siLot ane nongosuꞌi tevonua antau moporongkas tevombong nubamba.
10 Tapi rotoo tetamuc heꞌua nonggiur siLot nentama eilalong nuvonua,
heꞌuapa nevombona tevombong.
11 Lamai heꞌua siira nopoꞌobuta temata nutoo-too nuSodom heꞌua,
jaok siira jio naꞌajaok tebamba.
SiLot Nolinjoꞌi TeSodom
12 Rotoo tetamu heꞌua nonjarita eisiLot,
“Ane siꞌoo umai otomodait langkai,
ounga langkai,
ounga bengkel,
atau orurus ntaninya sanu nomoia eilalong nukota eini,
omung siira mesuvung lamai eiriꞌini
13 karna siꞌami mopoꞌorua tekota eini.
TeSiopud neꞌeepe terait-rait movoat eitopomoia-topomoia eiriꞌini,
ane siꞌami tinuju-Nya untuk mopoꞌorua teKota nuSodom.”
14 Lamai heꞌua siLot nesuvung ane nonjaoꞌi rotoo tetatambak nuunganya ane nonjarita,
“Salai pesuvung lamai tepomoiaong eini,
karna teSiopu mopoꞌoruanya.”
Tapi sinangka niira siLot boi motatambak.
15 Watu ulengi mantieleo,
rotoo temalaekat heꞌua monyara siLot antau molongkang melengkat.
Siira nonjarita,
“Poꞌolongkang,
naꞌomo concoono telapimu ane rotoo teunga randaamu lamai eiriꞌini,
antau siꞌemiu jio maate watu tekota eini nopoꞌorua.”
16 SiLot jio molongkang melengkat.
Jadi rotoo temalaekat heꞌua nondiit telima niLot,
telima nulapinya ane telima rotoo teunganya ane nongomung siira nesuvung lamai tekota,
karna teSiopu maꞌaasi eisiira.
17 Touk siira nesuvung lamai tekota,
sotoo temalaekat heꞌua nonjarita,
“Pelinjoko,
salamata tenyaa niꞌemiu!
Inyaa monyilig umaꞌo eiteꞌe ane inyaa mengondok eilembok eini.
Pelinjok umaꞌo tebuut,
antau siꞌemiu jio maate!”
18 Tapi siLot nonyimbat,
“BoMangge,
inyaa monuju siꞌami melinjok umaꞌo eibuut.
19 Tututuu,
siMangge teambokmu mombosi eisiaꞌu.
SiMangge nagalango eisiaꞌu ane nopaꞌasalamat tenyaaꞌu.
Tapi tebuut heꞌua maavar tutuu.
Inyanyaa sanu mesilaka heꞌua najaok eisiaꞌu ane siaꞌu maate jijiompo najaok eiriꞌua.
20 Itai,
eitolo heꞌua umai tekota medeꞌi sanu moꞌosuk.
Tepomoiaong heꞌua medeꞌi.
Patuvaya siaꞌu melinjok umaꞌo eiriꞌua antau masalamat.”
21 Temalaekat heꞌua nonyimbat,
“Oie,
maala sima heꞌua.
Tekota medeꞌi heꞌua jio upoꞌorua.
22 Poꞌolongkang,
pelinjoko!
Karna siaꞌu jio maala mogugauk tesapa-sapa jijiompo siꞌoo majaok eiriꞌua.”
Karna siLot nonope tekota heꞌua medeꞌi,
lamai heꞌua tekota heꞌua tinopei teSoar.e
Orurua NuKota NuSodom Ane NuKota NuGomora
23 Teboas nueleo paꞌali membuꞌa watu siLot najaok eiSoar.
24 Lamai heꞌua teSiopu nonyaua lamai telangit teujang tevatu-vatu sanu mevaa ane teapi eibabok nuSodom ane nuGomora.
25 Rokota heꞌua pinoꞌorua-Nya concoono jojoo sanu eilembok ane jojoo tepomulaong ane jojoo tetoo eiriꞌua.
26 Tapi telapi niLot nonyilig umaꞌo eiteꞌe,
heꞌuapa siia najari teerii nuosing.
27 Lamai heꞌua titieleonyamai,
siꞌAbraham lolongkang umaꞌo eipaio siia neꞌoro eitolo nuSiopu.
28 Siia nonyilig umaꞌo teSodom ane teGomora ane jojoo tetana eilembok,
ane initanya teobol nesuvung lamai tetana heꞌua,
sima teobol lamai tejoꞌong sanu irampuni.
29 Sima heꞌua,
teꞌAlataꞌala nopoꞌorua tutuu tekota-kota heꞌua eilembok eipaio pinomoiai niLot.
TeꞌAlataꞌala nolambot siꞌAbraham ane nonyuvuna siLot lamai tekota sanu pinoꞌorua-Nya.
SiLot Ane Rotoo Teunganya Bengkel
30 Karna siLot mobule nomoia eiSoar,
nolalaꞌe siia eibubuut concoono rotoo teunganya bengkel,
lamai heꞌua nomoia eigoa.
31 Vavalii seeleo teunga sanu siaꞌa nonjarita eituainya,
“Siama niꞌita meisimo,
ane eitana eini jio umai olangkai sanu maala molapi siꞌita,
sima biasa eijuniaa.
32 Maemo,
siꞌita momainung teꞌanggur jaok siia meilu,
heꞌuapa siꞌita moꞌoturu concoono siia antau siꞌita maꞌaala tebija.”
33 Watu ndoungnya heꞌua siira nomainung siama niira teꞌanggur.
Heꞌuapa teunga sanu siaꞌa noꞌoturu concoono siamanya.
Tapi siamanya meilu tutuu jaok jio moꞌotoi tesapa sanu najari.
34 Eieleo ancunaꞌonya,
teunga sanu siaꞌa nonjarita eituainya,
“Eimondoung siaꞌu noꞌoturumo concoono siama niꞌita!
Jamo ndoungnya siꞌita momainungonye jaok siia meilu.
Heꞌuapa siꞌoo poꞌoturu concoono siia,
antau siꞌita rotoo maꞌaala tebija.”
35 Watu ndoungnya heꞌua siira nomainung siama niira teꞌanggur.
Heꞌuapa teunga sanu pomabusong noꞌoturu concoono siamanya.
Tapi siamanya meilu tutuu jaok jio moꞌotoi tesapa sanu najari.
36 Heꞌuapa nolumalo rotoo teunga niLot heꞌua karna tesiama niira mboto.
37 Teunga sanu siaꞌa noguungaa teunga langkai tinopeinya siMoab.
f Siia najari tesiopu sanu luulumai nubangsa nuMoab sanu jaok eleo eini.
38 Teunga sanu tuai noguungaa teunga langkai valii sanu tinopeinya siBen-Ami.
g Siia najari tesiopu sanu luulumai nubangsa nuꞌAmon sanu jaok eleo eini.